o sarah, gee jy ritme aan die somer se krieke
ook die aandverkeer en die vliegtuie oorhoofs
kyk, dit maak sin, beslis, dat daar op die maan
voetspore is, en dat komponiste heroïese musieke
oor achilles en oedipus tot jou eer sal komponeer
my sarah, gaan toer die sale van europa met jou voete
die duurste pedikure vir jou, asook refleksioloë
in manelpakke, in die agtergrondskemer
sonates oor die naelmaantjies van jou tone
en ’n virtuoos bloos by ’n rokflits van jou enkels
nee, sarah, nee wag, dit alles is te ver, te vol fantasie
jou voete hier voor my weet van vratte en skimmel
en die geklop van stap, tog steeds dui hulle aan
hoe die note die aandlug moet tint, jou voete gebied:
daar is iets stewiger en meer ritmies as musiek
Die vroegsomerson as skilder
mevrou die kurator, u is verkeerd – die son dra wel ’n baret
hy haal dit vroegoggend onder die einder af
ek weet u dink ek is laf, maar aanskou nou sy werk, mevrou:
die enkoustiek van rivierkartels, die kubisme van wolkekrabbers
akwarelle op die bodems van fonteine, die sabelpelskwas
se fyn rand van die duin
soos ’n vrou se dy, ’n naakstudie van die seisoen, mevrou
(ek bly eerder stil oor die versteekte nat klowe se ruigtes)
en jammer, maar as kurator het u geen monopolie, sien:
die lewe raam homself, hy is een groot galery:
kyk na hom deur deure, ruite, die panoramiese vlakke
van telefoonpale en hulle drade, mevrou
en die son, o, die son ken kleur, kyk:
die melancholie van roes en eikehout, die ouderdom van groenspaan
die presiese ligpers van seringe se bloeisels, die taai amber
van sekere skemers
en mevrou, die son is veelsydig:
die abstrakte ekspressionisme van groot swart voëls deur die lug
die subtiele minimalisme van daardie einste lug sekondes later
mevrou die kurator, u vind my argumente sonder krag
maar ek sê weer, die son is ’n skilder, u kan maar lag
kyk tog vanaand – sy palet gaan saam met hom onder
en hy los ons kleurloos in die donker van die nag
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.
