Die dapperes wie se hart deur God geroer is, het saam met hom gegaan (10:26).
GESELSVRAAG:
Hoe word ’n mens ’n goeie leier?
“’n Leier is nie ’n leier as hy nie volgelinge het nie.” In Afrika gebeur dit dikwels dat ’n soldaat wat nie juis in die weermag kon vorder nie, homself deur ’n staatsgreep en baie moorde as leier van die land uitroep. So het Idi Amin en talle ander duisende mense tydens hul diktatorskap vermoor. Sulke leiers is uit op selfverryking, nie op die opbou en welsyn van die bevolking nie. Die volk kan nie deur demokratiese prosesse ’n ander leier kies nie. ’n Ander leier kan net deur ’n gewelddadige opstand aan die bewind kom. En dan is hy dikwels maar net so sleg.
Israel se nuwe koning, aan die ander kant, was bra onwillig vir die verantwoordelikheid. Hy het hom nie op die voorgrond gedring nie. Selfs nadat hy bonatuurlik deur die lot aangewys is, vind hulle hom waar hy ander mense se bagasie oppas. Dit was ’n goeie begin. Hierdie man is deur God aangewys. Hy het ’n wonderlike toekoms gehad. As hy maar net aan die Here getrou kon bly.
Swak leiers stel hulle uit selfsugtige oorwegings op die voorgrond. Goeie leiers het ’n passie vir ’n saak. Leierskap volg outomaties. Dis nie jou geld, geleerdheid of selfs geestelike gawes wat jou ’n leier maak nie. God moet jou op sý manier aanwys.
GEBED: Here, ek is nie gewillig of geskik om leiding te neem nie. As U my wil gebruik, moet U my verander en lei.
Lees vanaand in 1 Samuel 11:1-7 hoe Saul deur die Heilige Gees gelei word om ’n verskil te gaan maak.
Donderdag 12 Maart 2105 • Lees eers 1 Samuel 11:8-15
Aanvaarding
Al die manskappe is toe na Gilgal toe, en daar in Gilgal het hulle voor die Here aangekondig dat Saul koning is (11:15).
GESELSVRAAG:
Watter soort leiers het ons land nodig?
“Ons soek ’n leier wat omgee vir sy mense,” het die Israeliete seker vir mekaar gesê. Hulle het niks van die jongman Saul geweet nie, behalwe dat hy van Gibea kom. Dit is die stad wat veroorsaak het dat die stam Benjamin feitlik uitgewis is. Die oorblyfsel is toe aan vrouens gegee wat uit Jabes gekom het (vgl Rig 21:14). Saul, uit Benjamin, het dus ’n familieband met Jabes gehad.
Deur met sy voetsoldate amper 100 km deur die nag te trek, het Saul die Ammoniete verras net toe hulle gedink het dat hulle hul wrede plan kon uitvoer. Hy het hulle uit drie rigtings aangeval, en daar was soveel verwarring dat ons lees dat nie twee van die vyand se soldate bymekaar gebly het nie. Hulle het in alle rigtings laat spaander. Só is Saul se leierskap bevestig. Sommige wou sommer net daar dié vermoor wat nie vir Saul dadelik aanvaar het nie. Saul het egter wys en nederig opgetree. Daardeur het hy die lojaliteit van die manskappe verseker.
“’n Leier is net nodig as meer as een mens iets saam moet doen.” Dit gaan nie oor die leier nie, maar oor die taak wat afgehandel moet word. Ons elkeen moet soms leiding neem omdat daar ’n taak is om af te handel. Is jy God se soort leier?
GEBED: Here, dikwels wil ons nie betrokke raak by ander mense se probleme nie. Vergewe ons daarvoor en gebruik ons soos U wil.
Lees vanaand in 1 Samuel 12:1-12 hoe Samuel die volk herinner wat tot die aanwysing van Saul gelei het.
Vrydag 13 Maart 2105 • Lees eers 1 Samuel 12:13-25
Geen vrede sonder God nie
Maar as julle opsetlik verkeerd doen, sal julle sowel as julle koning uitgewis word (12:25).
