tion>
Donald W. Riekert
Heuning uit die swarthaak
Tafelberg
Die uitleg van gedigte in hierdie digitale uitgawe van Heuning uit die swarthaak mag verskil van dié van die gedrukte uitgawe, afhangende van die instellings op u leestoestel. Die uitleg vertoon optimaal indien die standaardinstelling op u leestoestel gebruik word. Lesers kan egter eksperimenteer met die instellings vir verskillende perspektiewe op die gedigte.
Vir oom Jaap en tant Bets
In die begin
In die begin het
die Skepper die groot
wilde-olyf op Thamoanche
se nek gevel en uit die
taaihout die eerste man
gekerf daarna die
wilde-olyfolie saam gemaal
met die blommetjies
van die swarthaak tot die
vrou opstaan uit die
jonasklip en in die geur
van heuning die olyf
uit daardie man se hand eet
Gebed tot die aardvark
O aardvark dier van donkermaan
keer terug kom help
kom uit jou skuiling
gee die lig van volmaan
want die gras het vlerkies gekry
gras vlieg en sweef
’n wolk wat wit is
en wat donker bring
wat als verteer
en hope grond tot groot kasteel bewerk
O aardvark redder wat verdwyn het
die rysmier het wit eiertjies
oor die hele Suurveld gestrooi
kom eet ons offer in die stof
red ons verlate land
Blink kristal
Die swart kraai
het baie jare terug
’n stokkie aluminium
oor Mamatwan laat val
in die buik van die aarde
tussen al die swart mangaan
het dit gedrink gedrink geswel
tot hierdie pers kristal watersag
en broos die lig van baie
watervloede
in een reënboog buig
Die Heilige Stad
Pa het soms as hy luister
na die lied van die
Heilige Stad bewoë geraak
en ook gesing Jerusalem
Jerusalem soms kla Ma
dat Pa die stemming steur
maar Pa trek oop sy stem
en roep die Heilige Stad
wat in sy blou hemel
êrens rondom Thamoanche
en Maroping sou neerdaal
Die vaal maan
Die vaal maan
dryf bakkie tussen
ligroos wolke bo
donkerkolle van kameeldoring
gaan die kommetjie
opwaarts bo duine
en die gras roer
in die wind wyl
bloukopkoggelmanders
met pote na bo
weet die reën kom
die reën kom
Swarthaakheuning 1
Die heuning drup
uit die bros geel koek
ek proe die soet in
sy sorg as hy vaderlik
met sy kort duim
die swarthaakheuning
bros kraak en in elke
porsie ag jong bye afmeet
Swarthaakheuning 2
Unaline Unaline
jy is die ver ruik
van die swarthaakblom
die stuif in die meel
van die trossies geelblom
jy waai in die soet-soet soek
van die lentewind
o jy is die kry
van die bruingeel heuning
diep in die uitholklip
jy drup woestyngeur
Unaline in my
proe jy
na swarthaakheuning
Die skepping van die gemsbok
Op Gamohaankop
in die Begin sny
die
