in Eksodus 14 lees hoe die Here ’n pad deur die see gemaak het. “Nee, man, dis geen wonderwerk nie, ek was self daar by die Rietsee, die see is net enkeldiep,” verduidelik sy nuwe vriend. “O.” Hy lees toe verder. “Prys die Here!” roep hy weer. “Wat nou?” vra sy vriend. “Ek lees nou net hoe die hele Egiptiese weermag in enkeldiep water verdrink het!”
Vir die Israeliete was daar geen twyfel dat die Here ’n wonder gedoen het nie. Om so baie mense in een nag deur die Rietsee te neem, moes hulle duisende langs mekaar gestap het. Die wolk het hulle beskerm, sodat daar lig was aan hulle kant maar duisternis aan die Egiptenare se kant. En toe die soldate hulle wou agtervolg, het hul strydwaens vas geval. Die wiele val uit. Paniek het onder die soldate los gebreek en hulle het probeer omspring, maar die massas water het hulle en hul diere oorstroom. Met hul pantserdrag kon hulle nie swem nie. En die Israeliete het in verbasing gestaan en kyk hoe die Here hul stryd vir hulle stry. Waarlik, God is die God van wonders.
GEBED:
Dankie dat U nog net so magtig is soos in daardie tyd, Here. Dra ons ook deur hierdie jaar se uitdagings.
Lees vanaand in Eksodus 15:1-9 die eerste deel van Moses se lied om die Here te dank vir wat Hy gedoen het.
Dinsdag 21 Januarie 2014 Lees eers Eksodus 15:10-19
Wie is soos die Here?
Wie van die gode is soos U, Here? Wie is soos U, so hoog geëer en heilig? In lofsange word U vereer, Bewerker van wonderdade! – Eks 15:11
GESELSVRAAG:
Watter lied ken jy wat ’n Bybelstorie vertel?
“In Afrika kan ’n lied amper spontaan ontstaan,” vertel ’n sendeling. “In een kerkraadsvergadering het die skriba sy notuleboek vergeet, toe begin die ander spontaan ’n lied daaroor komponeer en sing.” So het ons in Chicago verstom geluister hoe ’n blinde musikant tydens ’n diens oombliklik enige kerkganger se getuienis in ’n lied omskep het. En die musiek het by die woorde gepas. Dit is net die Here wat so iets moontlik kan maak.
Moses en Miriam het dadelik ingeval met ’n lied, en die volk het die refrein oorgeneem. Tipies soos in Afrika het Miriam en die vroue die ritme met tamboeryne en dans aangegee. Oor en oor is die lof van die Here besing, totdat elke Israeliet die lied goed geken het. Dit sou hulle help om dié gebeurtenis te onthou en aan hul nageslag oor te vertel.
In die lied word ook genoem hoe hierdie lied deur die omringende volke gehoor is en hulle van angs laat bewe het (Eks 15:16). Ons kan ons voorstel hoe hierdie groot massa mense deur die woestyn getrek het en hierdie lied oor en oor gesing het. Skrikwekkend! Hierdie mense se God is onstuitbaar! En daardie God is dieselfde God wat ons vandag nog in ons lofsange dien.
GEBED:
Gee vir my ’n nuwe lied om U mee te loof, Here.
Lees vanaand in Eksodus 15:22-27 hoe die Here in die woestyn in die nood na water voorsien het.
Woensdag 22 Januarie 2014 Lees eers Eksodus 16:1-10
Moeilike volgelinge
In die woestyn het die hele volk hulle teenoor Moses en Aäron begin verset […] – Eks 16:2
GESELSVRAAG:
Wat doen mense vandag as hul leiers hulle teleurstel?
“Niemand is ’n leier as hy nie volgelinge het nie.” Daarom probeer so baie leiers hul volgelinge paai met baie beloftes wat nie gerealiseer kan word nie. Volgelinge het die neiging om mense aan te val, in plaas daarvan om saam te werk om die probleem te oorkom. Veral wanneer ander mense hard gewerk het om hulle te help.
