Jesus – die krag in jou lewe
LEES 1 Korintiërs 15:50–58
Maar ons dank God dat Hy aan ons die oorwinning gee deur ons Here Jesus Christus. – 1 Korintiërs 15:57
Wanneer mislukking in ons lewe kom, moet ons dit positief en skeppend hanteer. As God se kinders mag ons nie deur gevoelens van mislukking oorweldig word nie. Ons moet die lewe tegemoetgaan met Paulus se jubelkreet in 1 Korintiërs 15:57 op ons lippe.
Baie mense leef in ’n gedurige vrees vir mislukking. Daarom wil hulle niks nuuts aanpak nie. So word hul inisiatief vernietig en hul uitsig belemmer. ’n Mens is egter nooit ’n mislukking totdat jy self besluit het jy is een nie. Talle mense het na aanvanklike mislukkings weer probeer en tot heerlike oorwinning gekom.
As jy misluk het, onthou: God skryf niemand af nie. Jesus Christus is die krag in jou lewe wat alles weer nuut kan maak. Hy verstaan jou hart. As jy jou vertroue volkome op Hom stel, sal Hy aan jou die finale oorwinning skenk. Gaan daarom die lewe met sy veelvuldige eise tegemoet, vertrou God onvoorwaardelik en Hy sal jou dra na oorwinning!
GEBED
Hemelse Here, ek het dikwels nie die krag om te stry nie, maar ek dank U dat ek deur u genade tog in die lewe oorwinning kan smaak – veral oor sonde en mislukking.
6 Maart
Christelike hoop
LEES Romeine 8:18–30
Dan sal julle ook nie treur nie, soos die ander mense wat geen hoop het nie. – 1 Tessalonisense 4:13
In die Tate-kunsgalery in Londen hang ’n treffende skildery van George Frederick Watts. Die titel daarvan is “Hoop”. ’n Beeldskone vrou sit op ’n aardbol. Sy is geblinddoek en hou ’n luit in haar hande. Al die snare van die luit is stukkend, behalwe een. Sy raak daardie een snaar met haar vinger aan, haar oor luisterend daarna gebuig. Sy wag in spanning om die klank van daardie een snaar te hoor. Sy het hoop – sy glo die beste in die slegste omstandighede.
Solank die hoop lewe, sal ons nie knak onder ons beproewings en probleme nie. As iets tragies met ons gebeur, is dit ons troos: Waar Christelike hoop bestaan, is die nag nie so donker nie. Hoop is optimisme wat gegrond is in God se vermoë om die beste uit die slegste te voorskyn te bring. Dit is daardie sekere toekomsverwagting wat ons hart met blydskap vul. Hoop is ons onwrikbare vertroue in die ewige goedheid van God. Hoop gee aan ons ’n onoorwinlike gees. Daarom sê Paulus: “Christus is in julle, Hy is julle hoop op die heerlikheid” (Kol 1:27).
GEBED
Ewige God, ons loof U vir u Woord wat altyd nuwe hoop bring wanneer wanhoop ons bedreig. Versterk ons daagliks met u onblusbare hoop.
7 Maart
Gebed in die donker vallei
LEES Psalm 102:1–23
Hy luister na die gebed van dié wat alles verloor het, Hy sal hulle gebed nie verag nie. – Psalm 102:18
Vir elke kind van God kom daar tye wanneer dit moeilik is om te bid, wanneer hy voel hy is besig om sy greep te verloor op die anker in sy lewe: ’n bewussyn van die teenwoordigheid van God. God, wat altyd vir jou ’n werklikheid was, lyk skielik afsydig en onwerklik.
Baie Christene herken nie die onmeetlike betekenis van hierdie tye nie. Hulle dink verkeerdelik dat God nie meer omgee nie. Hierdie tye vereis van jou om vas te glo aan die teenwoordigheid van God in jou lewe, om in ’n dieper verhouding met God te begin leef. Ons moet leer om in die lig, maar ook in die donker aan God se hand te wandel. Dan word sy teenwoordigheid vir ons ’n lewende en vreugdevolle werklikheid.
