vanaand in Matteus 8:5–17 hoe Jesus ’n soldaat se geloof beloon en Jesaja se profesie vervul het.
DONDERDAG 21 MAART 2013
Lees eers Matteus 8:18–27
Menseregtedag
Regte mense
“Meneer, ek sal u volg waar u ook al gaan” (Matt 8:19).
GESELSVRAAG: Wanneer moet ’n mens jou regte prysgee?
“Ons staan vir jou regte,” belowe een van die politieke partye in die verkiesing. Elke mens het tog regte wat in die grondwet verskans is. Jy het reg daarop. Maar as jy vir Jesus wil volg, vra Hy jou dalk om van al jou regte afstand te doen, soos Hy gedoen het. Sal jy Hom dan nog volg?
Jesus kon bly wees dat ’n skrifgeleerde, een van sy vyande, aankondig dat hy Hom voluit wil volg. So iemand sou tog baie meer beteken as twaalf vissers. Sy woorde klink na algehele toewyding. Maar Jesus ken elke mens se hart. Hy het geweet hoe om hierdie man te antwoord. Hy wys daarop dat Hy Self al sy menseregte prysgegee het. Jakkalse het gate en voëls neste, maar Hy het nie eens ’n huis of ’n bed gehad nie. Hy was gewillig om soos die armste van die armes in die veld te slaap. Hy het baie kilometers met sy twee voete geloop. Hy het werklik omgegee vir mense wat niks het nie. Enigeen van hulle kon na Hom toe kom, want Hy was soos een van hulle. Dit is maklik om beloftes te maak as dit moontlik tot jou voordeel kan strek, maar Jesus se pad is dikwels die moeilikste van almal. Is jy werklik gewillig daartoe? Sal jy met vreugde in ’n plakkerskamp gaan woon? Elke dag met ’n taxi of derdeklastreinwa werk toe gaan? Elke dag in lewensgevaar verkeer? Kan jy werklik hierdie skrifgeleerde se woorde nasê en dit bedoel? Dan kan jy maar kom …
GEBED: “Here, maak my gewillig om U voluit te vertrou.”
Lees vanaand in Matteus 8:28–34 hoe twee duiwelbesetenes verlos is en waarom Jesus nie langer daar welkom was nie.
VRYDAG 22 MAART 2013
Lees eers Matteus 9:1–8
Vir wie dra jy?
“Toe Jesus hulle geloof sien, sê Hy vir die verlamde: ‘Vriend, wees gerus; jou sondes word vergewe’” (Matt 9:2).
GESELSVRAAG: Wie het vandag ons voorbidding nodig?
“Dit is oor jou ongeloof dat jy nie genees word nie,” is die liefdelose opmerking van sommige goedbedoelende gelowiges. Hulle laai die las van ongeloof nog boonop op die sieke. Alles hang van die sieke af. Genesing is ’n doen-dit-self projek, soos hulle dit sien. En as iemand nie gesond word nie, is dit sý skuld, nie dié van die selfaangestelde geloofsgeneser nie.
Die Bybel praat anders. Daar is wel geleenthede dat die sieke se geloof ’n rol gespeel het, maar gewoonlik is dit die genade van die Here wat alles gedoen het. En soms sê die Here “nee”, soos in Paulus se geval (2 Kor 12:9). Almal word nie genees nie. Soms gebruik die Here beproewing om sy kinders nader aan Hom te trek.
Dit tref ons egter in vandag se geskiedenis dat Jesus die geloof van die vier vriende raakgesien het. Hy het ook geweet dat die grootste behoefte van hierdie sieke nie genesing was nie, maar vergifnis. Hy begin dus by die eintlike probleem: sonde. En dan bewys Hy dat Hy die gesag het om sondes te vergewe deur die verlamde man sommer so terloops ook te genees. Vir wie bid jy? Glo jy dat die Here hom of haar gaan aanraak en verander? Christus sien jou geloof raak. Vertrou op Hom. Hy hoor jou gebed.
GEBED: “Here Jesus, maak my getrou in my voorbidding vir ander.”
Lees vanaand in Matteus 9:9–17 hoekom ons nie net met ons eie klein groepie te doen moet hê nie. Ander het Jesus ook nodig.
SATERDAG 23 MAART 2013
Lees eers Matteus 9:18–26
Die krag van geloof
“Wees gerus, dogter, jou geloof het jou gered” (Matt 9:22).
GESELSVRAAG: Hoe kan ons ons geloof versterk?
“As ’n mens nie glo nie, is dit onmoontlik om te doen wat God wil. Wie tot God nader, moet glo dat Hy bestaan en dat Hy dié wat Hom soek, beloon,” lees ons in Hebreërs 11:6. Waar kry ons hierdie soort geloof wat werklik ’n verskil maak in ons lewe? Kan ons dit self oppomp? Is dit ’n soort van hoop-vir-die-beste?
Matteus is nog steeds besig om ons te vertel hoe geloof dinge kan verander. Ons lees van hierdie arm vrou wat al haar geld op dokters uitgegee het en tog nie gehelp is nie. Sy het alles verloor. Haar saak was hopeloos. En toe hoor sy van Jesus. Sy het gehoor dat Hy ander mense genees het. Miskien ... Weens haar siekte is sy as onrein beskou. Sy mag nie met ander mense gemeng het nie. Sy mag nie tempel toe gegaan het nie. Sy mag dus nie deel van hierdie skare om Jesus gewees het nie. Sy mag nie met Hom gepraat het nie. As sy nou maar net die soom van sy klere kon aanraak, kon dit dalk help. Indien dit sou werk, kon sy weer tussen die skare verdwyn het. En sou dit nie werk nie, sou niemand weet van haar waagstuk nie. Maar Jesus het geweet. Hy wou haar help. Almal moes weet dat sy nou genees is. En sy moes weet dat haar vertroue op Hom, nie op sy klere nie, die verskil gemaak het. Soek jy dus ’n sterk geloof? Leer Hom net ken. Hy openbaar Homself in die Woord van God. Dan sal jy weet dat jy Hom kan vertrou.
GEBED: “Here, gee my al die geloof wat ek vandag nodig sal hê.”
Lees vanaand in Matteus 9:27–34 meer oor die krag van geloof en hoe ongelowiges dit probeer afmaak.
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.
