het ek jou saamgevat en na my ma se huis toe gebring en het jy my daar die kuns van die liefde geleer. Sy linkerarm is onder my kop, sy regterarm omhels my!” – Hoogl 8:2, 3
Om ’n gelukkige huwelik te hê is genade, maar dit is ook ’n kuns. En om die kuns van ’n gelukkige huwelik te bemeester sal jy éérs die kuns van die liefde moet baasraak. Dit is nodig dat twee huweliksmaats op mekaar se seksuele verwagtings sal fokus. Mans en vroue verwag verskillende dinge van mekaar op seksuele gebied. Terwyl ’n vrou se seksuele drange gewoonlik nie van haar liefde vir haar man losgemaak kan word nie, is dit vir ’n man (selfs vir ’n gelukkig getroude een!) moontlik om deur ’n sensuele vrou verlei te word.
Daar is ook verskeie basiese verskille tussen vroue en mans. Terwyl vroue op soek is na ’n liefdevolle man wat sy gedagtes met haar sal deel, eerlik en opreg sal wees en vir haar finansiële versorging sal bied, wil die meeste mans graag ’n aantreklike vrou hê wat hulle seksueel sal bevredig, hul gunsteling ontspanning saam met hulle sal geniet, vir hulle ’n tuiste sal skep en hulle sal bewonder en op hulle verlief sal bly.
Leer watter eienskappe jou man graag in sy droomvrou wil sien, en doen jou bes om dit vir hom te wees. Wees ’n entoesiastiese minnares; sorg dat jul kommunikasie oop en eerlik is en laat jou man met woord en daad sien dat jy hom bewonder en liefhet – dan het jy die kuns van die liefde bemeester!
Hemelse Vader, baie dankie dat ons mekaar op seksuele gebied kan aanvul. Gee dat ons in ons huwelik die kuns van die liefde sal bemeester.
Amen
12 Februarie
Bou mekaar op
Lees 1 Tessalonisense 5:5-11
Praat mekaar moed in en versterk mekaar dan met hierdie woorde, soos julle trouens reeds doen – 1 Tess 5:11
Die Engelse vertaling van ons teksvers van vandag lui: “Therefore encourage one another and build each other up, just as in fact you are doing” (NIV).
Jy het waarskynlik al opgelet hoe dikwels sommige vroue negatiewe dinge van hul mans sê, veral in die geselskap van ander vroue. Meestal sê hulle dit in ’n grap, maar hierdie soort grappe laat my altyd dink aan die spreekwoord: waar daar ’n rokie is, is daar ’n vuurtjie. Dit is jou taak as vrou om jou man op te bou en nie af te kraak nie. En jy behoort dit deur jou woorde, dade en gesindheid te doen. Jou man gaan baie gou agterkom as jy negatiewe gevoelens teenoor hom het. Praat eerder eerlik met hóm as daar dinge in jul huwelik is wat jou hinder, voordat jy dit teenoor jou vriendinne opper. En as dit goed gaan in jou huwelik, vertel gerus vir jou vriendinne watter juweel van ’n man jy losgeslaan het!
Dit is ook jou verantwoordelikheid om jou man te bemoedig wanneer daar tye kom dat hy depressief en mismoedig is. En daar is vir seker nie ’n huwelik wat hierdie laagtepuntdae gaan vryspring nie. Wanneer jy kan sien dat jou man nie lekker voel nie, probeer om sy aandag van die dinge wat hom so laat stres af te lei deur iets lekkers saam te doen. As jy albei hierdie dinge kan regkry, sal jou man mettertyd ontdek hoe spesiaal hy vir jou is en sal jul huwelik as gevolg hiervan van krag tot krag gaan.
Here, ek bid dat U my daarvan sal weerhou dat ek ooit negatiewe dinge van my man sal sê. Help my eerder om hom op te bou en te bemoedig.
Amen
13 Februarie
Aanvaarding is noodsaaklik
Lees Romeine 15:7-13
Aanvaar mekaar dan, soos Christus julle ook aanvaar het, tot eer van God – Rom 15:7
Vergewe my maar as hierdie onderwerp elke keer opduik wanneer ons oor die huwelik gesels! Jy gaan tevergeefs bly hunker na ’n gelukkige huwelik as jy weier om jou man te aanvaar soos hy is. Ons is almal onvolmaak, dit is dus baie onbillik van jou om te verwag dat jou man volmaak sal wees. Dit is nóg onbilliker om met hom te trou met die voorneme dat as julle eers getroud is, jy hom sal verander in dié man wat jy graag wil hê. Om hom te probeer “oormaak” is een van die sekerste maniere om jou man van jou te vervreem.
Maak eerder vrede met dié eienskappe van jou man wat jou dwars in die krop steek. Skryf hulle neer en bid dat God jou sal help om hulle te aanvaar. Dit help altyd om daaraan te dink hoe geredelik God jóú onvolmaaktheid en sondigheid aanvaar en keer op keer gewillig is om jou te vergewe elke keer as jy Hom daarom vra.
Stephen Covey sê graag ’n huweliksverhouding is soos ’n emosionele bankrekening. Elke keer as jy iets moois vir jou maat sê of doen, is dit ’n deposito in daardie rekening. Elke keer as jy negatief teenoor hom is, is dit ’n onttrekking uit daardie rekening. Probeer élke dag ’n deposito in jul twee se emosionele rekening te maak en spoor jou maat ook daartoe aan. Indien julle dit kan regkry, sal julle een van die dae skatryk wees!
Here, vergewe my dat ek van my man verwag om volmaak te wees, terwyl ek self so ver daarvandaan is. Help my om hom onvoorwaardelik te aanvaar en te vergewe soos U met my doen.
Amen
14 Februarie
’n Nuwe fokus op Valentynsdag
Lees Johannes 3:16-21
“God het die wêreld so lief gehad dat Hy sy enigste Seun gegee het, sodat dié wat in Hom glo, nie verlore sal gaan nie maar die ewige lewe sal hê” – Joh 3:16
Een van die geheime van ’n gelukkige huwelik is dat jy sal aanhou om jou man te verras met die oorspronklike maniere waarop jy hom van jou liefde vir hom wil verseker. Valentynsdag kan ’n romantiese hoogtepunt in jul huwelik word as jy moeite doen om dit vir jou man spesiaal te maak. Tog het óns verlede jaar ’n splinternuwe perspektief op Valentynsdag gekry. Ons het die volgende e-pos van ’n vriendin in Malawi ontvang:
“For God so loVed the world,
That He gAve
His onLy
BegottEn
SoN
That whosoever
Believeth In Him
Should Not perish
But have Everlasting life” (John 3:16).
Dink na oor God se liefde vir julle. Gaan lees dan saam op hierdie dag van die liefde in 1 Korintiërs 13 hoe so ’n liefde daar behoort uit te sien. Maak dan werk daarvan om hierdie liefde elke dag in jou huwelik uit te leef. Jy weet mos waar jy hulp kan kry op dié dae wanneer jy dit regtig nie uit jou eie kan regkry nie!
Hemelse Vader, help ons om van nou af op Valentynsdag nie net op ons liefde vir mekaar te fokus nie, maar ook op u liefde vir ons.
