ongehoorsame. Wat is jy?
GEBED: “Here Jesus, U het u lewe gegee vir die hele wêreld. Ek is gewillig om deel van u span te wees. Wys my waar ek inpas.”
Lees vanaand in Handelinge 1:9–11 waarom ons seker kan wees dat Jesus weer gaan kom. Ons moet gereed wees vir daardie dag.
Vrydag 24 Februarie
Lees Handelinge 1:12–14.
Maria bid ook
Hulle het almal eensgesind volhard in die gebed saam met ’n aantal vroue, onder wie ook Maria die moeder van Jesus (Hand 1:14).
“Let op dat Maria een van die bidders is, nie die een wat aanbid word nie,” het wyle prof. Tobie aan ons in die Kweekskool geleer. Daar is baie mense wat tot Maria bid. Dit lyk asof hulle voel dat sy met meer liefde en verdraagsaamheid na hulle luister as die drie-enige God.
Ek wens soms ek kon daardie eerste bidure bywoon. Vir tien dae lank het die gelowiges elke dag saam gebid. Ons weet nie of hulle dag en nag gebid het, of net vir ’n uur of twee per dag nie. Maar aan die einde van daardie dae was hulle harte voorberei vir die wonderlike seën van vervulling deur die Heilige Gees. Ons kan dus verwag dat daar tye van sondebelydenis en van oorgawe was. Hulle het nog nie mooi geweet wat om te verwag nie, maar hulle het geweet dat hulle onmoontlik Jesus se opdrag kon uitvoer sonder die krag wat Hy belowe het.
Maria was ’n besondere vrou, wat reeds veel hartseer deurgemaak het. Van voor Jesus se geboorte af het sy skande, verwerping, hartseer en vreugde geken. Sy het dit regtig nie maklik gehad nie. Maar sy het ook na hierdie bidure gekom. Sy het ook die toerusting van die Heilige Gees nodig gehad. En as ons uiteindelik lees dat almal – elke man en vrou en kind – wat daar bymekaar was, deur die Gees vervul is, dan weet ons Maria was ook daar. En sy het ook met vrymoedigheid en krag die groot dade van God verkondig. Is jy ook gewillig om God se instrument te wees?
GEBED: “Dankie vir iemand soos Maria wat ons wys hoe ons moet optree om u wil te leer ken, Here, en toegerus te word om u groot dade te verkondig.”
Lees vanaand in Handelinge 1:15–26 hoe die leemte wat Judas Iskariot gelaat het, uiteindelik gevul is.
Saterdag 25 Februarie
Lees Handelinge 2:1–4.
Toegerus vir getuienis
Almal is met die Heilige Gees vervul en hulle het in ander tale begin praat soos die Heilige Gees dit aan hulle gegee het om onder sy leiding te doen (Hand 2:4).
“Ai, dit is darem jammer van daardie mense by Babel wat veroorsaak het dat ons vandag so baie verskillende tale op aarde praat. Dinge sou darem baie makliker gewees het as almal dieselfde taal gepraat het,” het ons vir mekaar gesê terwyl ons by die Taalskool met die ingewikkelde grammatika van Xhosa geworstel het. En hoekom gee die Here nie meer ander tale so maklik aan sy kinders soos op daardie eerste Pinksterdag nie?
Ek glo ons sal eendag in die ewigheid nog baie hieroor gesels, en dalk ook die antwoorde op hierdie vrae kry. Maar een ding is seker: Ons het vandag nog steeds die vrymoedigheid nodig wat net die Heilige Gees kan gee. Daardie eerste gemeente het geen geleerdheid gehad nie. Hulle was eenvoudige mense. Maar God kon hulle gebruik, want hulle was ten volle aan die Heilige Gees oorgegee. Kan dit wees dat die Here ook vandag vir jou en my wag om onsself ten volle en onvoorwaardelik aan die beheer van die Heilige Gees oor te gee, sodat Hy ons kan gebruik net waar en hoe Hy wil?
Die Bybel sê duidelik dat die Here ons nie net deur die bloed van Christus wil red nie, maar ons ook wil toerus met die krag van die Heilige Gees. Dit is nie net vir predikante en ander kerkleiers bedoel nie, maar vir elke gelowige. Slegs dít sal ons ’n gedugte span vir die Here kan maak. Kom ons bid daarvoor.
