for he killed him, or wha's faut was that same: aboot a' that, naething was ever kent for certain.
"Weel, it was an awfu' like thing, ye may be sure, to quaiet fowk, sic as we was a'—'cep' for the drinkin' an' sic like, sin' ever the auld captain cam, wi' his reprobat w'ys—it was a sair thing, I'm sayin', to hae a deid man a' at ance upo' oor han's; for, lat the men du 'at they like, the warst o' 't aye comes upo' the women. Lat a bairn come to mischance, or the guidman turn ower the kettle, an' it's aye,'Rin for Jean this, or Bauby that,' to set richt what they hae set wrang. Even whan a man kills a body, it's the women hae to mak the best o' 't, an' the corp luik dacent. An' there's some o' them no that easy to mak luik dacent! Troth, there's mony ane luiks bonnier deid nor alive, but that wasna the case wi' the auld captain, for he luikit as gien he had dee'd cursin', as he bude to du, gien he dee'd as he lived. His moo' was drawn fearfu', as gien his last aith had chokit him. Nae doobt they said 'at wad hae't they kent,'at hoo that's the w'y wi' deith frae slayin' wi' the swoord; but I wadna hear o' 't; I kenned better. An' whether he had fair play or no, the deith he dee'd was a just ane; for them 'at draws the swoord maun periss by the swoord. Whan they faun' 'im, the richt ban' o' the corp was streekit oot, as gien he was cryin' to somebody rinnin' awa' to bide an' tak 'im wi' 'im. But there was anither at han' to tak 'im wi' 'im. Only, gien he tuik 'im that same nicht, he cudna hae carried him far. 'Deed, maybe, the auld sinner was ower muckle aven for HIM.
"They brocht him hame, an' laid the corp o' him upo' his ain bed, whaur, I reckon, up til this nicht, he had tried mair nor he had sleepit. An' that verra nicht, wha sud I see—but I'm jist gaein' to tell ye a' aboot it, an' hoo it was, an' syne ye can say yersel's. Sin' my ain auld mither dee'd, I haena opent my moo' to mortal upo' the subjec'."
The eyes of the two listeners were fixed upon the narrator in the acme of expectation. A real ghost-story, from the lips of one they knew, and must believe in, was a thing of dread delight. Like ghosts themselves, they were all-unconscious of body, rapt in listening.
"Ye may weel believe," resumed the old woman after a short pause, "at nane o' 's was ower wullin' to sit wi' the corp oor lane, for, as I say, he wasna a comely corp to be a body's lane wi'. Sae auld auntie Jean an' mysel', we agreed 'at we wad tak the thing upo' oorsel's, for, huz twa, we cud lippen til ane anither no to be ower feart to min' 'at there was twa o' 's. There hadna been time yet for the corp to be laid intil the coffin, though, i' the quaiet o' the mirk, we thoucht, as we sat, we cud hear the tap-tappin' as they cawed the braiss nails intil't, awa' ower in Geordie Lumsden's chop, at the Muir o' Warlock, a twa mile, it wad be. We war sittin', auntie Jean an' mysel', i' the mids o' the room, no wi' oor backs til the bed, nor yet wi' oor faces, for we daurna turn aither o' them til't. I' the ae case, wha cud tell what we micht see, an' i' the ither, wha cud tell what micht be luikin' at hiz! We war sittin', I say, wi' oor faces to the door o' the room, an' auntie was noddin' a wee, for she was turnin' gey an' auld, but I was as wide waukin' an ony baudrins by a moose-hole, whan suddent there came a kin' o' a dirlin' at the sneck,'at sent the verra sowl o' me up intil the garret o' my heid; an' afore I had time to ken hoo sair frichtit I was, the door begud to open; an', glower as I wad, no believin' my ain e'en, open that door did, langsome, langsome, quaiet, quaiet, jist as my auld Grannie used to tell o' the deid man comin' doon the lum, bit an' bit, an' jinin' thegither upo' the flure. I was turnt to stane, like,'at I didna believe I cud hae fa'en frae the cheir gien I had swarfed clean awa'. An' eh but it tuik a time to open that door! But at last, as sure as ye sit there, you twa, an' no anither—"—At the word, Cosmo's heart came swelling up into his throat, but he dared not look round to assure himself that they were indeed two sitting there and not another—"in cam the auld captain, ae fit efter anither! Speir gien I was sure o' 'im! Didna I ken him as weel as my ain father—as weel's my ain minister—as weel as my ain man? He cam in, I say, the auld captain himsel'—an' eh, sic an evil luik!—the verra luik deith—frozen upo' the face o' the corp! The live bluid turned to dubs i' my inside. He cam on an' on, but no straucht for whaur we sat, or I dinna think the sma' rizzon I had left wad hae bidden wi' me, but as gien he war haudin' for 's bed. To tell God's trowth, for I daurna lee, for fear o' haein' to luik upo' 's like again, my auld auntie declaret efterhin 'at she saw naething. She bude til hae been asleep, an' a mercifu' thing it was for her, puir body! but she didna live lang efter. He made straucht for the bed, as I thoucht.' The Lord preserve's!' thoucht I,' is he gaein to lie doon wi' 's ain corp?' but he turnt awa', an' roon' the fit o' the bed to the ither side o' 't, an' I saw nae mair; an' for a while, auntie Jean sat her lane wi' the deid, for I lay upo' the flure, an' naither h'ard nor saw. But whan I came to mysel', wasna I thankfu' 'at I wasna deid, for he micht hae gotten me than, an' there was nae sayin' what he micht hae dune til me! But, think ye, wad auntie Jean believe 'at I had seen him, or that it was onything but a dream 'at had come ower me, atween waukin' an' sleepin'! Na, no she! for she had sleepit throu' 't hersel'!"
For some time silence reigned, as befitted the close of such a story. Nothing but the solemn tick of the tall clock was to be heard. On and on it went, as steady as before. Ghosts were nothing special to the clock: it had to measure out the time both for ghosts and unghosts.
"But what cud the ghaist hae been wantin'? No the corp, for he turnt awa', ye tell me, frae hit," Cosmo ventured at length to remark.
"Wha can say what ghaists may be efter, laddie! But, troth to tell, whan ye see live fowk sae gien ower to the boady,'at they're never happy but whan they're aitin' or drinkin' or sic like—an' the auld captain was seldom throu' wi' his glaiss,'at he wasna cryin' for the whisky or the het watter for the neist—whan the boady's the best half o' them, like, an' they maun aye be duin' something wi' 't, ye needna won'er 'at the ghaist o' ane sic like sud fin' himsel' geyan eerie an' lonesome like, wantin' his seck to fill, an' sae try to win back to hae a luik hoo it was weirin'."
"But he gaed na to the corp," Cosmo insisted.
"'Cause he wasna alloot," said Grannie. "He wad hae been intil't again in a moment, ye may be certain, gien it had been in his pooer. But the deevils cudna gang intil the swine wantin' leave."
"Ay, I see," said Cosmo.
"But jist ye speir at yer new maister," Grannie went on, "what he thinks aboot it, for I ance h'ard him speyk richt wise words to my gudeson, James Gracie, anent sic things. I min' weel 'at he said the only thing 'at made agen the viouw I tiuk—though I spakna o' the partic'lar occasion—was,'at naebody ever h'ard tell o' the ghaist o' an alderman, wha they say's some grit Lon'on man, sair gien to the fillin' o' the seck."
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.