Die donker uur sal verbygaan. Moenie teen jou onvermoë om te bid in opstand kom nie, maar probeer bepaal wat jy daaruit kan leer. Klem vas aan die waarheid dat God se liefde vir jou nooit verander nie.
GEBED
Liefdevolle God, help my om weg te kyk van myself en my probleme; om U met meer inspanning te soek en u wil te doen totdat U die donkerheid in lig omskep.
8 Maart
Die dood is dood!
LEES Johannes 12:20–36
Dít verseker Ek julle: As ’n koringkorrel nie in die grond val en sterwe nie, bly hy net een; maar as hy sterwe, bring hy ’n groot oes in. – Johannes 12:24
Op Golgota het Jesus Christus die dood oorwin! Daarom is fisieke dood nie meer vir ons ’n tragedie nie. Dit is die kern van ons Christelike geloof.
In die perspektief van die ewigheid gesien, is dit dus nie die dood van die liggaam wat tragies is nie, maar die geestelike dood, wanneer jy die koninkryk van God nie ernstig opneem nie, wanneer jy jou nie oorgee aan Christus nie.
’n Mens se lewe bestaan nie uit wat jy besit nie, maar uit die gehalte van jou sielelewe. Die Christen sterf slegs om weer op te staan. Hy is ’n oorwinnaar, al sterf hy. Ons sal nie weet wat ware lewe is voordat ons gesterf het nie. In Christus wat die dood oorwin het, het ons die ware lewe, want Hy het die dood omskep in die moontlikheid van ewige lewe.
Laat ons dus ophou bang wees vir die magte wat die liggaam aantas. Laat ons eerder waak teen die Bose wat die siel aftakel en laat sterf. Want ons weet immers dat die lewe die finale seggenskap oor ons en ons dierbares het.
GEBED
Heilige God, help my om elke dag te leef met ’n perspektief op die ewigheid. Ek dank U, Jesus, dat U in my plek gesterf en die dood oorwin het.
9 Maart
Wat gee jy aan God?
LEES Efesiërs 5:1–5
Lewe in liefde, soos Christus ons ook liefgehad en om ons ontwil sy lewe as ’n offergawe gegee het, ja, ’n offer wat vir God aanneemlik was. – Efesiërs 5:2
Het jy jou al ernstig en eerlik afgevra: Wat gee ek aan God? Ons sing so dikwels in die kerk sonder om te besef wat die woorde beteken: “Neem my lewe, laat dit, Heer, U gewy wees meer en meer”. Dan gaan ons uit in die lewe om ons gewaande toewyding by ons selfsugtige gerief te laat aanpas. Wanneer ons eerlik na ons lewe kyk, is dit ontstellend om te ontdek dat die somtotaal van wat ons aan God gee, dikwels bitter klein is.
Dit is onmoontlik om jou besittings aan God te wy sonder om eers jouself aan Hom te gee. Al bely jy dat alles wat jy besit tog maar aan God behoort, is daar een ding wat joune is om te gee of vir jouself te hou: die gawe van die liefde.
Wat jy ook al aan God gee, dit is nie van enige waarde as dit nie gepaardgaan met jou suiwer liefde nie. Dit is die gawe van die liefde wat alle ander offers aan God aanneemlik maak vir Hom, want die liefde hou niks terug nie. Soos God sy kosbare Seun uit liefde vir jou gegee het, so moet jy in liefde álles vir Hom skenk. Meer as jou liefde en jou lewe verwag Hy nie, maar ook nie minder nie!
GEBED
Here, my totale lewe wy ek aan U – saam met al my liefde. Heilig my gawe deur die liefde wat daar in Jesus Christus is.
10 Maart
Glo vandag vir môre en oormôre
LEES
