van die volk se godsdiens word, wat ook die eenheid van die volk sou bevorder. Daar was nie streeksgode wat bykomend gedien moes word nie.
Sedert Christus gekom het, hoef ons nie meer te stry oor die regte plekke vir aanbidding nie. God is daar waar mense Hom deur die Gees en in waarheid aanbid (Joh 4:24). Daarom hoef ons nie vandag meer na Jerusalem te reis om met Hom te praat nie. Hy is nou hier waar jy hierdie woorde sit en lees. Kom ons geniet sy teenwoordigheid!
GEBED: “Here, U is so gans anders as die mensgemaakte gode. Help my om elke dag ’n lewende verhouding met U te bou.”
Lees vanaand in Deuteronomium 12:13–19 oor die rol van eetplekke in die godsdienstige lewe, en die feeste vir die Here.
Saterdag 21 Januarie
Lees Deuteronomium 12:20–32.
Alle godsdienste is nie gelyk nie
Moenie sê: “Hoe vereer hierdie nasies hulle gode? Ek sou dit ook so wou doen” nie (Deut 12:30).
“Hoe kan jy teen iets praat wat jy nog nie self ervaar het nie?” is die redenasie waarmee baie mense deur dwelms, drankmisbruik, okkultisme en satanisme gevang word. Mense is mos nuuskierig. “Ek wonder hoe dit voel.” “Is daar regtig so iets?” “Sê nou dit werk?” “Daar is tog niks mee verkeerd om glasie-glasie te speel, of om by ’n partytjie ’n Ouija-bord te gebruik nie?” “Ag toe, net een keer sal tog nie skade doen nie?” En so trap ons in die slagysters wat die duiwel vir ons stel.
Vir die Israeliete het daar ook baie slagysters in die pad gelê. Ongelukkig het hulle baie gou van Moses se waarskuwings vergeet, en keer op keer maar weer in afgodediens verval. En elke keer was die gevolg dat die Here hulle in die hande van hulle vyande oorgegee het. Ons lees hier van mense wat hulle eie kinders lewend verbrand het om hul afgode te dien (32) en selfs dít het later onder die Israeliete voorgekom (Jes 57:5).
“Maar Ma, almal maak tog so,” is al eeue lank die argument van kinders wat graag soos die ander wil wees. Groepsdruk is iets vreesliks, en ’n kind wil nie “uit” wees nie. Ons moet hulle dus deur ons voorbeeld en ons woorde help om te verstaan dat “almal” nie noodwendig reg is nie. Dis dom om altyd te wil wees en doen soos die ander doen. Die staat het besluit alle godsdienste is gelyk. God stem nie saam nie. Vir wie gaan ons vandag en môre luister?
GEBED: “Here, U is heilig en U is die enigste Here. Ek wil U alleen met my hele hart dien.”
Lees vanaand in Deuteronomium 13:1–10 hoe ernstig ons gewaarsku word teen profete, vriende of familie wat ons na dwaalleringe wil verlei.
Sondag 22 Januarie
Lees Psalm 35:1–10.
Die God van verdruktes
Here, wie is soos U wat die swakke bevry van dié wat sterker is, die swakke en die arme van dié wat hom beroof? (Ps 35:10.)
“Wat maak ek as onreg teenoor my gepleeg word?” is die vraag waarmee meer as een gelowige worstel. Dit gebeur soms dat ’n mens uitgebuit word, dat mense onredelike eise stel, dat jy voor die hof gesleep word en valslik aangekla word. Dit kan wees dat die hofuitspraak teen jou is, en dat jy die slagoffer van oneerlikheid word. Jy openbaar korrupsie, en in plaas daarvan dat jy bedank word, word daar nou teen jou gediskrimineer. Jy verloor jou werk deur regstellende aksie of omdat ’n ander maatskappy julle s’n uitkoop. En vandag gaan jy kerk toe met hierdie swaar las op jou hart.
Dawid het dit ook ervaar. Maar hy het geleer dat ’n mens met alles, ook die slegste dinge, na God toe kan gaan. Ons lees vandag hoe hy sy lot bekla en selfs God se straf op sy vyande afsmeek. Ons kan maar eerlik wees as ons met ons hemelse Vader praat. Hy ken ons deur en deur, en weet ook waarom Hy soms onreg toelaat. Maar Hy belowe dat alles vir ons ten goede sal meewerk, as ons Hom vertrou (Rom 8:28).
