Lees eers Genesis 44:1–14
Tyd van toetsing
“En my beker, my silwerbeker, moet julle bo in die sak van die jongste sit saam met die geld vir sy graan” (Gen 44:2).
GESELSVRAAG: Wat is die swaarste toets wat jy al moes deurstaan?
“’n Juweel kan nie gepoleer word sonder wrywing nie, en ’n mens ook nie sonder beproewings nie,” lui ’n ou Sjinese spreekwoord. John Newton het geskryf: “Beproewings is die medisyne wat ons bedagsame en wyse Geneesheer voorskryf omdat ons hulle nodig het. Hy besluit hoe dikwels ons dit nodig het, en watter sterkte. Ons kan Hom vertrou en Hom dank vir sy voorskrif.”
Josef wou homself aan sy broers bekend maak, maar hy wou eers vasstel of hulle al verander het. Sou hulle hul kleinboet ook in die steek laat soos vir hom, of gee hulle darem nou al vir mekaar om? Daarom lees ons van hierdie ongewone opdragte aan sy bediendes. Ek wonder wat die bediendes daarvan gedink het! Maar dit het die gevolg gehad dat hulle almal weer sak en pak teruggekom het, en hy kon sien hoe hulle verander het.
Beproewings is nooit lekker nie, maar ons kan seker wees dat hulle uiteindelik tot ons beswil is. Die Here wat ons gemaak het, weet hoeveel druk ons kan verduur. Hy is lief vir sy kinders en waak oor ons. Hy wil ons heilig maak en vorm as sierade vir die ewigheid. Daarvoor is teëspoed soms nodig. Maar Hy stel ons in staat om dit te hanteer (2 Kor 10:13).
GEBED: “Here, ek vertrou U in elke beproewing. Dra my deur elkeen en help my om sterker anderkant uit te kom.”
Lees vanaand in Genesis 44:15–34 Juda se roerende pleidooi sodat Benjamin weer huis toe kan gaan.
SATERDAG 2 MAART 2013
Lees eers Genesis 45:1–13
Die groter plan
“ ... God het my voor julle uit gestuur om lewens te red” (Gen 45:5).
GESELSVRAAG: Wat was jou grootste verrassing?
“Ek het na Suid-Afrika gekom om werk te soek sodat my familie by die huis nie van honger hoef dood te gaan nie,” vertel ’n Zimbabwiër. So vind ons goed gekwalifiseerde mense wat gewillig is om motors vir ’n karige inkomste by die inkopiesentrum op te pas, want dit is nog baie beter as in hul tuisland. Josef het besef dat sy beproewings uiteindelik tot almal se beswil was. God was in beheer.
Die elf broers het hierdie vreeswekkende verskynsel net as Safenat- Paneag geken (Gen 41:45). Hy het soos ’n Egiptenaar gelyk en geklink. Hulle het nie in hul ergste nagmerries gedroom dat hy die gehate boetie was wat hulle 21 jaar vantevore eers wou doodmaak en toe as slaaf verkoop het nie. Geen wonder hulle was doodverskrik nie (Gen 45:3). Maar die slegte nuus het vir hulle goeie nuus geword. Hy wou hulle nie straf nie – hy wou hul lewens red en hulle help! Alles wat gebeur het, was deel van God se plan!
Jesus het sy dissipels ook verras toe Hy op die see na hulle toe aangestap kom en Homself aan hulle bekend maak. Saulus van Tarsus het Hom ook so op ’n onverwagte manier op pad na Damaskus leer ken, en dit het sy lewe vir altyd verander. Elkeen van ons het seker ook ’n storie van hoe Christus Homself aan ons openbaar het. Hy het gekom sodat ons die ware lewe kan hê!
GEBED: “Dankie vir my grootste verrassing, Here Jesus.”
Lees vanaand in Genesis 45:14–28 hoe die goeie nuus by Jakob uitgekom het.
SONDAG 3 MAART 2013
Lees eers Psalm 89:12–18
Eienaarskap
“Aan U behoort die hemel, aan U behoort ook die aarde, die wêreld en alles daarin” (Ps 89:12).
