as ongebalanseerd. Gevolglik swyg jy oor die heel belangrikste aspek van jou lewe.
As jou geloof vir jou ’n werklikheid is, sal jy dit nie verborge kan hou nie. Jou lewe sal dit wys. Dit is alleen wanneer ’n persoon se lewe nie ooreenstem met sy geloofsoortuiging nie, dat hy die feit probeer wegsteek dat hy ’n gelowige volgeling van Jesus Christus is.
Wanneer Christus sentraal staan in jou geloof en godsdiensbeoefening en jy bewus is van jou verbintenis met Hom – soos die loot in die wingerdstok – is dit nie meer belangrik wat ander sê of doen nie. Jy weet vir jou is Christus die lewe en jou hoogste ideaal is om Hom te gehoorsaam. Jy sal jou blydskap en opwinding nie wil wegsteek nie, maar dit liewer met ander wil deel.
Jesus Christus, U is die Bron van al my vreugde. Dankie dat U elke dag ’n lewende werklikheid in my lewe is.
12 Februarie
Romeine 7:12–20
Gevaarlike selfminagting
Ek, ellendige mens! Wie sal my van hierdie doodsbestaan verlos? – Rom 7:24
~
Daar is baie mense wat minderwaardig voel en nog voor hulle ’n nuwe onderneming aanpak, reeds oortuig is daarvan dat dit tot mislukking gedoem is. In hul geestelike lewe glo hulle met oortuiging dat hulle nooit die geestelike groei kan bereik wat God vir hulle bedoel het nie. Hulle benader die hele lewe vanuit die veronderstelling dat hulle reeds verloor het.
Om te volhard met so ’n swak selfbeeld beroof jou van die vernuwende krag wat die liefde van God in jou lewe genereer. As jy aanhou met selfverwyt oor sonde wat God reeds vergeef het, kan jy nie in sy genesende liefde deel nie.
As jy die vergifnis van God aanvaar en jou verheug in jou verlossing uit sonde, het jy geen reg om jouself te veroordeel nie. Jy is ’n verloste kind van jou hemelse Vader en jy moet die lewe moedig en met selfvertroue aanvaar. Jy moet verder gaan as “Ek ellendige mens!” en uitkom by “Aan God die dank! Hy doen dit (verlos ons) deur Jesus Christus ons Here.” As jou selfvertroue op die manier herstel is en Christus ’n lewende werklikheid in jou lewe word, sal jy saam met Paulus kan bely: “Maar in al hierdie dinge is ons meer as oorwinnaars deur Hom wat vir ons liefhet” (Rom 8:37). Niks, nie eens ’n swak selfbeeld kan jou skei van die liefde van God nie.
Here, in u krag en deur u vergifnis, minag ek myself nie meer nie, maar verheug my in u verlossing.
13 Februarie
1 Timoteus 1:12–20
’n Suksesresep
Teenoor Christus Jesus ons Here is ek dankbaar: Hy het my krag gegee en my betroubaar geag om my in sy diens te stel. – 1 Tim 1:12
~
Almal wil graag suksesvol wees. Niemand wil graag as ’n mislukking geklassifiseer word nie. In die moderne samelewing beteken “sukses” om jou doelstellings te bereik en as beloning prestige en welgesteldheid te geniet.
Daar is talle mense wat nie uitgestyg het bo die gemiddelde in hul beroep of professie nie, wat nie groot bankrekenings het nie en tog die respek van hul medemens verdien het. Sukses is wel begeerlik en iets om na te streef, maar dit is veel meer as geld, prestige of gesag. Dit is ’n lewenskwaliteit wat gekweek word deur adel van die gees en gehoorsaamheid aan God.
Die Skrif klassifiseer sukses nie as die hoogste doelstelling in ons geestelike lewe nie. Daar is ander kwaliteite wat van groter belang in God se oë is. Voordat God ’n persoon “suksesvol” verklaar, eis Hy gehoorsaamheid en getrouheid in alle sake. God sien verby menslike waardebepalings en beoordeel ware sukses in terme van toewyding aan Hom en aan sy wil.
