and the noise, though repressed, yet roused her. She woke, not, like most young people, with slow gradation of consciousness, but all at once was wide awake. She sat up in her chair.
"Was I snorin', laddie,'at ye leuch?" she asked, in a tone of slight offence.
"Eh, na!" replied Cosmo. "It was only 'at ye was sayin' something rale funny—i' yer sleep, ye ken—a queer jingle o' poetry it was."
Therewith he repeated the rime, and Grannie burst into a merry laugh—which however sobered rather suddenly.
"I dinna won'er I was sayin' ower thae fule words," she said, "for 'deed I was dreamin' o' the only ane I ever h'ard say them, an' that was whan I was a lass—maybe aboot thirty. Onybody nicht hae h'ard him sayin' them—ower and ower til himsel', as gien he cudna weary o' them, but naebody but mysel' seemed to hae ta'en ony notice o' the same. I used whiles to won'er whether he fully un'erstude what he was sayin'—but troth! hoo cud there be ony sense in sic havers?"
"Was there ony mair o' the ballant?" asked Cosmo.
"Gien there was mair; I h'ard na't," replied Grannie. "An' weel I wat! he was na ane to sing, the auld captain.—Did ye never hear tell o' 'im, laddie?"
"Gien ye mean the auld brither o' the laird o' that time, him 'at cam hame frae his sea-farin' to the East Indies—"
"Ay, ay; that's him! Ye hae h'ard tell o' 'im! He hed a ship o' 's ain, an' made mony a voyage afore ony o' 's was born, an' was an auld man whan at len'th hame cam he, as the sang says—ower auld to haud by the sea ony more. I'll never forget the luik o' the man whan first I saw him, nor the hurry an' the scurry, the rinnin' here, an' the routin' there,'at there was whan the face o' 'm came in at the gett! Ye see they a' thoucht he was hame wi' a walth ayont figures—stowed awa' somewhaur—naebody kent whaur. Eh, but he was no a bonny man, an' fowk said he dee'd na a fairstrae deith: hoo that may be, I dinna weel ken: there WAR unco things aboot the affair—things 'at winna weel bide speykin' o'. Ae thing's certain, an' that is,'at the place has never thriven sin syne. But, for that maitter, it hedna thriven for mony a lang afore. An' there was a fowth o' awfu' stories reengin' the country, like ghaists 'at naebody cud get a grip o'—as to hoo he had gotten the said siller, an' sic like—the siller 'at naebody ever saw; for upo' that siller, as I tell ye, naebody ever cuist an e'e. Some said he had been a pirate upo' the hie seas, an' had ta'en the siller in lumps o' gowd frae puir ships 'at hadna men eneuch to haud the grip o' 't; some said he had been a privateer; an' ither some said there was sma' differ atween the twa. An' some wad hae't he was ane o' them 'at tuik an' sauld the puir black fowk,'at cudna help bein' black, for as ootlandish as it maun luik—I never saw nane o' the nation mysel'—ony mair nor a corbie can help his feathers no bein' like a doo's; an' gien they turnt black for ony deevilry o' them 'at was their forbeirs, I kenna an' it maks naething to me or mine—I wad fain an' far raither du them a guid turn nor tak an' sell them; for gien their parents had sinned, the mair war they to be pitied. But as I was sayin', naebody kent hoo he had gethert his siller, the mair by token 'at maybe there was nane, for naebody, as I was tellin' ye, ever had the sma'est glimp o' siller aboot 'im. For a close-loofed near kin o' man he was, gien ever ony! Aye ready was he to borrow a shillin' frae ony fule 'at wad len' him ane, an' lang had him 'at len't it forgotten to luik for 't, er' he thoucht o' peyin' the same. It was mair nor ae year or twa 'at he leeved aboot the place, an' naebody cared muckle for his company, though a' body was ower feart to lat him ken he was na welcome here or there; for wha cud tell he micht oot wi' the swoord he aye carriet, an' mak an' en' o' 'im! For 'deed he fearna God nor man, ony mair nor the jeedge i' the Scriptur'. He drank a heap—as for a' body at he ca'd upo' aye hed oot the whisky-bottle well willun' to please the man they war feart at."
The voice of the old woman went sounding in the ears of the boy, on and on in the gloom, and through it, possibly from the still confused condition of his head, he kept constantly hearing the rimes she had repeated to him. They seemed to have laid hold of him as of her, perhaps from their very foolishness, in an odd inexplicable way:—
Catch yer naig an' pu' his tail; In his hin' heel ca' a nail; Rug his lugs frae ane anither—Stan' up, an' ca' the king yer brither.
