droefheid te probeer ontvlug deur ons in ons werk te begrawe, los ook nie die probleem op nie. Dis soos wanneer ’n mens ’n verdowingsmiddel neem om jou pyn te stil. Op sy beste bring dit slegs tydelike verligting, maar dit genees nie die oorsaak van die probleem nie. Hoe meer ons onsself mislei, hoe ondraagliker word die waarheid.
God plaas nooit sy kinders in ’n vuuroond sonder dat Hy self daar by hulle is nie. As ons nie iets leer en geestelik groei in tye van beproewing nie, is ook ons lyding enkel verlies. Die ervaring van duisende van God se gelowige kinders bewys dat tye van lyding juis die optimale groeityd in ’n mens se lewe kan wees – mits jy dit in die regte gesindheid deurworstel. Die enigste manier waarop Christene hulle droefheid kan erken en verwerk, is om die voorbeeld van ons Meester na te volg: om kalm en moedig die lewe te aanvaar en met ’n vreeslose hart en ongeknakte rug onder die kruis in te buig. Die bevryding lê in die seker wete dat die sin van die lewe nie duskant nie, maar anderkant Golgota en die graf gevind word.
Verlosser en Heiland,
al het ek nie al die antwoorde nie,
het ek U in my lewe.
Ek hou aan U vas met die gelowige wete
dat u liefde my nooit
aan wanhoop sal uitlewer nie.
As ons die goeie van God aanvaar,
moet ons nie ook die slegte aanvaar nie?
(Job 2:10)
DIE VREEMDSTE WAARHEID VAN DIE EVANGELIE IS DAT VERLOSSING UIT LYDING GEBORE WORD
– Milo L Chapman.
7 Laat hulle gaan
Lasarus moes op bevel van Christus losgemaak word van die grafdoeke sodat hy vry kon wees om terug te gaan na die lewe en na hulle wat hom liefhet. Diegene wat ’n geliefde aan die dood afgestaan het, moet hom of haar laat gaan na ’n nuwe en verheerlikte lewe saam met Christus. Dit is een van die moeilikste eise in ons ganse bestaan, want die verlede staan ons nog so helder voor die gees en ons kan ons die ewigheid beswaarlik voorstel. Vir hierdie mense het Jesaja ’n boodskap vanuit die hart van God: “Maar moenie net aan die vroeëre dinge dink en by die verlede stilstaan nie. Kyk, Ek gaan iets nuuts doen, dit staan op die punt om te gebeur, julle kan dit al sien kom; Ek maak in die woestyn ’n pad, Ek laat in die droë wêreld riviere ontspring” (Jes 43:18-19).
God verwag dat ons die verlede, en daarmee saam ons ontslape dierbares, aan Hom moet oorgee. En dan moet ons met moed en geloof vorentoe beweeg. Selfs die goeie kan, as ons krampagtig daaraan vasklem en telkens probeer om die verlede te herleef, ons geestelike groei verhinder. Ons kan God se wil vir ons lewe deur so ’n ingesteldheid verydel. In die onderwerping aan sy wil, lê ons vrede.
As ons ons dierbares aan God opdra en afgee, kan Hy sy volmaakte wil vir ons toekoms laat ontvou. Dit beteken nie dat ons ons liefde vir hulle moet verloën nie, maar slegs dat ons vorentoe moet kyk in plaas van agtertoe. Dan eers kan God ons begelei na die feesmaal in die Vaderhuis waar daar ’n heerlike weerontmoeting en ewige geluksaligheid op ons wag.
Die familie om die sterfbed van ’n ou Skotse leraar het gefluister: “Hy nader nou die land van die dooies.” Met ’n gebroke stem het hy gesê: “Nee, ek is nóú in die land van die dooies. Ek nader, dank God, die land van die lewendes.” Ons siening oor die lewe en die dood is soms so skeefgetrek dat ons vashou aan dit wat ons moet laat vaar, en waarhede vergeet wat ons moet onthou.
Opgestane Here en Meester,
help my om die hede
na die beste van my vermoë te hanteer
en om vooruit te sien na dit wat U
vir my in die vooruitsig stel.
Ek bid dit met danksegging.
Maak hom los
dat hy kan huis toe gaan.
(Joh 11:44)
DIE WOORD WAT GOD OP DIE VOORKOP VAN DIE MENS GEGRAVEER HET, IS HOOP
– Victor Hugo.
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.
