of “arend”-Christen?
LEES Jesaja 40:27–31
Maar dié wat op die Here vertrou, kry nuwe krag. Hulle vlieg met arendsvlerke. – Jesaja 40:31
Hoenders en arende het albei vere en vlerke, maar daar eindig die ooreenkoms. Die hoender krap in die grond rond; hy kan nie vlieg nie; hy eet en die hen lê eiers tot voordeel van haar voeder. Die arend vlieg egter deur die blou lug wat sy jagveld is; hy is in niemand se diens nie. Die hoender is oorgewig en swak weens die oorvloed kos wat hy gevoer word. Die arend is lenig en taai omdat hy sy voedsel self soek en vang.
Baie Christene vertoon die kenmerke van hoenders. Hul oë is gedurig op die grond in plaas van op die horison. Hulle is oorgewig weens wêreldse ambisies en besittings en te swak om met die vlerke van geloof van die grond af op te styg en te vlieg.
Daar is egter Christene wat deur die genade van God die kenmerke van arende ontwikkel. Hulle onderneem geloofsvlugte wat hulle toets en sterk maak. Hulle vertrou volkome op God se voorsiening sodat hulle waarlik vry kan wees en gelowig kan reik na die son.
Van tyd tot tyd sal ’n “hoender” ’n “arend” sien verbyflits, maar steeds onbewus bly daarvan dat hy in Christus die potensiaal het om die “arendsvlug” van geloof te bereik. En die “arend” ry op die vlerke van die wind en deurklief die vrye ruimtes van God se genade en beskerming.
GEBED
Aan U, o Here, wat magtig is om oneindig meer te doen as wat ons bid of dink, bring ons al die lof en die eer.
16 Februarie
God hou jou hand vas
LEES Jesaja 61:1–11
Ek is baie bly oor die Here, ek juig oor my God, want Hy het my gered. – Jesaja 61:10
Daar is sekere lewenswaarhede wat net droefheid ons kan leer. Daarom kan ons nie net altyd vreugde hê nie. Droefheid is ook nodig, want dit dryf ons na God. In beproewing leer ons God ken soos nooit tevore nie. Wanneer ons na die dieptes van die lewe gedryf word deur droefheid, word ons vertroos deur God Self: “Die uitkoms is hier! Die uitkoms is hier! Bring vir Jerusalem die goeie tyding, sê vir hom sy swaarkry is verby …” (Jes 40:1–2).
Christus sê soms vir ons wat Hy vir sy dissipels gesê het in Markus 6:31: “Kom julle alleen saam na ’n stil plek toe en rus ’n bietjie.” So ’n eensame plek is ons droefheid. Dáár is ons alleen met die Here en ontdek ons weer hoe afhanklik ons van Hom is. In elke donker oomblik, moet ons onthou: God hou ons hand vas “… om aan te kondig dat die tyd gekom het waarop die Here genade betoon … almal wat treur, vertroos, die dag waarop Hy dié in Sion wat treur, eer gee in plaas van smart, vreugde in plaas van droefheid, blydskap in plaas van hartseer” (Jes 61:2–3).
GEBED
Trooster van ons bang gemoed, help my wanneer beproewings oor my pad kom. Dankie dat dit in my lewe nooit so donker word dat u lig vir my verdwyn nie, en dit om Jesus Christus ontwil.
17 Februarie
Beloftes wat troosryk vervul word
LEES Hebreërs 13:1–6
Daarom kan ons met vertroue sê: “Die Here is my helper, ek ken geen vrees nie: wat kan ’n mens aan my doen?” – Hebreërs 13:6
Ons het die vaste belofte dat God ons nooit sal begewe of verlaat nie. En Hy is die God wat sy beloftes waar maak, selfs wanneer dit vir ons onmoontlik lyk.
Aan Jakob het Hy belowe: “Ek is by jou en Ek sal jou beskerm waar jy ook al gaan” (Gen 28:15). Hoe wonderlik het God nie hierdie belofte bewaarheid nie!
