en word liefdevol vertroos deur Hom wat op die troon sit. Hul honger word gestil in groen weivelde en hul dors geles by die fonteine van lewende water. God self vee die laaste trane van hul oë af weg (vgl Op 7:16–17).
Die wete dat ons ontslape dierbares die besitters is van hierdie hemel, dring ons om ons te verheug in God se ryke genade. Dit gee ons moed om ons ontwrigte lewens in die geloof te hervat. Wie hierdie troos nie het nie, is aan wanhoop blootgestel. Met God se vertroosting in ons harte kan ons egter onder die grootste droefheid staande bly.
GEBED
Hemelse Vader, vertroos in genade deur u Heilige Gees almal wat treur en sterk hulle om die uitdagings van ’n nuwe lewensfase te aanvaar.
Maart
Dis herfs, Here,
met sy rypheid en rykdom van kleure. Dankie vir geestelike groei en rypwording wat uiteindelik uitloop op rustigheid en vervulling. Dis ook die tyd van die jaar wanneer ons U, Man van smarte, in die gees op u lydensweg volg. Dit was vir die wêreld, ja, maar ook vir my – al u lyding, smaad en smarte, elke kruiswoord – selfs u Godsverlatenheid – was om my ontwil. U het u lewe vir my gegee, dat ek dit nie werd is nie, ten spyt. In diepe dankbaarheid wy ek opnuut aan U my gees en liggaam. Maak my u dissipel en u vreeslose getuie. Laat my deur die kruis die verdoemenis van die sonde besef sodat ek daarvan sal wegvlug. Laat my u liefde in Jesus Christus raaksien sodat ek my toevlug tot U kan neem. Lei my steeds in die lig van u vriendelike aangesig.
Amen
1 Maart
Hy onderhou ons
LEES 1 Petrus 5:1–7
Werp al julle bekommernis op Hom, want Hy sorg vir julle. – 1 Petrus 5:7
Dit is bemoedigend om te weet dat God nie alleen ons Skepper is nie, maar dat Hy ook die getroue Onderhouer van sy skepping is. God weet nie slegs alles van ons nie, Hy sorg ook van dag tot dag vir ons. Daarom moet ons nooit onder die wanindruk verkeer dat ons alleen staan met ons lewensprobleme nie. Bekommernis los geen probleme op nie. Inteendeel, dit is verlammend en laat ons telkens met verleentheid as eindproduk.
Waarom sou ons ons kwel en bekommerd wees as ons weet dat ons ’n almagtige God het wat sorg vir ons en ons onderhou, wat ons liefhet en belangstel in ons? Kwelling eer God nie, maar toon ’n gebrek aan geloof in Hom: “Hy wat selfs sy eie Seun nie gespaar het nie, maar Hom vir ons almal oorgegee het, hoe sal Hy nie saam met Hom ons ook alles genadiglik skenk nie?” (Rom 8:32, 1953-vertaling).
Hy het aan ons sy kosbaarste, sy beste, gegee – sy Seun. Sal Hy ons dan nie ook die dinge gee wat ons op ons lewensreis nodig het nie: genade vir elke beproewing, krag vir elke kruis, voedsel vir elke dag?
GEBED
Ewige Here en Verlosser van my lewe, ek aanbid U vandag as die Leidsman en Voleinder van my geloof. Ek werp my onvoorwaardelik en vertrouend op u liefde en trou.
2 Maart
God is liefde
LEES 1 Johannes 4:7–21
Geliefdes, ons moet mekaar liefhê, want liefde kom van God, en elkeen wat liefhet, is ’n kind van God en ken God. Wie nie liefhet nie, het geen kennis van God nie, want God is liefde. – 1 Johannes 4:7–8
Elke mens kan verval in ’n bestaan van absolute selfsugtigheid en selfgesentreerdheid. Jy kan ’n lewe van absolute liefdeloosheid lei; ’n lewe wat bestaan uit kla en eise stel; van ontevredenheid en selfs bitterheid oor beweerde onregte wat jou aangedoen is. Dit kan veral gebeur wanneer die lewe vir jou ’n ondraaglike kruis opgelê het en jy al klaend daaronder inbuk.
