Moet julleself tog nie te veel verbeel nie.”
Dit lyk vir my dat dit die vertrekpunt is vir die vasstelling van jou status voor God. Jy is niks meer as ’n brose skepsel nie. So klein, so breekbaar, so hulpeloos … totdat … Totdat God jou optel en aan jou status gee. Totdat die Heilige van Israel, jou Verlosser, vir jou help. Of anders gesê: totdat jy jou absolute afhanklikheid van die Here besef. Erken eers jou wurmstatus voordat jy jou oor jou skoenlapperkleure kan verheug.
Here, in die lig van u heilige heerlikheid is ek so oneindig klein . . . Amen.
24 Maart
Jy is vir God kosbaar
Luister, so sê die Here wat jou geskep het, Jakob, wat jou gevorm het, Israel: Moenie bang wees nie, Ek verlos jou, Ek het jou op jou naam geroep, jy is Myne. Omdat jy vir My kosbaar is, omdat Ek jou hoog ag en jou liefhet, gee Ek mense in jou plek, volke in ruil vir jou lewe. Jesaja 43:1, 4
Hoe voel jy, wurmpie? Klein en broos en afhanklik? Wel, dan is jy op die regte spoor! Want in Jesaja 43 ontdek jy jou regte status, of liewer: jou volledige status. Ja, jy bly maar klein en broos, maar jy is in God se hand. Hy hou jou vas. En Hy sê jy hoef nie bang te wees nie. Hy, jou Skeppergod sal jou beskerm en vir jou sorg.
As jy dus aan jou status wil dink, blaai terug na Genesis 1:28. Daar hoor jy dat jy na God se beeld geskape is. God se beeld, sy wese, moet in en deur jou lewe geopenbaar word. En die Here sê voorts dat Hy jou op jou naam geroep het. Hy ken jou by name. En Hy het ’n saak met jou, daarom roep Hy jou. Hy trek jou as’t ware by name nader aan Hom, want jy is sy kosbare eiendom.
Kosbaar vir God. Is dit nie een van die wonderlikste dinge wat jy oor jouself kan weet nie? God gaan nog verder: Hy sê dat Hy vir jou ’n hoë agting het. God dink baie van jou. Jy is vernaam in sy oë. Hy dink so baie van sy kosbare eiendom dat Hy selfs mense se lewens in jou plek gee sodat jy kan lewe. Aan die kruis het Hy die lewe van sy eie Seun in jou plek gegee sodat jy Hom jou Vader kan noem.
Dít is jou status: kind van God!
Here, baie dankie dat ek u kind is. Dankie dat ek vir U kosbaar is. Amen.
25 Maart
Hoe sterk is jy?
Daarom, sodat ek nie hoogmoedig sou wees nie, is daar vir my ’n doring in die vlees gegee, ’n boodskapper van Satan om my met vuiste te slaan. Drie maal het ek die Here gebid dat dit van my af weggeneem moet word. Sy antwoord was: “My genade is vir jou genoeg. My krag kom juis tot volle werking wanneer jy swak is.” 2 Korintiërs 12:7–9
Terwyl jy besig is om van jou lewe bestek te neem, is daar heelwat dinge waaroor jy baie opgewonde kan raak. Daar is soveel Skrifgedeeltes wat jou verseker dat God vir jou lief is en dat Hy jou in die holte van sy hand hou. Uit jou eie lewenservaring is daar waarskynlik ook talle voorbeelde van God se verrassende genade. Maar … . Ja, daar is altyd ’n lastige “maar”. Maar dit gaan tog nie altyd so voor die wind met jou nie. Ja daar is die heerlike hoogtepunte en die sekere wete dat jy aan die Here behoort, maar daar is ook die af dae, en erger nog: daardie knaende doring in die vlees.
Paulus kon van die wonderlikste geestelike ervarings getuig. En tog was daar in Paulus se lewe iets wat hom so geweldig gehinder het dat hy dit as ’n doring in sy vlees beskryf. Hierdie doring het hom op sy knieë gehou. Ons weet nie wat dit was nie, maar dit moes iets baie ernstig gewees het as hy met soveel drif gebid het dat die Here dit tog moet wegneem. Maar die Here het dit nie weggeneem nie. Tog het die Here vir Paulus ’n antwoord gehad: My genade is vir jou genoeg. En dan kom Paulus tot die gevolgtrekking dat God se krag deur sy swakheid tot openbaring kom.
