het.
Donderdag 20 Maart 2014 Lees eers Markus 7:1-13
Tradisie
So ontneem julle die woord van God sy gesag deur julle oorgelewerde gebruike wat julle op julle beurt weer oorgelewer het […] – Mark 7:13
GESELSVRAAG:
Aan watter vreemde tradisies kan ons dink?
“Jy weet, ek kan dit nie vat as ’n man bly sit wanneer ’n dame die kamer binnekom nie. Hoe is hulle dan geleer?” vra oom Willie. Dit lyk nie asof almal dieselfde tradisie het nie. “Julle kan ons enigiets leer, wys ons net waar staan dit in die Bybel,” sê kerkleiers van die Afrika Onafhanklike Kerke. Toe hulle dus vra om hulle te help om ’n kerkorde saam te stel, het ek gou my Kerkorde van die rak af gehaal. Maar o wee, baie min van wat daarin staan kom uit die Bybel. Is ons tradisies vir ons belangriker?
Die Fariseërs en die skrifgeleerdes het van kleins af geleer hoe ’n mens dinge doen. Maar daardeur het hulle juis nie meer die Bybel gehoorsaam nie, soos ons vandag gelees het. Uiterlike dinge was vir hulle so belangrik dat hulle nie meer gevra het wat vir God belangrik is nie.
In die verlede het die Kerkorde selfs bepaal dat die drag tydens vergaderings swart pakke en wit dasse moes wees. Dit het meegebring dat sinodale besluite nie wettig was indien almal nie só geklee was nie! Dit is mos belaglik. Deesdae is die kleredrag in die meeste gemeentes baie meer informeel. Jesus en sy dissipels het doodgewone drag gedra. Ons kan ook.
GEBED:
Here, help my om aan die gesag van u Woord vas te hou.
Lees vanaand in Markus 7:14-23 die belangrike les dat wat vanuit ons harte kom dikwels meer skade doen as wat ons in ons lywe sit.
Vrydag 21 Maart 2014 Lees eers Markus 7:24-30
Menseregtedag
Regte behandeling
[…] Here, die hondjies eet darem onder die tafel die kindertjies se oorskiet. – Mark 7:28
GESELSVRAAG:
Hoe weet ons wat die regte ding is om te doen?
“Ons eis ’n 12%-verhoging, al is die inflasiekoers net 4%,” sê die vakbond. Maar daardie geld moet iewers vandaan kom. Indien die inkomste nie met 12% groei nie, moet 12% van die werkers dan afgedank word, of die maatskappy moet sluit en dan is almal werkloos. Dit is deesdae nie so maklik om ’n sakeleier – of vakbondleier – te wees nie.
Jesus was besig om buite Israel se grense te beweeg. Tog selfs daar het die mense van Hom gehoor. En ’n vrou was dringend op soek na hulp. Jesus wou haar eers vertel sy het geen reg op sy hulp nie, maar sy het Hom gou terug geantwoord dat sy met die krummels tevrede sal wees. Ons kan ons indink hoe breed Hy geglimlag het toe sy nie op haar regte aandring nie, maar gewillig was om ’n hond genoem te word. Met haar sin vir humor het sy by sy woorde aangehaak. Haar gebed is verhoor.
Vandag word baie vergaderings oor menseregte gehou. Ongelukkig bly dit dikwels maar by woorde, en nie dade nie. Tog moet ons ons afvra: Is dit reg hoe mense behandel word? Daar is goeie rede vir baie van die ongelukkigheid. Hoe kan ons mekaar werklik help sodat dit ’n wen-wen-situasie is? Ons optrede teenoor ander beïnvloed hul verstaan van die evangelie.
GEBED:
Here, help ons om mekaar reg te behandel.
Lees vanaand in Markus 7:31-37 hoe Jesus aan ’n dowe verduidelik wat Hy vir hom wil doen. Vir Jesus is alles moontlik.
