jy moet doen. Luister na God se stem om jou te lei.
– JOYCE MEYER
Het jy dit al gehoor? God se stem? Nee, nie noodwendig in klanke of woorde nie. Wel op allerlei maniere. God is elke oomblik van die dag met ons in gesprek. Wanneer ons moeg is, wanneer ons bekommerd is, wanneer ons bang is en wanneer ons net wil hoor dat God daar is. Om vreesloos te kan doen wat ons wil doen, moet ons ook luister. Soms hoor ons net wat ons wil hoor, maar luister ons dan werklik na wat God sê? Hy praat met ons deur sy Woord en deur die Heilige Gees. Ware wysheid manifesteer wanneer ons werklik na God se stem luister en vir ’n sensitiewe gees bid om sy teenwoordigheid aan te voel. Om God te kan hoor moet ons ons hart en gedagtes instel en glo dat God God is. As ons hart en gedagtes nie oopgestel is om te hoor nie, hoe kan ons dan verstaan wat God vir ons wil sê? Raak opgewonde en hoor God se Woord.
Gee daarom aandag aan wat jy hoor. Aan dié wat hulle oopstel vir my lering, sal groter begrip gegee word. Maar dié wat nie luister nie, van hulle sal selfs dit wat hulle dink hulle het, weggeneem word.
– LUKAS 8:18 (NLV)
12. Jesus se hartseer
12
Jesus se hartseer
Hoe moes Jesus gevoel het om al die onreg te aanskou wat sy Vader aangedoen word? Miskien het dit Hom baie meer hartseer besorg as die pyn van sy eie lyding.
– TERESA VAN ÁVILA
Jesus moes elke dag sien hoe mense God se wet oortree, hoe minagtend hulle teenoor God se Woord is en hoe min mense vir mekaar voel. Doen ons nie maar dieselfde nie? Ons luister nie na die Vader se Woord nie; ons is gereeld ongehoorsaam en sonder dat ons dit dalk besef, maak ons Jesus baie hartseer. Ons raak gewelddadig in ons gedagtes, in die verkeer of sommer net om geen rede nie. Ons sien dit elke dag om ons, maar neem ons werklik die effek waar wat ons gedrag op ander het? Sien ons dat dit die Vader ongelukkig maak? Ons harte moet oorloop van liefde, God se liefde. Wanneer ons gehoorsaam is aan God se wet, maak ons Jesus ook bly. Hy het tog die wet ingestel sodat ons kan leer om vir mekaar om te gee. As ons God liefhet, sal ons nie anders kan as om met liefde en deernis na ander te kyk nie.
As ons die eerste twee gebooie gehoorsaam, sal ons Jesus se hart nooit bedroef nie.
– HELENE DE KOCK
13. Een mens kan baie uitrig
13
Een mens kan baie uitrig
Ek is net een, en tog is ek iemand. Ek kan nie alles doen nie, maar ek kan iets doen.
– HELEN KELLER
Komende van Helen Keller behoort hierdie kragtige woorde enige Christen te vertroos en te bemoedig wat probleme het met gestremdheid en hindernisse. Ons almal ondervind in ’n stadium groot hindernisse. Helen Keller was gestrem, en tog het sy hoopvol en vrugbaar gelewe. ’n Mens dink soms jy is so erg in die minderheid dat jy in elk geval niks aan die toedrag van sake kan doen nie. Helen Keller, blind en doofstom, het egter almal in die wêreld gewys dat sy iets kon doen in verband met die toestand van die wêreld. Deur haar geloof en haar moed het sy dinge vermag wat baie mense wat kan sien, hoor en praat net van kan droom. Daarom moet ’n mens dit wat jy doen tot God se eer laat strek, al voel jy jy is die enigste een op aarde wat met God wandel. Leef dus in die krag van God, wat hoop gee, en nie met hopeloosheid, wat jou van jou krag ontneem nie.
Om te leef soos die Here dit wil, is die krag van die opregte.
– SPREUKE 10:29
14. Deur u Gees
14
Deur u Gees
Here, ek besef ek is magteloos … Ek weet dit is nie deur my eie wysheid of mag dat kragtige dinge in my lewe gebeur nie, maar deur u Gees.