Hoe oorwin ’n mens hierdie negatiewe lewenshouding? In Jesus Christus het God vir ons die volmaakte uitweg gedemonstreer: die pad van die Liefde. Dit is die mees gebalanseerde, nugtere, praktiese en genoeglike manier om te leef. As jy God liefhet en daardie liefde laat uitkring na almal rondom jou, word jy ’n nuwe mens in Christus en tot seën vir jou medemens. Deur jou liefde word jy onlosmaaklik aan God verbind, want God is liefde!
GEBED
Hemelse Vader, gee my die genade om weg te kyk van myself en Christus en my naaste te sien. Gee my die genade om my liefde meer oorvloedig en vrylik te gee sodat die gesindheid van Jesus ook in my lewe tot openbaring sal kom.
3 Maart
Vredemakers vir God
LEES Matteus 5:3–10
Geseënd is die vredemakers, want hulle sal kinders van God genoem word. – Matteus 5:9
Baie mense soek vrede in besittings of deur oorlog te maak. Hulle vind dit nie, want vrede het te doen met mense en geregtigheid, nie met besittings of oorlog nie.
Die taak van ’n vredemaker is ’n Godopgelegde sending. Dit verg positiewe en dinamiese aksie. Die vredemakers ontduik nie verantwoordelikhede nie. Hulle worstel met probleme totdat hulle dit oorwin.
Soek jy vrede? Soek dit in God. Dan sal jy selfs vir jou vyande kan bid. Vrede met God is die begin van jou taak en roeping as vredemaker. Dis nooit genoeg om net vir jouself vrede te verwerf nie; jy moet dit deel met ander. Die seën word tog beloof aan dié wat vrede maak, nie aan dié wat vrede besit nie.
Wanneer daar nie vrede tussen mense is nie, is dit omdat hul verhouding met God nie reg is nie. Christus het gekom om die wêreld met God te versoen en daardeur vrede te skep. As sy getuie moet jy die wêreld oorreed om God se vrede te aanvaar. Dan bereik jy jou hoogste vervulling deur by te dra tot die skep van vrede in hierdie wêreld.
GEBED
O Here, openbaar u liefde in ons sodat ons mekaar sal liefhê en u vrede kan ken.
4 Maart
Ruil vrees vir vrede
LEES 1 Johannes 4:7–21
Waar liefde is, is daar geen vrees nie, maar volmaakte liefde verdryf vrees … – 1 Johannes 4:18
Jy kan God nie ten volle vertrou en tog in vrees lewe nie. As jy toelaat dat vrees jou lewe beheers, sal jou vertroue in God geheel en al verdwyn. Die keuse is joune. God wil dat jy sal kan sê: “Nou sal ek onbesorg gaan lê en dadelik aan die slaap raak, want, Here, U alleen laat my veilig woon” (Ps 4:9).
Om volkome vertroue in God te kan hê vereis van jou ’n sékere kennis van die teenwoordigheid van die lewende God in jou hele lewe. Dan sal jy vrees die finale nekslag toedien.
Wanneer jy dit doen, sal ’n onbeskryflike vrede jou lewe vul. Hierdie vrede is nie selfsugtig nie, maar sal van jou lewe af uitkring om seën te bring aan almal met wie jy in aanraking kom. God se volmaakte vrede kan déúr jou na ander vloei om die vrees in hierdie wêreld te bestry en te oorwin.
Ons toerusting hiervoor is die liefde. Die volmaakte liefde dryf die vrees uit, sodat dit nooit weer oor jou lewe heerskappy voer nie. Dan eis ons uiteindelik ons erfporsie op wat Christus aan ons toegesê het: “Vrede laat Ek vir julle na; my vrede gee Ek vir julle” (Joh 14:27).
GEBED
God van liefde en genade, dankie dat u Seun ook ons vrees weggeneem het. Laat ons liefde vir U alle vrees uit ons lewe verdryf omdat ons volkome op U vertrou.