Saterdag 22 Maart 2014 Lees eers Markus 8:1-10
Hy maak die onmoontlike moontlik
[…] Waar sal ’n mens in hierdie verlatenheid genoeg brood vir hulle kan kry? – Mark 8:4
GESELSVRAAG:
Wat is die grootste uitdaging wat nou op ons wag?
“Hoe kan ons die mense help om hulself te help?” vra my vrou ná die soveelste bedelaar vir ’n “stukkie brood” kom aanklop het. Dit is nie waar dat almal skelms of leuenaars is nie. Baie van hulle is werklik in die nood. Hoe kan ons hulle help?
Jesus het weer ’n skare van etlike duisende gehad wat in die veld na Hom kom luister het. Sy boodskap was vir hulle so belangrik dat hulle nou al drie dae by Hom was sonder om huis toe te gaan om te gaan eet. Praat van toewyding! ’n Uur lange diens was nie vir hulle genoeg nie. Hulle was ook nie eens naby hul huise nie – die dissipels praat van die verlatenheid. Húlle het darem nog ’n paar brode en visse oorgehad, maar wat is dit vir so baie mense? Weer het Jesus gewys wat Hy kan doen. Hy het alles geneem wat hulle gehad het en gesorg dat dit vir almal genoeg is. Nou sou die skare genoeg krag hê om by hul huise te kom. Christus gee werklik om vir mense!
Miskien is jy ook vandag in daardie posisie dat jy niks het om te eet nie. Jesus weet. Hy wil voorsien. Of, meer waarskynlik, is jy in die posisie dat jy wel iets het wat Hy kan gebruik. Is jy gewillig om dit in sy hande te gee? Die mense wat al hul kos weggegee het, het nog steeds genoeg gekry om te eet – en daar was nog sewe mandjies vol kos oor vir die pad terug! Lewe met Jesus is ’n avontuur!
GEBED:
Wys my wat U deur my wil doen om mense te help.
Lees vanaand in Markus 8:11-21 hoe Jesus moedeloos geraak het oor sy dissipels se stadige vordering. Hoe voel Hy oor jou?
Sondag 23 Maart 2014 Lees eers Psalm 135:13-21
Nuttelose gode
[…] oë het hulle, maar sien kan hulle nie; ore het hulle, maar hoor kan hulle nie […] – Ps 135:16-17
GESELSVRAAG:
Watter afgode kan werklik ’n verskil maak?
“Daardie beeld van Boeddha stel hom voor waar hy slaap; as dit hom voorstel waar hy dood is, is sy twee voete langs mekaar,” verduidelik die gids in Sri Lanka. Die beeld is seker 4 m lank en veelkleurig geverf, soos die gewoonte daar is. Maar mense het ook handgemaakte kombersies oor hom gegooi, van aanbidders wat hom wou omkoop om hul gebede te verhoor. Suiwer Boeddhisme is eintlik ateïsties, maar die bidders van Sri Lanka het dit nog nie verstaan nie. Hulle het hulp kom soek, nie selfhelp-raad nie.
Dwarsoor die wêreld bid mense vandag tot hul verskillende gode. Hierdie psalm wil ons herinner dat daar net een lewende God is – die God van die Bybel. Net Hy kan gebede verhoor. Net Hy gee om vir sy volgelinge. Die ander gode is almal mensgemaak – hulle kan nie sien of hoor nie. Hulle haal nie eens asem nie. Dit is mos dom om op sulke gode te vertrou. Alle godsdienste is nie gelyk nie.
Dit is een ding om hierdie feit te verstaan, maar ’n ander om daarvolgens te lewe. Dit gaan nie oor wie reg het nie, maar oor wat waar is. En as jy die waarheid ontdek het, bring dit ook ’n verantwoordelikheid mee. Die Here wil jou vandag ontmoet en jou toerus vir die week wat voorlê. Skryf vanaand die opdrag neer wat jy vandag by Hom gehoor het.
GEBED:
Here, gee my die kans om nog iemand na U te lei.
