style="font-size:15px;"> As jy vandag terugkyk op jou lewe, sal jy ook aan bakens kan dink waar die Here met jou gewerk het. Hy skaaf nou nog aan jou en rus jou toe vir die werk wat Hy deur jou wil doen. Het jy lus vir aftree of vir optree?
GEBED: Here, gebruik my ook vandag in u diens.
Lees vanaand in 1 Samuel 8:1-9 waarom die Israeliete ’n koning begeer het en wat God se antwoord daarop was.
Saterdag 7 Maart 2015 • Lees eers 1 Samuel 8:10-22
Sleg gekies
Daardie dag sal julle om hulp roep vanweë julle koning vir wie julle verkies het, maar dan sal die Here julle nie antwoord nie (8:18).
GESELSVRAAG:
Watter soort regering wil ons graag hê?
“Suid-Afrika is een van 12 lande in die wêreld waar ’n mens met vrymoedigheid water uit die kraan kan drink.” Dit is ongelukkig nie oral meer waar nie. Op talle dorpe is daar groot probleme met die watertoevoer en waterveiligheid. Die rioolstelsels werk byvoorbeeld nie meer nie en rou riool word in die riviere en damme gestort. Die mense wat aangestel is om dit te behartig, het eenvoudig nie die bekwaamheid en kennis om dit in stand te hou nie. Dit is een van die nadele van ’n demokrasie wat stem volgens stam en velkleur en nie volgens bekwaamheid nie.
Samuel waarsku in vandag se gedeelte die volk teen die nadele van ’n koning. Hy sal sy volk uitbuit tot sy eie en sy binnekring se voordeel. Hy sal die meerderheid van die bevolking sy slawe maak. Hý sal besluit wat hulle mag en nie mag doen nie. As jy ’n koning het, het jy nie meer vryheid nie. En tog kies die volk halsstarrig dat hulle ’n koning soos die ander volke wil hê.
Ons het die vryheid om elke dag keuses te maak. Maar ons moet onthou dat elke keuse ook ’n gevolg het. As ons verkeerd kies, sal ons dit berou. As ons reg kies, sal ons daaroor bly en dankbaar wees. Wees dus op jou hoede vandag.
GEBED: Here, help my om vandag reg te kies.
Lees vanaand in 1 Samuel 9:1-8 hoe dit gekom het dat Saul die eerste koning van Israel geword het.
Sondag 8 Maart 2015 • Lees eers Psalm 31:20-25
God se goedheid
Hoe groot is u goedheid: dit is altyd daar vir dié wat U dien, U bewys dit voor die oë van die mense aan dié wat by U skuil (31:20).
GESELSVRAAG:
Vir watter goeie dinge kan ons God vandag dank?
“Ons is geneig om al die slegte dinge wat met ons gebeur, raak te sien en ons daaroor te ontstel. Maar ons vergeet dat baie meer goeie dinge met ons gebeur. Ons sien dit nie raak voordat ons dit verloor nie.” Is dit nie waar nie? Jy dink nie eens aan die gawe om te kan loop nie, totdat jou bene seer word of ingee. Jy dink nooit aan jou hart nie, totdat hy begin probleme gee. Jou spysvertering word vanselfsprekend aanvaar, totdat jy maagpyn of iets erger kry.
Dawid het ook al die slegte dinge wat met hom gebeur, raakgesien. Maar daarmee saam het hy die goedheid van God raakgesien. Hy het altyd iets gekry waarvoor hy die Here kon loof en dank. Hierdie psalm is in ’n tyd van stryd en teëspoed geskryf, maar dit eindig met ’n loflied.
Vandag kry ons weer ’n kans om stil te word saam met die Here en sy gemeente. Kom ons berei ons daarvoor voor deur te dink aan al die seëninge wat die Here ons hierdie week gegee het. Kom ons deel dit dan met blydskap met mekaar. Ons almal wil ’n slag goeie nuus hoor. Maar ons wil dit nie net vir mekaar vertel nie, ons wil dit ook vir die Here vertel. Ons wil Hom vandag daarvoor loof en dank.
