on>
Bybelboodskappe
Jan Hulme
Lux Verbi
Ek dra hierdie werk met vrymoedigheid aan ons liewe Here op.
Ek was maar net die instrument in sy hand.
Voorwoord
’n Kind van die Here vir wie die Woord lewe … dit was my ervaring van Jan Hulme en sy boek. As gevangenisbearbeider oor jare heen is talle vrae oor die praktiese van Christenwees aan hom gestel. Onder leiding van die Gees van God het hy gaan sit en ’n boek saamgestel wat wonderlike Bybelsgefundeerde antwoorde en boodskappe verskaf aan werkers in tronke, maar ook aan enige gelowige wat Skrifantwoorde soek op praktiese geloofskwessies. Omdat Jan hom deur die Gees laat lei het, is die boek logies, verstaanbaar en bo alles: Woordgefundeerd en Christusgefundeerd. In Hom vind Jan sy antwoorde en oplossings – vir ander en vir sy eie lewe.
In my kontak met die skrywer het ek iets van ’n Lotshart by hom ervaar. Soos Lot van ouds in Sodom en Gemorra hom baie gekwel het oor die afgedwaaldes en roekeloses, so ook met Jan – daar is by hom ’n opregte omgee vir hulle wat nie van beter weet nie en om vir hulle te kan sê: Die “Here” het vir jou antwoorde. Die “Here” is jou antwoord in Christus. Dis lekker om in sy boek saam met iemand die pad te stap vir wie Christus self sy lewe geword het.
Vir Jan was die samestelling van die boek nie iets wat hy self loop en bedink het nie. Soos hy telkens vir my gesê het as ons saam oor sekere hoofstukke gesels het – die Here gee vir my die woorde en die teksgedeeltes. Jan is nie ’n opgeleide teoloog nie – die werklike wysheid en insig het die Gees self aan hom gekommunikeer.
Die boek sou baie sinvol gebruik kon word in gevangenisbearbeiding maar ook in die persoonlike Bybelstudie. Uiters aktuele temas word bespreek en belig uit die Woord.
Iets oor die skrywer self: ’n baie vriendelike, aangename persoon sonder enige selfvoldaanheid of pretensie. ’n Eerlike, opregte kind van ons Heer wie se lewe uitverkoop aan Hom. Jan is ’n hulpvaardige, liefdevolle persoon wie se boodskappe en lewe mekaar telkens ontmoet. Verder is Christus vir hom ’n lewende werklikheid as synde Christus nou hier teenwoordig in ons daaglikse lewe.
Ek het die grootste vrymoedigheid om die boek by u te kan aanbeveel.
Ds GK Malherbe
Inleiding
Elke tweede Sondag hou ek ’n kerkdiens by die Korrektiewe Dienste se Jeugsentrum in Mosselbaai, waar ek as geestelike werker betrokke geraak het. Omdat ek nie gepaste boodskappe kon vind vir my voorbereiding nie, het ek die Here se leiding gesoek hieroor. Die Here Jesus het deur sy Gees op wonderbaarlike wyse boodskappe aan my bekend gemaak.
Ná agt jaar se bediening het ek besef dat daar ook by baie ander geestelike werkers ’n behoefte bestaan om gepaste boodskappe te vind vir soortgelyke dienswerk. Toe het die Here dit op my hart gelê om die “preke” wat ek oor jare heen geskryf het, te verwerk en in boekvorm te laat publiseer. So het hierdie boek ontstaan.
Al is die boodskappe oorspronklik geskryf met die oog op ’n bediening in die gevangenis, is dit geskik vir gebruik deur werkers in alle Christelike kerke en denominasies in verskeie dienswerksituasies. Dit dek feitlik die hele Bybel se inhoud, is tematies gerangskik en in geselstrant geskryf. Stellings is met Skrifgedeeltes toegelig vir verwysingsdoeleindes. Geestelike bedienaars van die Woord kan die boodskappe gebruik net soos dit aangebied word, of hulle kan dit verwerk soos die Here hulle deur sy Gees lei.
Hierdie handleiding kan ook deur individue gebruik word tydens selfstudie in die Woord, byvoorbeeld wanneer ’n mens twyfel oor jou geloof, soek na die Here se teenwoordigheid, bang is vir die dood of as jy hunker na die lewe van ’n vrygemaakte kind van die Here. Dit openbaar God se Woord op baie unieke maniere.