Die Israeliete se padkos het ná ’n maand begin opraak. En dit was toe Moses se skuld. Hulle het terug gedink aan die “goeie ou dae” in Egipte, en geriefshalwe van hul swaarkry as slawe vergeet. Moses het ’n lewende verhouding met God gehad en het mooi geluister na alles wat die Here vir hom gesê het. Hy het dus geweet van die kos wat in die vorm van voëls en die manna sou kom. Die kos vir die menigte was nie die probleem nie, maar wel die geestelike vlakheid van die volk. Die Here het sy magtige teenwoordigheid toe weer aan die volk getoon. Hulle moes weet Hy is daar en Hy sou sorg. Maar ook dat Hy heilig is en gehoorsaamheid vereis.
Ons is nie net in baie opsigte leiers nie. Ons is ook volgelinge. Watter soort volgelinge is ons? Kla ons gedurig en vind met alles fout? Dan maak ons dit baie moeilik vir ons leiers. Besef ons dat die Here bo alles ons Koning is? In tye van nood is dit dalk beter om op ons knieë te gaan sodat ons Hom beter kan leer ken.
GEBED:
Here, ek wil U in elke beproewing beter leer ken.
Lees vanaand in Eksodus 16:11-21 hoe die Here vleis en brood in die woestyn voorsien het.
Donderdag 23 Januarie 2014 Lees eers Eksodus 16:22-30
God se dag
Die volk het op die sewende dag gerus. – Eks 16:30
GESELSVRAAG:
Hoe kan ons ons rusdag reg deurbring?
“Hoe moet ek lewe om ouer as honderd jaar te word?” is deur ’n span wetenskaplikes nagevors. Hulle het gevind daar is vier plekke op aarde waar mense baie oud word. Hulle het gekyk na hul kultuur, hul voedsel, hul werk en hul motivering. Een van die groepe was Sewendedagadventiste in Wes-Amerika. Die navorsers was oortuig daarvan dat hul noukeurige gebruik van die rusdag een van die geheime is van hul lang lewe. Hulle het net noodsaaklike werk gedoen en verder gerus of in groepe in die natuur gaan stap.
Die rusdag is een van die groot tekens van gehoorsaamheid. Dit is een van die Tien Gebooie. Maar selfs voor die gebooie gegee is, wou die Here die volk leer om een dag in die week aan Hom af te staan. Dit het Hy gedoen deur op daardie dag geen manna te voorsien nie. Maar die vorige dag was daar dubbel soveel as gewoonlik. Hulle kon dus rus en tyd maak om die Here beter te leer ken. Dit is vir hulle en die Here belangrik.
Deesdae het die Sondag die sportdag, inkopiedag en plesierdag geword. Mense kry nie meer die rus wat die Here in ons liggame ingebou het nie. Die dag van die Here is bedoel om ons geestelik op te bou. Dit is die geleentheid om saam te kom en die Here beter te leer ken. Ons kry ons toerusting en opdrag vir die week wat voorlê. Hoe lyk jou rusdag?
GEBED:
Ek wil graag my rusdag aan U wy, Here.
Lees vanaand in Eksodus 16:31-36 hoe die Here die volk veertig jaar lank in die woestyn gevoed het.
Vrydag 24 Januarie 2014 Lees eers Eksodus 17:1-7
Dors op bevel van die Here
[…] Maar daar was geen water vir die volk om te drink nie. – Eks 17:1
GESELSVRAAG:
Gaan dit altyd goed wanneer ons gehoorsaam is aan die Here?
“As ek een van die Israeliete was, sou ek ook gekla het. Hoekom trek hulle na ’n plek waar daar nie water is nie?” sê ’n selgroeplid. Dié van ons wat al regtig dors was, sal weet dat dit glad nie lekker is nie. Sonder water kan jy nie langer as drie dae lewe nie.
