ons God volkome sal vertrou en in die geloof sy pad sal loop. Onthou, waarheen God jou ook al mag stuur, Hy is in Christus Jesus sáám met jou daar. Hoe moeilik die pad ook al is, wees onvoorwaardelik gehoorsaam en jy sal die vreugde ken wat die deel is van dié wat onder die leiding van God se Gees wandel.
GEBED
Ek dank U, Vader, dat ek maar net in volkome gehoorsaamheid kan volg waar U my lei. Lei my tree vir tree.
Februarie
Liefdevolle Vader
Daar is maar 31 dae van hierdie jaar verby en reeds moet ek met skaamte voor U staan en bely dat heelwat van my goeie voornemens vir die nuwe jaar skipbreuk gely het; dat versuim oor soveel van my kosbare tyd geskryf kan word; dat ek meer tyd in gebed saam met U kon deurgebring het – om met U te praat, na U te luister; dat u Woord vir my kosbaarder kon gewees het sodat my lewe nou al van daardie rykdom kon getuig; dat ek nagelaat het om getrou u wil te soek en dit in gehoorsaamheid uit te voer. Here, dankie dat U nie alleen vergewe nie, maar dat U ook deur u Heilige Gees die begeerte in my wek om oorwinnend te lewe, U beter lief te hê, U meer nougeset te volg en meer getrou aan u wil te lewe. Dankie dat U, deur Jesus Christus, die ou dinge laat verbygaan en alles nuut maak. Lei my in hierdie maand deur u Gees en om Jesus Christus ontwil.
Amen
1 Februarie
Blye versekering
LEES Romeine 8:13–17
Hierdie Gees getuig saam met ons gees dat ons kinders van God is. En omdat ons kinders is, is ons ook erfgename. – Romeine 8:16
Dit is nie omdat ons sulke goeie mense is dat God ons gered en tot sy diens geroep het nie. Inteendeel, Hy het ons gered ten spyte van ons bedorwenheid en onbekwaamheid. Hy het in ons net sonde gevind; maar dit is die manier waarop sy almag werk. Hy werk met dowwe lamppitte en geknakte riete (sien Jes 42:3).
As ons voor God ons swakheid bely, gee ons die eerste tree na krag. As ons in ons swakheid op sy almag staatmaak, sal Hy ons leë lewe met sy wonderkrag vul. “My genade is vir jou genoeg. My krag kom juis tot volle werking wanneer jy swak is” (2 Kor 12:9).
Laat in geloof die Heilige Gees tot die binneste heiligdomme van jou lewe toe en Christus sal ’n besielende werklikheid in jou bestaan word. Behou onafgebroke gemeenskap met Hom. Dan groei die blye versekering dat jy onvervreembaar sy kind is, erfgenaam van sy krag en liefde. Wanneer die Gees hierdie getuienis in jou lewe laat deurbreek, word God ’n onmisbare werklikheid en lewe jy uit Hom, deur Hom en tot Hom!
GEBED
Meester, dankie dat ek deur u Heilige Gees kan jubel: “Blye verseekring, Jesus is myn, o, watter vreugde, heerlik en rein!” Ek loof en dank U daarvoor.
2 Februarie
Moenie God se liefde onderskat nie
LEES Psalm 106:1–12
Loof die Here, want Hy is goed, aan sy liefde is daar geen einde nie! – Psalm 106:1
Ons aanvaar dikwels die onbeperkte goedheid en liefde van God as vanselfsprekend. Dit het ’n gees van familiariteit met Jesus Christus laat ontwikkel, wat gevaarlik grens aan ’n gebrek aan eerbied. Gevolglik aanvaar ons die seëninge van God as ’n reg en nie as ’n voorreg nie en ons skenk weinig aandag aan die betuiging van dankbaarheid daarvoor.