On and on went the rime, and on and on went the old woman's voice.
"Weel, there cam' a time whan an English lord begud to be seen aboot the place, an' that was nae comon sicht i' oor puir country. He was a frien' fowk said, o' the yoong Markis o' Lossie, an' that was hoo 'he cam to sicht. He gaed fleein' aboot, luikin' at this, an' luikin' at that; an' whaur or hoo he fell in wi' HIM, I dinna ken, but or lang the twa o' them was a heap thegither. They playt cairts thegither, they drank thegither, they drave oot thegither—for the auld captain never crossed beast's back—an' what made sic frien's o' them nobody could imaigine. For the tane was a rouch sailor chield, an' the tither was a yoong lad, little mair, an' a fine gentleman as weel's a bonny man. But the upshot o' 't a' was an ill ane; for, efter maybe aboot a month or sae o' sic friendship as was atween them, there cam a nicht 'at brouchtna the captain hame; for ye maun un'erstan', wi' a' his rouch w'ys, an' his drinkin', an' his cairt-playin', he was aye hame at nicht, an' safe intil's bed, whaur he sleepit i' the best chaumer i' the castle. Ay, he wad come hame, aften as drunk as man cud be, but hame he cam. Sleep intil the efternune o' the neist day he wad, but never oot o' 's nain bed—or if no aye in his ain nakit BED, for I fan' him ance mysel' lyin' snorin' upo' the flure, it was aye intil 's ain room, as I say, an' no in ony strange place drunk or sober. Sae there was some surprise at his no appearin', an' fowk spak o' 't, but no that muckle, for naebody cared i' their hert what cam o' the man. Still whan the men gaed oot to their wark, they bude to gie a luik gien there was ony sign o' 'm. It was easy to think 'at he micht hae been at last ower sair owertaen to be able to win hame. But that wasna it, though whan they cam upo' 'm lyin' on's back i' the howe yon'er 'at luiks up to my daughter's bit gerse for her coo', they thoucht he bude to hae sleepit there a' nicht. Sae he had, but it was the sleep 'at kens no waukin—at least no the kin' o' waukin' 'at comes wi' the mornin'!"
Cosmo recognized with a shudder his favourite spot, where on his birthday, as on many a day before, he had fallen asleep. But the old woman went on with her story.
"Deid was the auld captain—as deid as ever was man 'at had nane left to greit for him. But thof there was nae greitin', no but sic a hullabaloo as rase upo' the discovery! They rade an' they ran; the doctor cam', an' the minister, an' the lawyer, an' the grave-digger. But whan a man's deid, what can a' the warl' du for 'im but berry 'im? puir hin'er en' thof it be to him' at draws himsel' up, an' blaws himsel' oot! There was mony a conjectur as to hoo he cam by his deith, an' mony a doobt it wasna by fair play. Some said he dee'd by his ain han', driven on til't by the enemy; an' it was true the blade he cairriet was lyin' upo' the grass aside 'im; but ither some 'at exem't him, said the hole i' the side o' 'im was na made wi' that. But o' a' 'at cam to speir efter 'im, the English lord was nane. He hed vainished the country. The general opinyon sattled doon to this,'at they twa bude till hae fa'en oot at cairts, an' fouchten it oot, an' the auld captain, for a' his skeel an' exparience, had had the warst o' 't, an' so there they faun' 'im.—But I reckon, Cosmo, yer father 'ill hae tellt ye a' aboot the thing, mony's the time, or noo, an' I'm jist deivin' ye wi' my clavers, an haudin 'ye ohn sleepit!"
"Na, Grannie," answered Cosmo, "he never tellt me what ye hae tellt me noo. He did tell me 'at there was sic a man, an' the ill en' he cam til; an' I think he was jist gaein' on to tell me mair, whan Grizzie cam to say the denner was ready. That was only yesterday—or the day afore, I'm thinkin', by this time.—But what think ye could hae been in's heid wi' yon jingle aboot the horsie?"
"Ow! what wad be intil't but jist fulish nonsense? Ye ken some fowk has a queer trick o' sayin' the same thing ower an' ower again to themsel's, wi'oot ony sense intil't. There was the auld laird himsel'; he was ane o' sic. Aye an' ower again he wad be sayin' til himsel','A hun'er poun'! Ay, a hun'er poun'!' It maittered na what he wad be speikin' aboot, or wha til, in it wad come!—i'
