Maart
Werp jou kommer op Hom
LEES Matteus 6:25–34
Moet julle dus nie oor môre bekommer nie, want môre bring sy eie bekommernis. Elke dag bring genoeg moeilikheid van sy eie. – Matteus 6:34
Om aanhoudend bekommerd te wees is selfvernietigend. Ons almal ly aan hierdie kwaal omdat ons nog nie die essensie van Christus se woorde begryp toe Hy gesê het nie: “Moet julle nie bekommer oor julle lewe, oor wat julle moet eet of drink nie, of oor julle liggaam, oor wat julle moet aantrek nie … Trouens, wie van julle kan deur hom te bekommer sy lewe met een enkele uur verleng?” (Matt 6:25, 27).
Hoe dikwels het ons nie al ervaar hoe nutteloos en skadelik dit is om aanhoudend bekommerd te wees nie? Onheile wat ons gevrees het, het ons toe nooit getref nie, terwyl ander waaraan ons nie eens gedink het nie, ons wel oorval het. En ná die tyd kon ons getuig dat ons waarlik die krag ontvang het om ons kruis te dra.
Met al ons kommer en gesug kan ons ons lewe nie eens met een sekonde verleng nie. Kommer en ongegronde vrese verwyder net die geluk en vrede uit ons lewe. Laat ons daarom die woorde van 1 Petrus 5:7 elke dag in ons harte wegbêre en gelowig gebruik wanneer bekommernisse oor ons toesak: “Werp al julle bekommernisse op Hom, want Hy sorg vir julle.”
GEBED
Here, versterk my geloof. Dankie dat ek niks hoef te vrees as U met my is nie. Help my om my oë op U gevestig te hou.
16 Maart
Vrede – God se liefdesgeskenk
LEES Lukas 2:8–20
Eer aan God in die hoogste hemel, en vrede op aarde vir die mense in wie Hy ’n welbehae het! – Lukas 2:14
Baie mense benader die lewe met die vraag: Wat kan ek uit die lewe kry? Christene vra egter: Wat kan ek aan die lewe gee?
As ons Christenskap vir ons slegs ’n kwessie is van wat ons kan kry en nie van wat ons kan gee nie, verstaan ons nie die betekenis van God se vrede nie. Om te gee is ’n Goddelike beginsel. God gee altyd: lewe en krag; vergifnis; sy Seun, en saam met Hom ook sy vrede. As antwoord op sy liefde moet ons ons lewe aan Hom wy en boodskappers word van sy vrede.
Wanneer ons God se geskenk van liefde aanvaar, word dit ons lewenstaak om sy Naam te verheerlik. Daarby moet ons vredemakers word wat volhard om die wêreld te probeer oortuig dat God alleen die wêreld se hoop op vrede is. Wanneer ons God liefhet en in alles verheerlik, gee dit ons die krag om Hom te dien en ware vredemakers te wees.
Vir hierdie taak sal die Heilige Gees ons toerus; ons leer en lei; ons verstand verlig, ons harte verwarm en ons siele ophef tot aanbidding. So word God se liefdesgeskenk deur die werk van sy Gees ’n werklikheid in ons lewe.
GEBED
Here, ek wil graag u vredesboodskapper in hierdie wêreld wees en die glorie van u liefde en vrede met ander deel. Maak my daartoe geskik deur u Gees.
17 Maart
Jy het ’n identiteit
LEES Ester 4:1–17
Wie weet, miskien is dit juis met die oog op ’n tyd soos hierdie dat jy koningin geword het! – Ester 4:14
Die woord “identiteitskrisis” het ’n modewoord geword. “Wie is ek?” is ’n vraag wat op ons lippe bly van ons jeug tot in ons gryse ouderdom. Laat ons dan uit die staanspoor vir mekaar sê: Jy is ’n unieke skepping van God; na sy beeld het Hy jou gemaak. Jy is ’n Koningskind, al is jy deur sonde geskend. Jy word geroep om jou kindskap waardig uit te leef.