GEBED: “Here, gee ook aan ons die brandende begeerte om opnuut deur u Gees vervul te word. Rus ons toe vir ons taak.”
Lees vanaand in Handelinge 2:5–13 oor die hoor-wonder wat gebeur het, sodat almal tegelykertyd hulle moedertaal gehoor het.
Sondag 26 Februarie
Lees Psalm 38:1–12.
Tweede Lydensweek
Siekte wat skeiding bring
My siekte hou my familie en my vriende ver van my af, en my bure kom nie naby my nie (Ps 38:12).
“My dokter, wat ook my beste vriendin is, het my die skokkende nuus vertel. Die uitslag van die toets was dat ek MIV-positief is. En die werklikheid van verwerping het my platgeslaan toe sy nie haar plastiese handskoene uitgetrek het om my te groet nie,” vertel iemand wat met die MI-virus saamlewe. Skielik het sy soos ’n melaatse in die Bybelse tye gevoel. Sy kon hierdie ramp nie met ander deel nie, want almal sou haar begin verstoot en vermy. Niemand wou meer by haar kuier nie. Hulle wou nie dieselfde teekoppies as sy gebruik nie. Hulle wou nie aan haar raak nie. Onkunde oor die virus het haar ’n verstoteling gemaak.
Ons weet nie meer wat die siekte was wat Dawid in hierdie tyd gehad het nie. Dit was blykbaar as hoogs aansteeklik beskou. Maar hy sou baie empatie kon hê met mense wat in ons dag met MIV en vigs moet saamlewe. En sulke mense kan ook identifiseer met die gevoelens wat Dawid in hierdie psalm neergepen het.
Miskien is jy vandag ook in soortgelyke omstandighede. Jy kan nie vandag kerk toe gaan nie. Miskien is dit ook nie juis omdat jy so siek is nie. Jy voel net nie daar welkom nie. Jy voel ander mense se veroordelende oë op jou. Onthou, die Here het jou lief net soos jy is. Hy is by jou in hierdie oomblik. Hy wil jou vandag ontmoet en jou seën.
En as jy iemand ken wat tans hierdie swaar ervaar, dan weet jy mos wat jy vandag moet gaan doen. Reik uit, en gee liefde.
GEBED: “Here, ons bid vandag vir elkeen wat verstote en alleen voel. Help ons om u liefde aan hulle te betoon.”
Lees vanaand in Psalm 38:13–23 hoe Dawid geleer het om in slegte omstandighede op die Here alleen te vertrou.
Maandag 27 Februarie
Lees Handelinge 2:14–21.
Nuwe geesdrif gee hoop
“Ek sal my Gees uitstort op alle mense: julle seuns en julle dogters sal as profete optree; julle jongmense sal gesigte sien; julle oumense sal drome droom” (Hand 2:17).
“Die Bybel sê …” was Billy Graham se geliefkoosde woorde tydens sy preke. En duisende mense het die Here as Verlosser leer ken. Billy vertel dat hy in ’n tyd van groot vertwyfeling doelbewus gekies het om die gesag van die Bybel te aanvaar, en dat die Here hom daarna kragtig gebruik om mense na Christus te lei.
Dit is niks nuuts nie. Petrus, vol van die Heilige Gees, het ook die Bybel aangehaal om te verduidelik wat aan die gang was (Joël 2:28). Hy het verduidelik dat wat die mense sien en hoor die vervulling was van daardie profesie oor die laaste dae. (Die “laaste dae” het begin met die koms van die Messias, en sal eindig by sy wederkoms.) Die uitstorting van die Heilige Gees is nie net vir kerkleiers nie, maar vir kinders, jongmense en selfs bejaardes. Hulle sal almal geesdriftig wees oor die koms van die koninkryk van God. (Profete was mense wat God se boodskap oorgedra het, nie mense wat die toekoms kon voorspel nie.)
Verlang jy ook dat daar ’n nuwe openbaring van die krag van die Heilige Gees in ons dae sal plaasvind, wat