Al die verskillende Christelike kerke vorm almal saam die liggaam van Christus. Al verskil die lidmate van mekaar oor sake soos die doop of die eindtye, word ons almal gelei deur die een Heilige Gees wat in ons woon. Jesus het sy bloed vir almal gestort en ons word almal gered deur God se genade. Ek noem dit omdat daar klemverskuiwings tussen verskillende denominasies mag wees, maar met geringe aanpassings is die boodskappe bruikbaar vir alle Christengroepe.
Wanneer mense die Woord van God begin verstaan, verander dit hul hele lewe. Dit beïnvloed hulle positief en gee hulle ’n nuwe lewensbeskouing. Wanneer mense Jesus deur die Woord beter leer ken, inspireer sy liefde en genade hulle gewoonlik om weg te draai van hul verkeerde weë en Jesus se pad te stap.
Ek bid dat God hierdie boek mag gebruik om juis dit deur sy Gees in mense se lewe te bewerkstellig. My hartsbegeerte is dat die saad wat deur hierdie boek gesaai word, ’n goeie oes vir God se koninkryk sal oplewer.
Riglyne vir voorbereiding van dié boodskappe
Dikwels word dienswerkers gevra om mense of groepe te lei in die bestudering van die Woord, of om ’n boodskap uit die Woord aan ’n groep mense te bring, sonder dat hulle riglyne ontvang of voorberei word op dit wat hulle te wagte kan wees. As ’n mens dit al baie jare lank doen, is jy al op jou gemak en weet jy al hoe om te werk te gaan as jy mense op hierdie manier bedien. Maar dalk het jý dit nog nooit gedoen nie, of dalk doen jy dit nie so gereeld nie. Hierdie riglyne is bedoel om jou goed toe te rus sodat jy kan ontspan en kan fokus op dit wat werklik belangrik is: die boodskap wat jy gaan oordra.
Voorbereiding van die boodskap
Bid vooraf ernstig oor die boodskap en vra die Here om jou te lei in die keuse van ’n tema. Dit is belangrik dat die boodskap eenvoudig en verstaanbaar sal wees – en natuurlik dat dit Bybels sal wees. Daarmee bedoel ek dat die grondslag daarvan uit die Skrif moet kom. Dit moenie bloot jou eie gedagtes wees waarby jy ’n paar Bybeltekste ter ondersteuning van jou eie standpunt vasplak nie. Dit moet in die eerste plek die Bybel se eie boodskap wees, maar jy kan wel die boodskap met ’n kort, toepaslike gebeurtenis, illustrasie of verhaaltjie toelig of verduidelik. Maak dit van toepassing op die individu – met ander woorde, dit moet aan elke luisteraar die persoonlike vraag vra: Wat sê dit vandag vir mý? Hoe verstaan ék dit?
Gee duidelike inligting oor hoe die Skrifgedeelte wat julle gaan behandel,verklaar kan word. Gaan lees ook weer wat die Woord self sê oor Woordverkondiging, byvoorbeeld in Romeine 10:17, 1 Korintiërs 14:31 en Titus 2:8a. As dit vir jou moontlik is, nooi iemand uit om saam met jou te gaan en as getuie op te tree van hoe die Here hom of haar geroep het of hoe die Here hulle lewe verander het.
Die lokaal
Maak vooraf seker dat die lokaal waar die boodskap aangebied gaan word, geskik is vir die doel. Is daar genoeg sitplekke vir die hoeveelheid mense wat waarskynlik gaan kom luister? Is daar genoeg lig en genoeg vars lug? Sal die mense jou duidelik genoeg kan hoor?
Wanneer jy gereed is
1 Deel die groep mee dat jy in die Naam van die Here kom.
2 Gee jou gas wat as getuie gaan optree, die geleentheid om sy of haar getuienis te gee. Dit moet kort en kragtig wees.
3 Maak kontak met individue in die gehoor (vra waar elkeen vandaan kom) of met die groep as geheel (hoe gaan dit met hulle?).
4 Vertel kortliks wie jy is.
5 Gee aan jou gehoor ’n aanduiding van hoe lank jy gaan gesels. Daar moet ’n vasgestelde tyd wees waarbinne jy die boodskap gaan bring. Wees egter
