it had sic a hand on her 'at even on her deathbed they had to bring a basin to her to wash her hands in.'
'Ay, ay? When there was sic a pride in her I wonder she didna lat young Rob to the college, an' him sae keen on't.'
'Ou, he was gaen, but ye see auld Rob got gey dottle after Nanny's death, an' so young Rob stuck to the saw-mill. It's curious hoo a body misses his wife when she's gone. Ay, it's like the clock stoppin'.'
'Weel, Rob's no gettin' to the college hasna made 'im humble.'
'Ye dinna like Rob?'
'Hoo did ye find that oot?' asked Jamie, a little taken aback. 'Man, Tammas,' he added admiringly, 'ye're michty quick i' the uptak.'
Tammas handed his snuff-mull to the mole-catcher, and then helped himself.
'I daursay, I daursay,' he said thoughtfully.
'I've naething to say agin the saw-miller,' continued Jamie, after thinking it out, 'but there's something in's face at's no sociable. He looks as if he was takkin ye aff in's inside.'
'Ay, auld Rob was a sarcestic stock too. It rins i' the blood.'
'I prefer a mair common kind o' man, bein' o' the common kind mysel.'
'Ay, there's naething sarcestic about you, Jamie,' admitted the stone-breaker.
'I'm an ord'nar man, Tammas.'
'Ye are, Jamie, ye are.'
'Maybe no sae oncommon ord'nar either.'
'Middlin' ord'nar, middlin' ord'nar.'
'I'm thinkin' ye're braw an' sarcestic yersel, Tammas?'
'I'd aye that repootation, Jeames. 'Am no an everyday sarcesticist, but juist noos an' nans. There was ae time I was speakin' tae Easie Webster, an' I said a terrible sarcestic thing. Ay, I dinna mind what it was, but it was michty sarcestic.'
'It's a gift,' said the mole-catcher.
'A gift it is,' said Tammas.
The stone-breaker took his flagon to a spring near at hand and rinsed it out. Several times while pulling it up and down the little pool an uneasy expression crossed his face as he remembered something about a child, but in washing his hands, using sand for soap, Davy slipped his memory, and he returned cheerfully to the cairn. Here Jamie was wagging his head from side to side like a man who had caught himself thinking.
'I'll warrant, Tammas,' he said, 'ye cudna tell's what set's on to speak aboot Rob Angus?'
'Na, it's a thing as has often puzzled me hoo we select wan topic mair than anither. I suppose it's like shootin'; ye juist blaze awa at the first bird 'at rises.'
'Ye was sayin', had I seen a lass wi' a lad's name. That began it, I'm thinkin'.'
'A lass wi' a lad's name? Ay, noo, that's oncommon. But mebbe ye mean Davy Dundas?'
'That's the name.'
Tammas paused in the act of buttoning his trouser pocket.
'Did ye say ye'd seen Davy?' he asked.
'Na, it was you as said 'at ye had seen her.'
'Ay, ay, Jamie, ye're richt. Man, I fully meant to turn the bairn, but she ran by at sic a steek 'at there was nae stoppin' her. Rob'll mak an awfu' ring-ding if onything comes ower Davy.'
'Is't the litlin 'at's aye wi' Rob?'
'Ay, it's Chirsty Angus's bairn, her 'at was Rob's sister. A' her fowk's deid but Rob.'
'I've seen them i' the saw-mill thegither. It didna strick me 'at Rob cared muckle for the crittury.'
'Ou, Rob's a reserved stock, but he's michty fond o' her when naebody's lookin'. It doesna do, ye ken, to lat on afore company at ye've a kind o' regaird for yere ain fowk. Na, it's lowerin'. But if it wasna afore your time, ye'd seen the cradle i' the saw-mill.'
'I never saw ony cradle, Tammas.'
'Weel, it was unco ingenious o' Rob. The bairn's father an' mither was baith gone when Davy was nae age, an' auld Rob passed awa sune efter. Rob had it all arranged to ging to the college—ay, he'd been workin' far on into the nicht the hale year to save up siller to keep 'imsel at Edinbory, but ye see he promised Chirsty to look after Davy an' no send her to the parish. He took her to the saw-mill an' brocht her up 'imsel. It was a terrible disappointment to Rob, his mind bein' bent on becomin' a great leeterary genius, but he's been michty guid to the bairn. Ay, she's an extr'or'nar takkin dawty, Davy, an' though I wudna like it kent, I've a fell notion o' her mysel. I mind ance gaen in to Rob's, an', wud ye believe, there was the bit lassieky sitting in the airm-chair wi' ane o' Rob's books open on her knees, an' her pertendin' to be readin' oot in't to Rob. The tiddy had watched him readin', ye un'erstan', an', man, she was mimickin' 'im to the life. There's nae accountin' for thae things, but ondootedly it was attractive.'
'But what aboot a cradle?'
'Ou, as I was sayin', Rob didna like to lat the bairn oot o' his sicht, so he made a queer cradle 'imsel, an' put it ower the burn. Ye'll mind the burn rins through the saw-mill? Ay, weel, Davie's cradle was put across't wi' the paddles sae arranged 'at the watter rocked the cradle. Man, the burn was juist like a mither to Davy, for no only did it rock her to sleep, but it sang to the bairn the hale time.'
'That was an ingenious contrivance, Tammas; but it was juist like Rob Angus's ind'pendence. The crittur aye perseests in doin' a'thing for 'imsel. I mind ae day seein' Cree Deuchars puttin' in a window into the saw-mill hoose, an' Rob's fingers was fair itchin' to do't quick 'imsel; ye ken Cree's fell slow? "See haud o' the potty," cries Rob, an' losh, he had the window in afore Cree cud hae cut the glass. Ay, ye canna deny but what Rob's fearfu' independent.'
'So was his faither. I call to mind auld Rob an' the minister ha'en a termendous debate aboot justification by faith, an' says Rob i' the tail o' the day, gettin' passionate-like, "I tell ye flat, Mester Byars," he says, "if I dinna ging to heaven in my ain wy, I dinna ging ava!"'
'Losh, losh! he wudna hae said that, though, to oor minister; na, he wudna hae daured.'
'Ye're a U.P., Jamie?' asked the stone-breaker.
'I was born U.P.,' replied the mole-catcher firmly, 'an' U.P. I'll die.'
'I say naething agin yer releegion,' replied Tammas, a little contemptuously, 'but to compare yer minister to oors is a haver. Man, when Mester Byars was oor minister, Sanders Dobie, the wricht, had a standin' engagement to mend the poopit ilka month.'
'We'll no speak o' releegion, Tammas, or we'll be quarrellin'. Ye micht tell's, though, hoo they cam to gie a lassieky sic a man's name as Davy.'
'It was an accident at the christenin'. Ye see, Hendry Dundas an' Chirsty was both vary young, an' when the bairn was born, they were shy-like aboot makkin the affair public; ay, Hendry cud hardly tak courage to tell the minister. When he was haddin' up the bit tid in the kirk to be baptized he was remarkable egitated. Weel, the minister—it was Mester Dishart—somehoo had a notion 'at the litlin was a laddie, an' when he reads the name on the paper, "Margaret Dundas," he looks