Ons kan dus vandag eerlik en vrymoedig vir die Here presies sê hoe ons voel. Hy is aan die kant van die verdrukte en die swakke, sê ons teksvers. Hy is aan jou kant, as dit is wat tans met jou gebeur. Ons kan Hom nou al in die geloof dank vir die uitkoms (Ps 35:9). En kom ons gaan loof Hom met ons hele hart, as uitdrukking van ons geloof. Daar by die kerk kan ons mekaar bemoedig en mekaar ondersteun.
GEBED: “Here, dankie vir tye wanneer dit nie goed gaan nie, want dit dryf my na U toe.”
Lees vanaand in Psalm 35:11–18 van die meineed, ondankbaarheid en spotlag van die goddeloses. Hoe moet ons daarop reageer?
Maandag 23 Januarie
Lees Deuteronomium 13:11–18.
Keer die kwaad
Die hele Israel moet dit hoor en bang word sodat so ’n verkeerde ding nie weer onder julle gedoen word nie (Deut 13:11).
“Bring asseblief die doodstraf terug,” het meer as 80% van die deelnemers gestem tydens ’n opname ’n ruk gelede. Hulle glo vas die misdaadvlaag en moord-epidemie het begin toe die doodstraf afgeskaf is. In die “goeie ou dae” was moorde iets uitsonderlik en skaars. Nou word daar elke dag meer as 50 mense vermoor, en feitlik nie een van die moordenaars word ooit aangekeer nie. En selfs al word hulle gevang en skuldig bevind, kry hulle dan ’n heerlike vakansie op die belastingbetaler se onkoste – altans, dit is wat die meeste mense blykbaar dink. Is die dreigement van doodstraf wel ’n afskrikmiddel?
In Deuteronomium is Moses nog steeds besig om die volk te vermaan om die Here alleen en voluit te dien. Vals profete en ander mense wat afgodediens bepleit, moet summier tereggestel word. Dalk sal dit die volk op die regte pad hou. Ongelukkig het dit toe nie gewerk nie. Miskien omdat dié wette nie noukeurig toegepas is nie, of miskien omdat die mens se sondigheid hom nie laat afskrik nie.
Wat is die beste manier om die misdaad in ons land te bestry? Meer tronke bou? Meer wette? Meer diefwering en meer veiligheidswagte? Sal ’n kragtige herlewing nie ’n beter oplossing wees nie? In die Transformations-video word vertel van streke in Suid-Amerika waar misdaad verdwyn het en tronke leeg staan omdat mense se harte verander het. Ook in die groot herlewing in Wallis het die polisie skielik sonder werk gesit, en het toe maar kore gevorm wat in die gemeentes kon gaan optree.
GEBED: “Here, ons bid U om weer ’n kragtige herlewing te stuur.”
Lees vanaand in Deuteronomium 14:1–21 hoe die volk van die heidense volke moes verskil, selfs in hulle dieet.
Dinsdag 24 Januarie
Lees Deuteronomium 14:22–29.
Die beste belegging
As jy dit doen, sal die Here jou God jou voorspoedig maak in alles wat jy aanpak (Deut 14:29).
“Waar is die beste plek om my pensioengeld vir my oudag te belê?” het ek gewonder toe die tyd vir aftrede naderkom. Mense het met allerhande voorstelle gekom, soos: “Vaste eiendom gee die beste sekuriteit, want niemand kan grond wegdra nie.” So gesê, so gedaan, en toe gaan die beleggingsmaatskappy bankrot en alles is daarmee heen, vaste eiendom of nie. Swak belegging!
In Moses se dae was daar geen pensioenskema nie. Elkeen moes maar vir homself voorsiening maak, want daar was geen banke nie. Dit het dus maar swaar gegaan met weduwees en wese wat nie eiendom besit het nie, en dus nie kos kon produseer nie. Die Leviete het ook nie plase gekry nie, maar moes lewe van die tiendes van die ander Israeliete, omdat hulle
