vee haar trane af en vat Carl se hand.
“En jy, Hanna?” vra die berader. “Wanneer het jy hom laas gesien?”
“Ek het hom ná skool huis toe gebring. Vir hom ’n toebroodjie gemaak.” Haar keel kramp toe.
“Jammer om te pla.” Inspekteur Lourens hou sy hand na Carl uit. “Sal u omgee as ons net ’n voorlopige verklaring afneem? Ons is amper klaar hier.”
Carl vryf oor sy gesig. “Kan dit nie bietjie wag nie?”
“Ons kan môre of oormôre ’n volledige verklaring by julle kry.” Die inspekteur haal ’n pen uit sy sak en slaan ’n boekie oop. “Hierdie is net sodat ons solank die saaknommer kan registreer. Was daar enigiets wat volgens julle opinie aanleiding kon gee tot julle seun se selfdood?”
Carl vou sy arm om Hanna se skouers. “Nie waarvan ek bewus was nie.”
Sy skud net haar kop toe die vraende blik na haar draai.
“En julle verhouding met hom, was dit goed?”
Carl knik. “Ons het maar ons haakplekke gehad. Niks buitengewoon sleg nie.”
“Het hy die afgelope tyd probleme by die skool gehad? Soos met vriende, of skoolwerk, dalk ’n meisie wat hom gelos het?”
“Nie waarvan ons weet nie,” antwoord Carl. “In die laerskool was hy geboelie, maar dit het in die hoërskool opgehou.”
“Het hy depressief voorgekom?”
“Nee. Hy was soms buierig, hormone is mos maar ’n probleem op hierdie ouderdom, maar hy het ons gerespekteer. Hy was oor die algemeen nie ’n rebel of ’n moeilike kind nie.”
“Was hy ooit by ’n berader vir depressie?”
“Nee, Divan was ’n gelukkige kind.”
Hanna sit vorentoe. “Hy het maklik in sy dop gekruip, maar vanoggend was hy in ’n goeie bui.”
“Wanneer was die laaste keer wat elkeen van julle met hom in kontak was?”
Carl laat rus sy elmboë op sy knieë. “Ek het hom vanoggend voor werk gesien.”
“Twintig minute voor ek huis toe gekom het,” sê Hanna. “Oor die telefoon.”
“Het hy toe iets laat blyk van sy plan?”
Sy sluk. “Nee, niks.”
Die inspekteur maak sy boekie toe. “Goed, dis eers al vir nou. Ons het in sy kamer rondgekyk, ons gaan sy selfoon saamneem vir verdere ondersoek. Het hy ’n rekenaar gehad?”
Hanna skud haar kop. Hieroor het sy altyd sterk gevoel. “Nee, Divan doen sy take op my laptop.”
“Ek sal dit tog wil saamneem, asseblief. Ek sal dit so gou moontlik aan u terugbesorg.” Die inspekteur huiwer ’n oomblik. “Ons het ’n brief in sy boonste lessenaarlaai gevind.”
Hanna se hart trek saam. “Ek wil dit sien.”
“Ek kan dit ongelukkig nie nou vir julle gee nie, dis ’n bewysstuk wat eers geprosesseer moet word. Maar ons sal vir julle ’n kopie maak. Die oorspronklike moet ons uit die aard van die saak hou.”
Twee mans stap by die oop voordeur in. “Goeienaand,” groet hulle.
Die voorste een draai na inspekteur Lourens. “Julle het laat weet dat ons die liggaam kan kom haal?”
Die inspekteur knik. “Laat ek net doodseker maak almal is klaar.”
Hanna skrik op uit haar dwaal. “Waarheen vat julle hom?”
“Na die polisielykshuis in Tygerberg, mevrou,” sê die ander man.
“Wat gaan nou met hom gebeur?” vra sy, alhoewel sy nie regtig wil weet nie.
“Hulle gaan ’n geregtelike doodsondersoek doen, vir die post mortem-verslag. Môremiddag eenuur moet julle asseblief daarheen kom om die liggaam uit te ken. Bring ook sy ID saam, dis baie belangrik.”
“Ons is klaar,” inspekteur Lourens kom staan weer langs die man. “Julle kan hom maar neem.”
Hanna probeer genoeg lug in haar longe trek om haar staande te hou. Sy stap agter Carl aan tot in die motorhuis. Sy staan versteen en kyk hoe hulle Divan in ’n wit sak toerits.
Los ’n opening, hy gaan sukkel om asem te kry! wil haar hart skree, maar haar tong is stom.
27 Augustus 2015
5 Elemente van ’n goeie grap:
(Uitgevoer deur grapjasse soos Eugene, A.J. ens.)
1. Onderwerp = dit waaroor die grap gaan (As o/werp se inhoud snaaks is nog beter)
= Hoofonderwerp: Divan Klopper (EK)
= byonderwerp: looks: tande, ore, neus, lengte (te kort)
= byonderwerp: titel: gay, stupid, pliggie
= byonderwerp: aktiwiteite: sport – USELESS
2. Timing = highlight die punch line met regte timing
= In besige skoolgange, tussen die A-span ouens op die speelgrond, agter onderwyser se rug, op die hokkieveld net na ’n score
3. Drama = Gebruik handgebare om grap te versterk
= trip, stamp, hand signs
= gooi onderwerp rond binne ’n stywe kring A-span ouens (groot gunsteling)
= uitlag en almal nooi om saam te lag (groot gunsteling)
4. ’n Groter boodskap = jou existence pla my!
5. Elke woord wat gebruik word maak saak
NB: Dit help nie om die grap oor te vertel nie. Mense vang dit nie
5
Katrien skuif haar boeke weg. Dis al donker buite en haar maag gor van die honger, maar sy tel eers haar selfoon op. Dit het die afgelope vyf minute kort-kort vibreer van nuwe whatsapps wat inkom. Net Daniëlle spam haar só as sy haar aandag wil trek.
Dis nie Daniëlle nie, sien sy teleurgesteld, maar die klasgroep. Met twaalf nuwe whatsapps. Sy klik daarop, al weet sy dit sal tog net iemand wees wat gevra het watse huiswerk hulle moet doen.
Divan het vanmiddag selfmoord gepleeg.
Haar wange slaan aan die brand. Sy lees verder.
No ways.
Hoe het hy dit gedun?
Weenie, seker