GEBED: Here, dankie vir al u goedheid en voorsiening. Help ons om hierdie week die goeie dinge raak te sien en U daarvoor te dank.
Lees vanaand in Psalm 32:1-5 hoe Dawid ons daaraan herinner dat die grootste gawe van God vergifnis om Jesus ontwil is.
Maandag 9 Maart 2105 • Lees eers 1 Samuel 9:9-17
Luister goed
Dit is die man van wie Ek jou gesê het hy sal oor my volk regeer (9:17).
GESELSVRAAG:
Hoe weet ons wat die Here vir ons wil sê?
“Die ene bene,” het Saul se ma seker van hom gesê toe sy sien hy groei heelwat langer as sy portuurgroep. Saul was baie bewus van sy lengte en het probeer krom loop sodat hy nie so opmerklik was nie. Hy het nie ’n goeie selfbeeld gehad nie, soos ons sal sien. Maar God het ’n plan met elke mens. Ook met Saul. Saul het goed begin. Hy was nederig. Hy was nie hoogmoedig nie. Hy het hom deur sy slaaf laat lei en help.
Samuel het die gawe ontwikkel om God se leiding duidelik te hoor. Die Here het met hom gepraat sedert Hy hom daardie nag in die heiligdom ontmoet het. Hy het bekend gestaan as die siener – vandag sou ons sê die profeet – wat die regte boodskap by die Here ontvang het en kon oordra. Hy het dus gehoor toe die Here hom vertel dat hierdie skaam vreemdeling op soek was na sy pa se donkies, dat die donkies reeds gekry is, maar dat die eintlike rede waarom hy daar beland het, was om as koning van Israel aangewys te word.
Vir Saul was dit die begin van ’n besondere lewenslange verhouding met Samuel. Toe Saul verkeerd gekies het, het Samuel hom aan Saul onttrek, maar Saul het selfs ná Samuel se dood steeds raad by hom gaan soek.
GEBED: Here, ek verlang na ’n innige verhouding met U.
Lees vanaand in 1 Samuel 9:18-27 hoe Samuel voorbereidings getref het vir dié ontmoeting met Saul. Hy het geweet.
Dinsdag 10 Maart 2015 • Lees eers 1 Samuel 10:1-8
Geseën vir diens
Wanneer hierdie tekens oor jou kom, moet jy doen wat jou hand vind om te doen, want God is by jou (10:7).
GESELSVRAAG:
Waar is die grootste nood in jou omgewing?
“As ek vroeg in die oggend deur die dorp gaan stap, hinder dit my hoe vuil ons strate en parke is. Ek het gevoel dat iemand iets daaraan moet doen. Toe besef ek dat ek ook iemand is.” Nou gaan stap sy elke oggend met ’n swart sak en tel al die rommel op. Teen die tyd dat die ander mense opstaan, is Kerkstraat skoon. ’n Groep vroue het vasgestel dat baie kinders honger skool toe kom omdat hul ouers drankprobleme het. Hulle het vir die kinders kospakkies begin opmaak. So is daar ’n ellelange lys van mense wat begin doen het wat hul hand vind om te doen.
Saul se mond het seker oopgehang toe hy hoor wat alles daardie dag met hom sou gebeur en veral toe dit werklik gebeur. Dit was vir hom die teken dat God vir hom ’n hoë roeping gehad het. Hy moes ’n verskil maak. Hy kon nie meer by sy eie gerief en sy pa se donkies vashaak nie.
Die Here het ook vir ons elkeen ’n roeping. Wat het Hy aan jou gewys? Waar is die nood? Wat kan jy, of jy en jou vriende, daaraan doen? Ons gemeente het meer as 40 projekte wat deur vrywillige lidmate bestuur en behartig word. Hoe kan ek en jy hierdie pragtige land waarin ons woon beter maak? Die Here het werk vir jou.
GEBED: Here, maak my gewillig om u roepstem te gehoorsaam.
Lees vanaand in 1 Samuel 10:9-16 dat alles wat Samuel voorspel het, waar geword het.
Woensdag 11 Maart 2105 • Lees eers
