Lees eers Handelinge 1:1-5
JESUS LEEF!
Ná sy dood het Hy aan hulle met baie onbetwisbare bewyse ook getoon dat Hy lewe (1:3).
GESELSVRAAG: Watter verskil maak dit dat Jesus regtig leef?
“Ai, as Jesus maar net vandag nog hier op aarde geleef het, sou ek my probleem na Hom toe geneem het. Hy sou my dan genees.” Het jy ook al so gedink? Maar Hy is mos hier by ons, al kan ons Hom nie sien nie. Sy Naam is nie verniet Immanuel – God by ons – nie. Hy belowe om altyd by sy kinders te wees (vgl. Matt 28:20). “My God is not dead – sorry about yours” staan op ’n bekende sendeling se tassie geskryf. Hy kon keer op keer getuig hoe die Here vandag nog wonderlike dinge doen.
“En as Christus nie opgewek is nie, is ons prediking sonder inhoud en julle geloof ook sonder inhoud,” skryf die apostel Paulus (1 Kor 15:14). As die opstanding van Jesus dan so belangrik is, is dit geen wonder dat dit die sentrale boodskap van die boek Handelinge is nie. Feitlik al 23 toesprake wat in Handelinge opgeteken is, gaan daaroor dat Jesus weer opgestaan het. Daarom kan ons verwag dat die vyand alles in sy vermoë wil doen om ons te laat twyfel of Jesus werklik leef.
Kom lees dus saam met my die boek van Die Handelinge van die Apostels en kyk of jy dan nog kan twyfel of Jesus werklik uit die dood opgestaan het.
GEBED: Dankie dat U werklik leef, Here Jesus. Ek wil U in die volgende maande beter leer ken.
Lees vanaand in Handelinge 1:6-8 vir wie die Here deur die Heilige Gees sal bekragtig om oral sy getuies te wees.
SONDAG 26 FEBRUARIE 2017 Lees eers Psalm 119:129-136
U WOORD GEE LIG
Wanneer u woord vir mense oopgaan, bring dit lig; dit gee insig aan dié wat nog onervare is (119:130).
GESELSVRAAG: Wanneer het ’n mens lig nodig?
“Wat het die mense in Suid-Afrika voor kerse gebruik om lig te maak? Elektrisiteit!” was een van die grappies wat die ronde doen terwyl Eskom die een dorp na die ander in duister dompel. Dan ontdek ons opnuut hoe afhanklik ons van elektrisiteit geword het. Daarsonder kan ons omtrent geen werk doen nie. Hoe het ons voorouers dit reggekry om sulke wonderlike handwerk by kerslig te doen? Kon hulle dalk beter in die donker sien?
Ons het elke dag ook ’n ander soort lig nodig, want ons moet daagliks keuses maak en besluite neem. Wat is die regte ding om te doen? Dit is waar die Bybel ons wil help. Al die verhale wat hierin opgeteken is, wil ons leer hoe om reg te kies. Hoe kan ons ons kinders toerus vir hierdie gevaarlike wêreld? Dalk is die Bybel net wat hulle hul hele lewe lank gaan nodig kry. Ons moet die belangrike lesse van God se Woord elke dag aan hulle leer. Op skool en universiteit kry hulle meermale met verkeerde invloede te doen. Die groepsdruk is erg. Die Bybel wys ons ’n ander manier van leef.
Vandag sal gelowiges oor die hele wêreld om God se Woord bymekaarkom. Ons almal sal God se leiding soek oor hoe om elke dag se uitdagings en krisisse te hanteer. Moenie dit misloop nie.
GEBED: Dankie dat U ons nie in die duister gelaat het nie, Here. Dankie vir u kosbare Woord wat ons elke dag lei.
Lees vanaand in Psalm 119:137-144 hoe die Bybel ons wil leer wat reg en regverdig is.
MAANDAG 27 FEBRUARIE 2017 Lees eers Handelinge 1:9-11
JESUS KOM WEER
Hierdie Jesus wat van julle af na die hemel toe opgeneem is, sal net so terugkom soos julle Hom na die hemel toe sien opgaan het (1:11).
GESELSVRAAG: Vir wie wil jy graag eendag (weer) ontmoet?
