minerale wat die liggaam in klein hoeveelhede nodig het ten einde gesond te ontwikkel en te funksioneer. ’n Tekort aan dié spoorelemente kan ernstige gesondheidsprobleme veroorsaak. Dit kom in klein maar voldoende hoeveelhede in sekere kosse voor.
Enkele belangrike vitamiene:
•Vitamien A is nodig om essensiële vetsure te kan verteer en die spysverteringskanaal, longe en mukusmembrane gesond te hou. Wees versigtig om nie te veel in te neem nie; dit word met geboortedefekte geassosieer. (Sien Noodsaaklike voedingstowwe vir ‘n lys van kosse wat vitamien A bevat.)
•Vitamien B2 is nodig vir energiemetabolisme, met ander woorde om voedingstowwe in energie om te skakel, en vir die gesonde groei en ontwikkeling van sekere liggaamsweefsels vir jou en jou baba. Dit kom in peule, neute, groen groente, heelgraankos, suiwel en eiers voor.
•Vitamien B6 is nodig vir die vorming en groei van nuwe liggaamsweefsel in jou en jou baba en is ’n teenvoeter vir naarheid. Dit kom voor in heelgraankos, suiwel, eiers en maer vleis.
•Vitamien B12 is nodig vir die normale verdeling van rooibloedselle en ’n tekort sal tot bloedarmoede lei. Dit kom voor in organiese vrugte en groente (wat nie met chemikalieë gewas is nie), maer vleis, hoender, kalkoen, suiwel en eiers.
•Foliensuur is nodig vir die gesonde ontwikkeling van jou baba se neuraalbuis waaruit die brein en senustelsel weer ontwikkel. (Sien Noodsaaklike voedingstowwe vir ‘n lys van kosse wat foliensuur bevat.)
Enkele belangrike minerale:
•Yster hou liggaamsweefsel sterk, verseker dat die liggaam genoeg suurstof opneem en bied beskerming teen infeksie. (sien Noodsaaklike voedingstowwe vir ’n lys van kosse wat yster bevat.)
•Kalsium bou gesonde spiere, vel, bene en tande en help om eklampsie en kardiovaskulêre siektes te voorkom. (sien Noodsaaklike voedingstowwe vir ’n lys van kosse wat kalsium bevat.)
•Magnesium en kalsium vorm ’n span en voorkom krampe. (sien Noodsaaklike voedingstowwe vir ’n lys van kosse wat magnesium bevat.)
•Sink is nodig vir die gesonde vorming van DNS en liggaamsweefsel asook vir die ontwikkeling van die immuunstelsel. (sien Noodsaaklike voedingstowwe vir ’n lys van kosse wat sink bevat.)
•Jodium is noodsaaklik vir die vervaardiging van skildklierhormone in ma’s sowel as babas en is belangrik vir normale groei en metaboliese prosesse. Dit kan ook help om preëklampsie te verhoed. Jodium kom voor in seekos, seewier en ander seegrasse asook gejodeerde sout.
| Drie belangrike punte1.Studies het bevind dat swangerskapnaarheid moontlik ’n natuurlike meganisme is om te keer dat swanger vroue kosse eet wat skadelik vir hulle en hul babas is; dit dien as ’n vorm van beskerming in die mees kritieke stadium, die eerste trimester.2.Soet happies en suikerryke gaskoeldrank ontwrig bloedsuikervlakke en het geen voedingswaarde nie. Vermy dit dus en eet eerder ’n paar dadels as jy lus is vir iets soets!3.Ons liggame bestaan uit minstens 70% water, wat verklaar waarom dit so belangrik vir jou en jou ontwikkelende baba se gesondheid is dat jy genoeg vloeistof inneem solank jy swanger is. |
KOSDRANGE
Dit is belangrik dat swanger vroue hul kosdrange op ’n gesonde manier bevredig. As jy net eenvoudig iets soets moet hê, is dit beter om ’n piesang of ’n paar dadels te eet. As jy droom van ’n lekker southappie, kan ’n paar olywe of ’n avokado jou van aartappelskyfies laat vergeet.