Ek en jy mag nooit die belangrikheid van God se vergewende liefde onderskat nie. Dit het geëis dat Christus sy lewe moes offer sodat ons gered kan word. Nêrens anders sal jy só ’n groot liefde vind nie. Dit word gedurig oor jou uitgestort, afgesien van wie jy is en wat jy doen.
Die onbeskryflike grootheid van God se liefde is van só ’n enorme omvang dat ons dit nooit waardig kan wees of kan verdien nie. Hy hou nooit op om dit vir jou aan te bied nie – selfs al sou jy met tye om die een of ander rede van Hom wegdraai. Leef dus só dat jy hierdie groot liefde waardig sal wees.
GEBED
Ek buig voor U in ootmoed, o Heer. ’n Liefde so Goddelik wonderbaar eis alles: liggaam, siel én gees.
3 Februarie
Oorwin depressie
LEES Romeine 8:18–39
Maar in al hierdie dinge is ons meer as oorwinnaars deur Hom wat vir ons liefhet. – Romeine 8:37
Daar is besliste stappe wat jy in geloof kan neem om depressie te oorwin. Jy moet net gewillig wees om dit te doen.
Glo in die eerste plek dat God groter is as jou omstandighede en probleme en aanvaar die oorwinning in sy Naam. Dra al jou probleme en spanning in die gebed aan jou hemelse Vader op. Maak ’n lys van elke probleem in jou lewe. Glo onwrikbaar dat God ’n doel het met hierdie donker tydperk in jou lewe (vers 28). Moenie God weerstaan as Hy ook deur jou beproewing iets in jou lewe tot stand wil bring nie.
Besef dat jy nie altyd jou sin kan kry nie. Die aanvaarding van jou omstandighede is eintlik die aanvaarding van God se wil vir jou lewe. Frustrasie en bekommernis los geen probleme op nie. Soek iets waarvoor jy God kan dank en leef ’n lewe van lofsingende dankbaarheid voor God.
Bely en doen afstand van sondige dade en gedagtes. Bestudeer die Skrif. Dink soos ’n kind van God behoort te dink en tree soos een op. Dis ’n voorreg om ’n Koningskind te wees! Kyk weg van jouself na die wêreld rondom jou. Sien die doel van God in alles raak en ontwikkel ’n blymoedige gees.
GEBED
My siel smag na U, o God. Dankie dat U my nie verlaat nie, ook nie in donker oomblikke nie. Dankie vir die voorbeeld van Jesus Christus in Getsemane. Gee my genade om Hom na te volg.
4 Februarie
Wie vertrou ek met my droefheid?
LEES Psalm 37:1–11
Laat jou lewe aan die Here oor en vertrou op Hom; Hy sal sorg. – Psalm 37:5
Hoe groter die las is wat jy dra, hoe groter is jou behoefte aan iemand op wie jy onwrikbaar kan vertrou. Alleen die Almagtige kan aan hierdie hoë eis beantwoord. Vir iemand wat volkome op God vertrou, is alles moontlik.
God is vol deernis en medelye met jou en Hy los jou nooit nie – selfs nie in jou diepste droefheid nie. Sy wil vir jou is goed en Hy alleen kan kwaad in goed omskep, droefheid in blydskap, trane in lag. Die feit dat jy nie weet hóé Hy dit gaan doen nie, beteken nie dat jy Hom nie kan vertrou nie. God maak nooit ’n fout nie. Elke gebeurtenis op jou lewenspad voltooi ’n stukkie van sy groot legkaart vir jou lewe.
Een aspek wat droefheid en verlies opnuut beklemtoon, is jou onvermoë om te verstaan wat met jou gebeur en wat die toekoms vir jou inhou. Juis dan bring vertroue op God gemoedsrus en vrede. Hy sál sy plan uitvoer en jy sal uiteindelik in verwondering móét uitroep: “Hy het alles goed gedoen!”
GEBED
Here, ek lê myself en my droefheid en verwarring aan u voete neer met die stille geloofsvertroue dat u wil met my geskied.
5 Februarie
By die Here is jy veilig
LEES Psalm 4
Nou