God het aan elkeen van sy kinders ’n eie identiteit, aard en persoonlikheid gegee. Geen ander mens op aarde kan jou plek inneem nie. Daarom moet jy jou nooit laat verswelg deur die identiteitlose massa nie. Dat jy ’n kind van God is, is nie ’n vrypas tot hoogmoed nie, maar ’n genadegawe van God en ’n oproep om waardig en met selfvertroue te lewe.
Geloof in Jesus Christus lei tot die ontdekking van jou ware self. Valse hoogmoed; minderwaardigheid wat jou geestelike groei vertraag; onsuiwere waardes wat jou lewensperspektief belemmer – dit alles word oorwin en gesuiwer deur die krag wat Christus jou skenk.
Daar is geen hoër lewensvervulling as om jouself te wees nie en geen groter vreugde nie as om te weet dat jy leef volgens die wil van God.
GEBED
Ek word stil voor U, Here Jesus, sodat U my deur u Heilige Gees kan leer om te word wat U bedoel het dat ek moet wees.
18 Maart
Wag gelowig
LEES Jesaja 55:8–13
My gedagtes is nie julle gedagtes nie, en julle optrede nie soos Myne nie, sê die Here … – Jesaja 55:8
Elkeen van ons het die een of ander tyd in ons lewe hulp nodig, soms dringend. As ons dan vir God om hulp vra, moet ons Hom tyd gee om ons te antwoord. God hanteer ons krisisse en nood dikwels heel anders as wat ons dit sou doen.
So dikwels draai ons in ons nood na God toe met paniek in ons harte. Ons prewel ’n haastige gebed en verwag dat God onmiddellik moet antwoord. Wag eerder gelowig op God. Dan sal jy nooit teleurgestel word nie. Moenie slegs biddend op God se leiding wag nie, wees ook sensitief vir sy wil. Jy kan nie aan Hom voorskryf nie. Wat Hý egter voorskryf, moet jy nougeset nakom.
Só ’n gehoorsaamheid maak telkens vir ons nuwe vergesigte oop. Dinge begin in ons lewe gebeur wat ons nooit gedink het moontlik sou wees nie. Ons sien God aan die werk in ons lewe op ’n verstommende wyse en dit bring verwondering en opwinding mee. Daar is geen eentonigheid en sleurgang in ons lewe meer nie en sy teenwoordigheid word vir ons ’n heerlike werklikheid. Wat meer kan ons verlang?
GEBED
Vader, bewaar my daarvan om u wil vir my lewe te probeer buig. Help my om in u wil te wandel en te buig voor u gedagtes omdat U die beste weet wat ek nodig het en dit sal voorsien.
19 Maart
Vrees ontmasker
LEES Jesaja 12:1–6
God is my redder; ek vertrou op Hom, ek is nie meer bang nie. Die Here my God is my krag en my beskerming; Hy is my redder. – Jesaja 12:2
Dwarsdeur die Bybel sê God aan sy kinders: Moenie vrees nie!
Aan Israel voor die Rietsee sê Hy: “Moenie bang wees nie. Staan vas, kyk hoe die Here julle vandag gaan red” (Eks 14:13). Hy bemoedig Josua met die woorde: “Wees sterk, wees vasberade. Moenie skrik nie, moenie bang wees nie, want Ek, die Here jou God, is by jou oral waar jy gaan” (Jos 1:9).
Met Christus se geboorte sê die engele aan die herders: “Moenie bang wees nie …” (Luk 2:10). Toe Hy op die see geloop en sy dissipels bang was, sê Hy: “Wees gerus, dit is Ek. Moenie bang wees nie” (Matt 14:27). In sy laaste gesprek met hulle gee Jesus hulle die troos: “Julle moet nie ontsteld wees nie, en julle moet nie bang wees nie” (Joh 14:27).
In spanning, droefheid en pyn sê God liefdevol vir jou: “Moenie bang wees nie.” Jy is sy kind. Skuil by Hom. Hou vas aan Hom, want Hy het jou lief. Leef elke oomblik vanuit
