begeerte het om te bid nie, maar dikwels kom dit eerder aan op geen tyd nie, eerder as geen begeerte nie. Hierdie mense kan beskryf word as selfonderhoudend, talentvol en goeie bestuurders van hul tyd. Die enigste tyd wat in so ’n besige mens se besige skedule aan die Here afgestaan word in gebed, is Sondag tydens die erediens. Tog roep hulle die Here aan wanneer daar ’n krisis is en wanneer hulle Hom dringend nodig het. Hierdie mense moet onthou dat al hul bekwaamhede en talente beperk word sonder ’n gesonde en sterk verhouding met die Here Jesus.
Ek het nie genoeg tyd om te bid nie
Tyd word deur die Here aan ons gegee, en ook elke asemteug wat ons neem. Dit is alles in God se hande. As ’n mens tyd inruim om met die hemelse Vader te praat, sal Hy jou tyd vermeerder. Hy sal jou toerus om jou prioriteite te orden en vir jou meer tyd teruggee as wat jy dink moontlik is. As jy te besig is om te bid, is jy te besig om te leef!
Dit is moeilik om vroeg op te staan
Min mense hou daarvan om vroegoggend te bid. Die meeste van ons beskou dit as uiters moeilik. Ons almal weet hoe swak die vlees kan wees, maar die Gees binne jou smag daarna om tyd met die Vader deur te bring. Dit is nie maklik nie, maar met toewyding en opoffering is dit beslis die moeite werd.
Ek weet nie hoe om te bid nie
Moet jou nie te veel kwel oor hoe om te bid nie. Gebed is niks meer of minder as ’n lieflike gesprek met jou hemelse Vader nie. Wanneer jy die Woord bid, sal dit jou al die nodige leiding gee wat jy nodig het om te leer hoe om te bid.
Of ons daarvan hou of nie, om te vra is een van die reëls van die koninkryk.
– Charles Spurgeon
In gebed verskuif ons die fokus vanaf selfgesentreerdheid na prysgee van die self.
– Abraham Joshua Heschel
Hoe moet ons bid?
Onthou dat die vyand van jou siel, Satan, jou sal probeer oortuig dat jou gebede nie verhoor word nie. Hy sal poog om jou fokus van God af weg te neem en dit op jou probleem te plaas. Hy sal probeer om jou te laat praat soos iemand wat onseker is of sy of haar gebede verhoor word. Indien hy sou slaag om jou mond opnuut met twyfel te vul, sal hy jou gebede waardeloos maak. Waak dus oor jou hart en jou mond en weerstaan die versoeking om negatief te praat oor sake wat jou of ander raak.
Wees vasberade en neem die beheer oor jou denke oor. Dink aan positiewe dinge (vgl. Fil 4:6-9). Deur God te loof en sy Woord voortdurend te bely, kan jy elke gedagte verwerp wat jou gebedslewe kan benadeel. Hierdie gedagtes is soms maar net die insprake van die vyand wat jou gebedslewe wil ondermyn. Hou dus aan om te bely wat die Woord omtrent jou behoeftes sê. “Laat ons die belydenis van die hoop onwankelbaar vashou, want Hy wat dit beloof het, is getrou” (Heb 10:23). “En omdat ons dieselfde Gees van die geloof het – soos geskrywe is: Ek het geglo, daarom het ek gespreek – glo ons ook, daarom spreek ons ook” (2 Kor 4:13).
God het Abraham aangemoedig om sy nageslag te sien soos die sterre aan die hemelruim lank voordat daar enige nageslag was. Die Here sal dalk vir jou ’n prentjie van só ’n uitkoms gee waaraan jy kan vashou. Dit sal jou geloof aanvuur en jou help om jou gebede te fokus. Moet niks sê wat hierdie gesig teëspreek nie, want dit is ongeloof wat jou dit laat doen.
Tree in ooreenstemming met jou geloof en jou belydenis op (vgl. Jak 2:17). Wees voorbereid vir die verwesenliking van die antwoord op jou gebed. Kyk byvoorbeeld na Markus 6:39-40 waar Jesus in volle verwagting van sy beantwoorde gebed optree om die vermenigvuldigde brood en visse te laat uitdeel. Wanneer Jesus opdrag gee dat die klip voor Lasarus se graf weggerol word, is dit met die wete dat sy versoek gehoorsaam sal word (vgl. Joh 11:39).
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.