Here, hou my tog baie nederig, op my knieë, sodat u krag in en deur my lewe tot openbaring kan kom. Amen.
26 Maart
Quo Vadis?
Ons almal weerspieël die heerlikheid van die Here, want die sluier is van ons gesig af weggeneem. Ons word al meer verander om aan die beeld van Christus gelyk te word. Die heerlikheid wat van ons uitstraal, neem steeds toe. Dit doen die Here wat die Gees is. 2 Korintiërs 3:18
Inkeer en bekering – U-draai, omdraai, terugkeer, wegdraai, koersaanpassing – wat dit ook al in jou geval mag beteken, dit dui telkens op ’n koersverandering. Die vraag is nou: Waarheen? Quo Vadis? Wanneer ’n mens ’n gevestigde gewoonte prysgee of ’n vertroude roete verlaat, moet jy darem minstens weet waarheen die nuwe koers lei en moet jy deeglik daarvoor gemotiveerd wees.
In 2 Korintiërs 3:18 gee Paulus vir ons ’n aanduiding van waarheen ons as kinders van God onderweg is. Ons lewens moet sodanig wees dat die beeld van Christus ál meer in ons lewens aan die lig sal kom. Paulus praat hier na aanleiding van Moses wie se gesig geblink het nadat hy in God se teenwoordigheid verkeer het. Hy moes dit met ’n sluier bedek, so helder was die lig wat daarvan gestraal het. Hoe intenser ’n mens se gemeenskap met God is, hoe duideliker word dit in jou lewe sigbaar. Ons het die Gees van God in ons; die sluier is nie nodig nie, want die wêreld moet juis kan sien dat ons die heerlikheid van die Here uitstraal. En hierdie lig wat ons uitstraal, moet algaande, namate ons met Christus in verbondenheid lewe, toeneem.
Ons word ál meer verander om aan die beeld van Christus gelyk te word. Dit is ons doel. En die Heilige Gees motiveer ons daartoe. Al hoe meer Christusgelykvormig. Watter heerlike doelwit!
Liewe Here, help my om ál meer Christusgelykvormig te raak. Amen.
27 Maart
Net soos Jesus
Wie sy woord egter gehoorsaam – in hom het die liefde van God werklik sy doel volkome bereik. Hieraan weet ons dat ons in Hom is. Wie beweer dat hy in Hom bly, behoort self ook te lewe soos Jesus gelewe het. 1 Johannes 2:5–6
Dit is seker logies dat gister se teksvers met 1 Johannes 2 opgevolg sal word. Paulus het gesê dat ons al hoe meer Christusgelykvormig moet raak. Johannes gaan ’n stappie verder: Hy sê ons moet net soos Jesus raak! Watter geweldige uitdaging is dit nie. Hy gee aan Paulus se Christusgelykvormigheid ’n praktiese inkleding. Leef net soos Jesus. Maar Johannes gaan nog verder, hy gee vir ons daadwerklike riglyne vir ’n lewe net soos Jesus. Gehoorsaam sy woord. Luister goed na Jesus. En doen wat Hy sê.
’n Mens se eerste reaksie is om hande in die lug te gooi. Nee wat, dit is mos nie menslik moontlik om net soos Jesus te leef nie! Ons is mos nie so heilig nie. Ons is mos almal maar feilbare sondaarmense. Ja, dis alles waar. Lees net 1 Johannes van die begin af. Johannes vertel vir ons juis dat ons nie sondelose skepsels is nie. Maar as ons ons sondes bely, is Hy getrou en regverdig en vergewe Hy ons sonde. Die volgende stap is nou om in antwoord op sy vergifnis van ons kant ons lewens in ooreenstemming met God se wet in te ruim. As ons sê dat ons die Here ken, sal ons dit ons saak maak om sy woord te gehoorsaam.
En dan sal ons net soos Jesus begin lewe. Ons sal soos Jesus liefhê. Want dit is mos waaroor dit in die wet gaan: om lief te hê. Wie sy woord egter gehoorsaam – in hom het die liefde van God werklik sy doel volkome bereik.
Here, help my om in gesindheid, woord en daad net soos Jesus te lewe. Amen.
Конец ознакомительного фрагмента.
Текст предоставлен ООО «ЛитРес».
Прочитайте