Josua ontvang die bemoedigende belofte: “Ek sal jou nie in die steek laat nie, jou nie verlaat nie” (Jos 1:5). En Josua het dag ná dag God se teenwoordigheid ervaar.
Voordat Dawid sterf, versterk hy sy seun Salomo met hierdie woorde: “God die Here, my God, is by jou. Hy sal jou nie aan jouself oorlaat of jou verlaat nie” (1 Kron 28:20).
Hebreërs verseker ons dat hierdie beloftes almal insluit wat in Jesus Christus glo en op Hom vertrou. Ons het God se beloftes so nodig. Te midde van ons eensaamheid verseker Hy ons dat ons nooit alleen is nie, want Hy is dáár, mét ons! En wat Hy belowe, kán en sál Hy doen!
GEBED
Heilige God, U wat in Jesus Christus ook my Vader is, dankie dat ek op u beloftes kan bou deur ’n vaste geloof en deur die verdienste van my Heiland, Jesus Christus.
18 Februarie
God sál antwoord
LEES Jesaja 55:1–13
My gedagtes is nie julle gedagtes nie, en julle optrede nie soos Myne nie, sê die Here … – Jesaja 55:8
Wanneer jy tot God om hulp roep, gee Hom die geleentheid om jou te antwoord. So dikwels draai ons in wanhoop van Hom weg omdat ons nie die geloofsgeduld het om te wag op sy antwoord nie.
Ons moet gewillig wees om te wag – omdat God sy tyd het. Ons moet gewillig wees om sy leiding te volg – omdat God alwetend is. Ons moet gewillig wees om sy bevele te gehoorsaam – omdat Hy nooit ’n fout maak nie. Altyd moet ons die onwrikbare geloof in die hart hê dat Hy weet wat om te doen en wanneer om te handel.
Die geloof sal vir jou gees berusting bring omdat jy sal ondervind dat God altyd, op sy heilige tyd, vir jou nuwe vergesigte sal open.
Al verstaan ons nie sy gedagtes nie en al ken ons nie sy weë nie, sal ons uitvind dat Hy alles in ons lewe ten goede laat meewerk. Dis nie altyd maklik om jou pad saam met God se pad te laat loop nie; om jou weë vir sy weë prys te gee nie, maar gehoorsaamheid bring onberekenbare geestelike wins.
GEBED
Here, my God, dankie dat elke dag saam met U ’n bruisende nuwe avontuur is. Bewaar my daarvan om haastig te word. Skenk my die genade om in stilte op U te wag en U gehoorsaam te volg.
19 Februarie
Wat maak ek met my lyding?
LEES Matteus 11:25–30
My juk is sag en my las is lig. – Matteus 11:30
Daar is baie siekte en lyding in die lewe. Ook ons as Christen-gelowiges kom telkens voor die misterie van lyding te staan. Hoe moet ons dit verstaan en verwerk? Met Jesus Christus as ons Leidsman en die Voleinder van ons geloof is lyding egter ook ’n geleentheid om te leer.
Markus vertel in sy Evangelie hoe Jesus ’n siek man genees het. Hy sê: “Hy het hom eers eenkant toe gevat, weg van die mense af” (Mark 7:33). Soms het God iets om met ons te deel, maar in die drukte van die lewe het ons nie tyd om na Hom te luister nie, of dalk verstaan ons Hom nie mooi nie. Dan neem Hy ons opsy om persoonlik en in stilte met ons te praat.
Het jy al gehoor wat God in jou spesifieke situasie vir jou wil sê? Het jy sy boodskap reg verstaan? Hy praat met jou oor baie dinge wanneer Hy jou so opsy neem: van vrede deur die bloed van Jesus Christus wat ons swakhede op Hom geneem het; van verlossing; van ondersteuning; van genesing; van sy liefde wat sterker is as siekte of dood.
Mag