GESELSVRAAG:
Hoekom is Christene beter leiers?
“No God, no hope; know God, know hope,” lees ek op ’n kennisgewingbord voor ’n kerk. Die beste leier kan nie reg lei sonder om God te ken nie. Dít is die belangrikste boodskap wat Samuel ook vir sy volk gehad het. Hulle moes nie dink hulle het God nie langer nodig noudat hulle ’n koning het nie. Hulle en hul koning was aan God onderdanig. Hulle moes aan Hom gehoorsaam bly, anders het hulle geen toekoms nie.
Samuel was teleurgesteld dat die volk op ’n koning aangedring het. ’n Koning kon hulle maklik op ’n verkeerde pad lei (soos toe ook gebeur het). Hy het dus vir donderweer gebid en dit gekry. Die volk kon sien dat God almagtig was. Hulle het bely dat hulle ’n fout gemaak het om vir ’n koning te vra. Die Here is die groot Koning.
Die grondleggers van die VSA was toegewyde gelowiges. Hulle het na Noord-Amerika geëmigreer ter wille van die vryheid van godsdiens. Tog is die VSA tans vinnig op pad na Christenvervolging. Die beginsels in sy grondwet word geïgnoreer. Nou is alle godsdienste welkom. God se Woord het nie meer enige gesag nie. Dit mag nie meer in die skole geleer word nie. Geen wonder dat dinge verkeerd loop nie. En by ons?
GEBED: Here, U is ons Koning. Lei ons en ons leiers op u pad.
Lees vanaand in 1 Samuel 13:1-9 hoe Saul in ’n krisistyd die verkeerde besluit geneem het.
Saterdag 14 Maart 2105 • Lees eers 1 Samuel 13:10-22
Gehoorsaamheid is die toets
Die Here sal vir Hom ’n man na sy hart soek.
Die Here sal hóm aanstel as regeerder oor sy volk, want jy het nie gedoen wat die Here jou beveel het nie (13:14).
GESELSVRAAG:
Hoe toets die Here ons toewyding?
“Die Here het my in die skool van geduld gesit. En ek dop elke toets,” skryf ’n sendeling uit die Midde-Ooste. Die Arabiese woord bukra beteken “môre” óf verwys na ’n onbekende tyd iewers in die toekoms. Jy weet dus nie wanneer ’n saak afgehandel kan word nie. Stiptheid is nie deel van hul woordeskat nie. Dinge gebeur maar baie rustig.
Saul het sy eerste toets gedop. Samuel het nie betyds opgedaag nie, soos die kultuur van daardie tyd was. Saul het gesien hier kom ’n groot ramp, want sy manne het begin dros en vlug vir die aankomende oormag. Ons sou seker ook maar soos hy eiemagtig opgetree het. Saul het nie besef hierdie toets was doelbewus nie. Die Here wou kyk of hy gehoorsaam sou bly in ’n krisistyd. En toe hy nie slaag daarin nie, het die Here iemand anders, ’n man na sy hart, gesoek. Ons sal nog baie van dié man hoor.
Ons word ook elke dag getoets. As ons die toets slaag, word ons sterker. As ons die toets dop, moet ons dit oor doen. Die Here is besig om ons te vorm vir ’n spesiale taak. Is jy gewillig dat God met jou werk om jou daarvoor voor te berei?
GEBED: Here, ek is bewus van my swakheid en ongeduld. Maar ek is gewillig om verander te word.
Lees vanaand in 1 Samuel 13:23-14:12 hoe Jonatan die teken gekry het wat hom van God se oorwinning verseker het.
Sondag 15 Maart 2015 • Lees eers Psalm 32:6-11
Saam op pad
Ek wil jou onderrig en jou die pad leer wat jy moet volg. Ek wil jou raad gee en my oog oor jou hou (32:8).
GESELSVRAAG:
Wanneer is dit goed om nie alleen te loop nie?
“Ek is bevrees dat die skole
