И прииде к Нему прокажен, моля Его и на колену припадая пред Ним, и глаголя Ему, аще хощеши, можеши мя очистити.
Иисус же милосердовав, простер руку, коснуся его, и глагола ему: Хощу, очистися. И рекшу ему, абие отиде от него прокажение, и чист бысть. И запрещь ему, абие изгна его, и глагола ему: Блюди, никому же ничесоже рцы, но шед покажися иерееви и принеси за очищение твое, яже повеле Моисей, во свидетелство им. Он же изшед начат проповедати много и проносити слово, яко же ктому не мощи Ему яве во град внити, но вне в пустых местех. И прихождаху к нему отвсюду.
Глава 15
И вниде паки в Капернаум по днех, и слышано бысть, яко в дому. И абие собрашася мнози, якоже ктому не вмещатися ни при дверех и глаголаше им слово. И приидоша к Нему носяще разслабленна жилами, носима четырьми, и не могущим приближитися к Нему народа ради, открыша покров, и прокопавше свесиша одр, на немже разслабленный лежаше. Видев же Иисус веру их, глагола разслабленному: Чадо, отпущаются тебе греси твои. Бяху же нецыи от книжник ту седяще и помышляюще в сердцах своих: Что тако глаголет хулы? Кто может оставляти грехи, токмо Единственный Бог?
И абие разумев Иисус Духом Своим, яко тако тии помышляют в себе, рече им: Что помышляете в сердцах ваших? Что есть удобее рещи разслабленному: Отпущаются тебе греси? Или рещи: Востани, и возми одр твой, и ходи? Но да увесте, яко власть имать Сын Человеческий на земли отпущати грехи, глагола разслабленному:
Тебе глаголю, востани, и возми одр твой, и иди в дом твой. И воста абие, и взем одр, изыде пред всеми, яко дивитися всем и славити Бога, глаголющим: Николиже тако видехом.
Глава 16
И преходя Иисус оттуду, виде человека седяща на мытнице, Матфея глаголема, и глагола ему: По Мне гряди. И востав по Нем иде.
И бысть Ему возлежащу в дому, и мнози мытари и грешницы пришедше возлежаху со Иисусом и со ученики Его. И видевше фарисее, глаголаху ученикомъ Его: Почто с мытари и грешники учитель ваш яст и пиет? Иисус же слышав рече им: Не требуют здравии врача, но болящии, шедше же научитеся, что есть: милости хощу, а не жертвы? Не приидох призвати праведники, но грешники на покаяние.
Глава 17
Они же реша к Нему: Почто ученицы Иоановны постятся часто и молитвы творят, такожде и фарисейстии, а Твои ядят и пиют?
Он же рече к ним: Еда можете сыны брачныя, дондеже Жених с ними сотворити поститися? Приидут же дние, егда отят будет от них Жених, и тогда постятся в тыя дни.
Глаголаше же и притчу к ним, яко никтоже приставления ризы новы приставляет на ризу ветху, аще ли же ни, и новую раздерет, и ветсей не согласует еже от новаго. И никтоже вливает вина нова в мехи ветхи, аще ли же ни, расторгнет новое вино мехи, и само излиется, и меси погибнут, но вино новое в мехи новы вливати подобает, и обоя соблюдутся. И никтоже пив ветхое, хощет новаго, глаголет: Ветхое лучше.
Глава 18