“Ek wonder hoe die nuwe hemel en die nuwe aarde gaan werk. Alles sal so anders wees. Sal ons ook, soos Jesus, nie meer aan swaartekrag onderworpe wees nie?” noem iemand in ’n Bybelstudiegroep. Die Bybel sê ons sal ’n liggaam soos Christus ontvang (vgl. Fil 3:21). Dit sal waarskynlik iets wees ver bo wat ons ons kan indink.
Die vreemdelinge in wit klere help die dissipels om terug te kom aarde toe. Hulle het seker oopmond staan en kyk wat bo hul kop aan die gebeur was. Hulle het besef dat Jesus Iemand heel anders as ’n gewone mens is. ’n Kommentator sê die engele het hulle daaraan herinner om op hul knieë te val en Hom te aanbid, want Hy is God. Dit is onvanpas om te staan.
Jesus het weggegaan sodat Hy vir altyd by elkeen van sy volgelinge kan wees. Ons hoef nie na Jerusalem te reis om met Hom te praat nie. Jy kan dit sommer vandag doen, net daar waar jy is. Hy is nou daar by jou. Hy is alomteenwoordig. Maar eendag sal Hy weer fisiek en sigbaar na die aarde terugkeer. Die Bybel vertel dat Hy weer op die wolke sal terugkom. Elkeen van ons sal dit sien. Dié wat reeds gesterf het, sal opstaan. Die lewendes sal ook verander word om Hom terug te verwelkom (vgl. 1 Tess 4:16-17).
GEBED: Here Jesus, dankie dat ons kan weet dat U op pad terug is.
Lees vanaand Handelinge 1:12-14 en let op wie almal onder die bidders in die bovertrek is.
DINSDAG 28 FEBRUARIE 2017 Lees eers Handelinge 1:15-26
DIE BINNEKRING
Daar moet dus nog ’n getuie van Jesus se opstanding by ons gevoeg word (1:21).
GESELSVRAAG: Waarom moet ’n groot organisasie ’n dagbestuur hê?
“Wie onder ons kan ook getuig dat Jesus werklik uit die dood opgestaan het?” was die toets vir iemand om ’n apostel te word. Judas Iskariot het hierdie voorreg vir 30 silwerstukke verkoop. Hy het alles verloor. Maar soos daar 12 stamme is, so moet daar 12 apostels wees. Wie kan dit wees? Hulle kies toe vir Mattias.
Dit is interessant dat dit nie gaan oor wie kan getuig dat Jesus aan die kruis gesterf het nie. Baie kon dit doen. Dit moes iemand wees wat getuie was van alles wat gebeur het sedert Jesus gedoop is totdat Hy na die hemel opgevaar het. Hy moet die opgestane Jesus self gesien het, want die geloof in sy opstanding vorm die kern van die evangelie (vgl. Rom 10:9-10). Paulus knoop sy apostelskap ook daaraan dat Hy Jesus ná sy opstanding gesien het (vgl. 1 Kor 9:1). Sover ons weet, is daar nooit weer ’n ander apostel gekies om iemand op te volg wat gesterf het nie.
Hoe kan ons weet watter van die vele strome in die teologie betroubaar is? Baie mense trek deesdae die gesag van die Skrif, die maagdelike geboorte en Christus se opstanding in twyfel. Petrus sou ons hiermee kon help: Wie getuig dat Jesus werklik uit die dood opgestaan het? Dít is die groot toets.
GEBED: Here Jesus, dankie vir hierdie groep gelowiges wat kon getuig dat U werklik leef.
Lees vanaand in Handelinge 2:1-4 hoe die Heilige Gees die eerste keer op die dissipels uitgestort is.
WOENSDAG 1 MAART 2017 Lees eers Handelinge 2:5-13
MOEDERTAAL
Hoe hoor elkeen van ons dan sy eie moedertaal? (2:8).
GESELSVRAAG: In watter taal voel jy die meeste tuis?
“Hoekom praat ons van ons vaderland, maar van ons moedertaal?” skerts ’n vriend. Dit is seker omdat ons ons eerste taalervaring hoofsaaklik van ons moeders kry. “Dit lyk my dat mense hul hartstaal verkies wanneer dit by geestelike sake kom,” verduidelik iemand.
Die