Iemand kan ’n sukses of ’n mislukking in die oë van sy medemens wees, maar die finale toets lê in die vraag: Het Hy my betroubaar geag?
My hoogste vreugde, o Here, is om u wil te doen en aan U onder alle omstandighede getrou te wees.
14 Februarie
Johannes 15:1–8
Bou vir jou reserwes op
Julle moet in My bly en Ek in julle. ’n Loot kan nie uit sy eie vrugte dra as hy nie aan die wingerdstok bly nie; en so julle ook nie as julle nie in My bly nie. – Joh 15:4
~
Dinamiese Christenskap beteken om van oomblik tot oomblik in ’n wingerdstok-loot verhouding met Christus te leef.
Dit beteken nie net dat jy totaal van Hom afhanklik is nie, maar ook dat jy steeds besig is om te groei, om dinamies te groei. ’n Dissipel van Christus se lewe is nie staties nie, maar ’n steeds groeiende bewuswording van God.
Dit beteken ook dat jy ’n reserwe van geloof het waaruit jy kan put in donker en moeilike dae wat voorlê. Soos die sakeman finansiële reserwes opbou, moet hulle wat erns maak met hul geestelike lewe, ook geestelike reserwes opbou. As jy soos ’n loot aan ’n wingerdstok in God bly, is jy nie as loot net op jóú reserwes aangewese nie, maar kan jy terugval op die wingerdstok.
Geen Christen is vrygespreek van tye van depressie nie. Tye wanneer God ver verwyderd skyn te wees. Om in dié tye sekerheid en vertroue te hê, moet jy ’n kragbron hê waaruit jy vryelik kan put. Daarom moet jy, soos die loot in die wingerstok, in Christus geborge bly, sodat sy krag onbelemmerd deur jou kan vloei en jy die vrugte kan dra wat Hy van jou lewe verwag.
Versterk my, o Bron van krag, om my geestelike reserwes op te bou. Leer my om in U te bly, sodat ek sterk sal wees in tye van beproewing.
15 Februarie
Matteus 16:24–28
Die prys van dissipelskap
Toe sê Jesus vir sy dissipels: “As iemand agter My aan wil kom, moet hy homself verloën, sy kruis dra en My volg.” – Matt 16:24
~
Christus het nooit gewildheid gesoek nie. Toe die skare Hom wou koning maak, het Hy stilweg verdwyn. Toe ’n talentvolle ryk jongman sy dienste kom aanbied, het Christus aan hom ’n uitdaging gestel wat hy nie wou aanvaar nie. Hy het bedroef van Jesus af weggedraai. Deur die eeue heen rig Christus aan sy volgelinge die uitdaging van die Waarheid, maar nooit het Hy toegewings gemaak om ’n enkele dissipel te oorreed nie.
Of die Meester jou geroep het tot ’n besondere arbeidsveld wat groot opoffering vereis, en of Hy jou geroep en geplaas het in bekende omstandighede waar jy Hom sonder enige opwinding of glans moet dien – sy vereistes bly dieselfde. Hy vra totale oorgawe en gehoorsaamheid om enigiets te aanvaar wat die toekoms mag inhou. Dit beteken dat jy Hom volkome moet vertrou.
Om jouself aan die Here oor te gee, is nie altyd maklik nie. Die daad van oorgawe is nie ’n eenmalige, emosionele daad nie, maar is ’n toewyding van oomblik tot oomblik – ’n hele leeftyd lank. Elkeen wat hierdie uitdaging aanvaar, bely daarmee dat die Here se weg en nie sy eie nie, voorrang sal geniet. Wanneer jy met blymoedigheid jou kruis dra en Christus onvoorwaardelik volg, ontdek jy dat die kruis werklik die instrument van jou verlossing en groei is.
Ek