GESELSVRAAG: Watter reg het die Here op ons besittings?
“My plaas is my plaas; my geld is my geld; ek het hard gewerk daarvoor en ek het ryk geword deur dit nie weg te gee nie,” sê ’n ou boer toe die diaken by hom kom kuier. Hy was nie gewillig om enige dankoffer te gee nie. Hy het vergeet dat sy plaas nie eintlik aan hom behoort nie, maar aan die Here. Sy liggaamskrag het hy van die Here gekry. So ook sy vermoë om te beplan. Die reën kom van die Here af. Die suurstof wat hy elke dag inasem om van te lewe, kom van God af. God het beplan dat plante suurstof vir ons moet produseer. Die groeivermoë van elke plant is God se werk. Die oeste is God se seën. Die grond is sy skepping en behoort nog steeds aan Hom.
Ons kan dus verstaan dat dit sy hart seermaak as sy skepsels Hom nie wil erken nie. Hulle wil nie tyd maak om saam te kom om Hom te loof nie. Hulle is doelbewus ongehoorsaam aan sy gebooie wat Hy vir hul eie beswil gegee het. Hulle kies om in sonde te lewe. Hulle maak self hul eie afgode om op sy dag te dien.
Nietemin het die Here Jesus aarde toe gekom om ’n pad oop te maak dat sondaars gered kan word. Hy het kom ly en sterf sodat ons sondes weggeneem kan word. Hy het ons rekening kom betaal. Hoe kan ons anders as om Hom vandag heelhartig te dien?
GEBED: “Ek loof U vir u groot liefde, Here Jesus. Dankie dat U u lewe vir my kom gee het.”
Lees vanaand in Psalm 89:19–28 hoe elke regeerder ook in die hand van die Here is.
MAANDAG 4 MAART 2013
Lees eers Genesis 46:1–7
Nooit alleen nie
“Ek gaan saam met jou Egipte toe ...” (Gen 46:4).
GESELSVRAAG: Wanneer het jy die eensaamste gevoel?
“Ek was baie bekommerd toe ons oudste in sy dienspligjare grens toe gestuur is, tot ek besef het dat die Here ook daar is. En Hy kan beter vir ons kinders sorg as wat ons dit kan doen.” Ons God is nie net ’n plaaslike godjie nie. Hy is die Skepper en onderhouer van die heelal. Daar is geen plek in die ondenkbaar groot heelal waar Hy nie is nie.
Jakob was seker ook onrustig toe hy genooi word om na Egipte te versit. Moet hy dan nou die God wat so dikwels met hom gewerk het, agterlaat? Was die offer wat hy gebring het, dalk ’n manier om totsiens te sê? Die Here het toe weer aan hom in ’n visioen verskyn om hom te verseker dat Hy nie agterbly nie. Hy is ook in Egipte. Jakob hoef dus nie bang te wees nie. God sal ook daar vir hom sorg. God sal hom daar ook seën en sy nageslag sou ’n groot nasie word.
Miskien moet jy ook verhuis. Dalk dink julle aan emigreer, of jy word verplaas na ’n ander deel van die land of die wêreld. Onthou, God is ook daar. Jy sal ook daar ander kinders van die Here raakloop. Julle sal mekaar daar ook kan bemoedig. Of as jy na ’n plek moet gaan waar daar geen ander kinders van die Here is nie, moet jy weet dat die Here jou met ’n doel daarheen stuur. Hy is reeds daar besig om harte voor te berei. Hy wil jou gebruik om die goeie nuus van Jesus met iemand anders te deel.
GEBED: “Here, U kan my na enige plek toe stuur. Dankie dat U ook daar is.”
Lees vanaand in Genesis 46:8–34 van die blye ontmoeting tussen vader en seun ná soveel jare van hartseer.
DINSDAG 5 MAART 2013
Lees eers Genesis 47:1–12
Die wêreld is ons woning nie
“Ek is nou al honderd en dertig jaar ’n vreemdeling hier op aarde” (Gen 47:9).
GESELSVRAAG: Waar is jou ideale woonplek?
