Данило Смоленскии. Поставил же есть и церковь камену во имя святого архангела Михаила, юже украсил подписью и иконами и книгами, и златыми сосуды священными. Сзда же себе таковыи монастырь за дванадесять лет до своего си преставления. Самого себе в том монастыри повеле положити преставльшася, идеже есть и до ныне гроб его входя в церковь одесную олтаря. В чернци пострижеся двадесяти лет, а в чернечестве поживе 40 лет, а в митрополиты поставлен бысть 60 лет, а пребысть в митрополитех 24 лета и бысть всех днеи житья его лет 85.
В лето 1379 князь великии Дмитреи Иванович собра вои многи, и посла с ними брата своего князя Володимера Андреевичя, да князя Андрея Олгердовичя Полотского, да князя Дмитриа Михаиловичя Волынского, и иныя воеводы и велможи и бояре многые, и отпусти я месяца декабря в 9 день, в пяток, отрусти их ратью на Литовскыя городы и волости воевати. Они же сшедшеся взяша город Трубческыи и Стародуб и ины многы страны и волости и села тяжко плениша, и вси наши ыои, Рустии полци, цели бывше, приидоша в домы своя с многыми гостьмы.
В лето 1380 месяца июня в 15 день в неделю, священа бысть церкви соборная во имя святыя Троица в граде Серпохове, юже сзда христолюбивыи князь Володимер Андреевич.
В лето 1380 ордынский царь Мамай собрав вои многи поиде на великого князя Дмитрея Ивановича; то же слышав князь великий собра вои многи и поиде противу и стретошася за Доном на устье Непрядвы и бысть сеча зла, ака же не бывала в Руси и поможе Бог князю великому Дмитрею Ивановичу.
И тут убиени были князь Федор Романович Белозерский, сын его князь Иван, Семен Михайлович, Микула Васильевич, Михайло Иванович, Андрей Серкизов, Тимофей Волкй, Михайло Бренков, Лев Морозов, Семен Мелик, Александр и инии многие. Князь же великии Дмитрии Иванович с прочими князи русскими и воеводами став на косте и похвалив Бога и Богородицу возвратися в свою отчину победив свои враги.
В лето 1382 царь Токтамыш собрав вои многы, подвижася к Волзе с всею силою своею и с всеми своими безбожными полкы Татарскыми, и перевезся Волгу, поиде изгоном на великого князя Дмитриа Ивановичя и на всю землю Русскую. Татарове же, вземше Москву град, товар же имениа вся пограбиша, и по сем огнем пожгоша, град убо огню предаша, а людеи мечя предаша, и тако вскоре взяша град. А иную силу царь рвспусти по земли воевати, а иныя ходиша к Звенигороду, а иныи к Волоку и к Можайску, а иные к Дмитрову, а иную рать посла на Переяславль; и те, тамо жедше, взяша град Переяславль и огнем пожгоша.
А князь Володимер Андреевич, собрав воя многы около себе, и стояше ополчившеся близ Волока. И тамо неции татарове наехаша на нь; он же прогна их от себе. Они же прибегоша к Тактамышю царю пострашены и биты. Царь же, слышав, что князь великии на Костроме, а князь Володимер у Волока, поблюдашеся, чяя на себе наезда; того ради не много днии стояше у Москвы, но взем Москву, скоро отъиде. Царь же перевезеся за реку Оку и взять всю Разанскую землю, и огнем пожже,