– STORMIE OMARTIAN
Dis eintlik wonderlik om tot die besef te kom dat ’n mens niks te doen het met die wonderlike dinge wat in jou lewe gebeur nie. Slegs God kan goeie, kragdadige dinge in jou lewe laat gebeur. En Hy doen dit, maar dan moet jy Hom in dankbaarheid toelaat om dit te doen. Wanneer ’n mens tot die besef gekom het dat jy eintlik heeltemal magteloos is, dat jy die afhanklikheid van ’n pasgebore babatjie het, dán gee jy die Heilige Gees die geleentheid om met oorgawe in jou te werk. Dis nie eie aan die mens se aard om te erken dat hy magteloos is nie, maar dis ’n feit dat mense niks goeds sonder God kan vermag nie. Daarom, gee jouself aan die Heilige Gees oor, vertrou op Hom soos ’n baba instinktief op sy moeder vertrou. Dan sal God met jou paaie loop wat jy andersins nooit sou kon aandurf nie. Jy sal die lewe met al sy terugslae met geesdrif die hoof kan bied.
Ek kry arms vol krag wanneer ek voor Hom staan met my probleme. Ek soek veiligheid by my God.
– PSALM 62:8 (DIE BOODSKAP)
15. Die voorreg van vriendskap
15
Die voorreg van vriendskap
Watter groot guns bewys God aan iemand wat Hy tussen goeie mense plaas.
– TERESA VAN ÁVILA
Dis ’n voorreg om tussen goeie mense geplaas te word. Om in ’n gesin te wees wat jou met liefde en begrip omring, al is hulle mense met foute, is ’n voorreg waarvoor jy God nooit genoeg kan dank nie. Om opregte vriende te hê is ’n skat wat jy moet koester. Ons het Dawid en Jonatan as voorbeeld: ’n Pragtige vriendskap het ontstaan, een waarin integriteit die botoon gevoer het. Die Here het Dawid werklik ’n wonderlike vriend gegee. Bid vir vriende met die lojaliteit van ’n Jonatan. Vra die Here dat Hy jou sal lei om ook vir ander ’n lojale vriend te wees. Ons moet mekaar liefhê en kan dit net doen as ons God in ons geselskap toelaat. Daar is soveel wat ons vir ander kan doen as ons Jesus in ons hart het. Gelowiges is goed vir ander. Bid dat jou familie en ook jy vir ander goed sal wees. Wees dan eerstens ’n goeie vriend, ’n goeie ouer en ’n goeie lidmaat.
Jonatan en Dawid het ’n verbond gesluit omdat Jonatan hom liefgekry het soos homself.
– 1 SAMUEL 18:3
16. Die Here gaan voor jou uit
16
Die Here gaan voor jou uit
Trek op, want … (d)ie Here gaan voor jou uit.
– RIGTERS 4:14, DEBORA
Daar is by dié bekende vroulike rigter, Debora, geen onsekerheid oor wat gedoen moet word nie. Haar sterk verhouding met God het haar as ’n sterk leier na vore laat tree, as iemand wat die toon kon aangee. Het jy ’n sterk verhouding met God? Beplan jy jou toekoms saam met Hom? Daar is gereeld tye dat ’n mens wonder hoekom God jou geplaas het waar jy is. Veral die werkplek laat jou wonder hoe jy enigsins kan uitstaan en doen wat God wil hê jy moet doen. Die enigste manier is om dit wat jy wil doen en die verskil wat jy wil maak, saam met Hom te bespreek en dit saam met Hom te beplan. So kan ek en jy slegs raad gee en onderhandel omdat ons beplanning strook met God s’n. Beplan dus, gaan uit en wees verseker dat jy ’n leier kan wees wat die wêreld kan wys dat jy tot baie in staat is wanneer God in beheer van jou lewe is. Leef só dat ander jou voorbeeld sal wil volg. Plaas God in beheer.
Debora wys vir ons wat ’n mens kan vermag as God in beheer is.
–