Dit sal ook help om meer gereelde, kleiner maaltye deur die loop van die dag te eet. As jy emosioneel voel en ’n bietjie ekstra bederf nodig het (wat glad nie onwaarskynlik is as jy verwag nie), moet jy jou liefs nie tot kos wend nie. Dit bied kortstondige troos en jy sal na die tyd net vies wees vir jouself. Gesels eerder met jou maat of ’n goeie vriendin en verduidelik dat jy eenvoudig net ’n bietjie ekstra liefde nodig het.
Moenie bekommerd wees oor die vreemde kombinasies wat jy eet nie (mits dit gesond is) of as jy ’n afkeer ontwikkel van kos, byvoorbeeld vleis, waarvan jy eintlik hou nie. Dit is ’n algemene verskynsel en gebeur ook moontlik om jou en jou baba te beskerm. As jy ’n onverklaarbare behoefte het om heeltyd ysblokkies te kou of te suig, is dit waarskynlik omdat swanger vroue dikwels warm kry. Dit is niks om jou oor te kwel nie.
Drange waaroor jy bekommerd moet wees
Die drang om eienaardige dinge soos grond, as, kryt en verf te lek of te eet, word pika genoem en dui op ’n tekort aan ’n spesifieke belangrike voedingstof. Gesels met jou dokter daaroor aangesien dit gevaarlik kan wees.
HOOFSTUK 4
Oefening
Te veel oefening kan jou pogings om swanger te word kniehalter, maar vroue is geneig om meer vrugbaar te wees wanneer hulle fiks is. Dit is net so belangrik om gereeld te oefen terwyl jy swanger is. Vind iets wat jy geniet en wat by jou liggaam en behoeftes pas.
SPRING REG WEG
As jy nog nooit vantevore geoefen het nie, kan jy eenvoudig begin deur net 10 minute per dag, vyf dae per week iets te doen. Enigiets wat gemaklik is, is reg. As jy die spesifieke oefening geniet, kan jy begin om elke dag ’n bietjie langer te oefen of later in die dag ’n tweede oefensessie in te pas. Jy sal gou resultate begin sien en dit sal jou motiveer om vol te hou. Oefening sal:
✓jou help om goed te voel en te lyk, en jou selfbeeld ’n hupstoot gee.
✓optimale fiksheid en stamina bou vir kraam en bevalling.
✓jou gemoedstoestand verbeter, keer dat jou emosies wipplank ry en kosdrange in toom hou.
✓skete en pyne verminder deur jou postuur en spier- en ligamenttonus te verbeter.
✓die newe-effekte van slegte spysvertering, byvoorbeeld hardlywigheid, verminder.
✓verhoed dat jou voete en enkels te veel swel.
✓verseker dat jou baba se vestibulêre sisteem (die balansmeganisme) gesond ontwikkel.
✓help dat jy in die laaste paar weke van jou swangerskap minder uitgeput en sterker voel.
✓jou help om vinniger te herstel ná die bevalling.
Algemene wenke en waarskuwings oor oefening
As jy reeds oefening doen waarvan jy hou en wat jou pas, is daar geen rede om nie daarmee vol te hou nie, solank dit veilig is. Hou die volgende in gedagte namate jou swangerskap vorder:
•Kry altyd eers die goedkeuring van jou mediese praktisyn as jy ’n volledige oefenprogram in die gimnasium volg of aan ’n avontuurlustige, veeleisende en hoëimpaksport soos rotsklim, intense aërobiese oefening, perdry en gewigoptel deelneem.
•Sommige sportsoorte soos Oosterse krygkuns, witwaterroei en valskermspring moet om voor die hand liggende redes vir eers laat vaar word.
•Warm altyd stadig op aan die begin van elke oefensessie en doen strekoefeninge om af te koel wanneer jy klaar is.
•Gesels met jou dokter as jy sleg voel, jou hartklop te veel versnel of as jy sukkel om asem te haal terwyl jy oefen.
•Indien jy ’n bloederige of waterige
