hulle ’n blink toekoms gee sodat hul verhouding met Hom herstel kan word.
Wanneer ek ’n teksvers soek vir iemand in ’n krisis, trek ek gewoonlik Jeremia 29:11-13 nader. Soms dink ons mos as dit baie sleg met ons gaan dat God teen ons gedraai het. Maar dit kan nooit gebeur nie. God het ons só lief dat Hy áltyd vir sy kinders voorspoed beplan, nie teenspoed nie. Sy bedoeling met ons is altyd goed. Hy wil vir ons ’n toekoms gee, ’n verwagting sodat ons Hom kan aanroep en Hy weer ons gebede kan verhoor. Maar dan moet ons op ons beurt bereid wees om Hom te ken, sy gebooie te gehoorsaam en na sy wil te soek.
In Jesus het God jóú kom soek, jou kom wys dat Hy dit net goed met jou bedoel. Is jy gewillig om in die jaar wat voorlê aan jou verhouding met Hom te werk en sy wil te soek?
Here Jesus, dankie dat U vir my kom wys het dat God dit goed bedoel met my. Help my om God te soek, sy gebooie te gehoorsaam en na sy wil te vra.
Amen
29 Januarie
Gee ag op die woorde van die Here
Lees Spreuke 16:20-24
Wie ag gee op die woorde van die Here, sal voorspoed geniet; wie op die Here vertrou, met hom gaan dit goed – Spr 16:20
Ons is steeds met voorspoed besig! In God se Woord word baie voorwaardes vir mense gegee wat graag voorspoed wil beleef. As jy ag gee op die woorde van die Here, sal jy voorspoed geniet, en indien jy op die Here vertrou, sal dit met jou goed gaan, belowe die Spreukeskrywer. Tog sal jy waarskynlik kan getuig dat hierdie teks nie altyd werk nie. Soms gebeur daar slegte dinge met die Here se kinders. Miskien moet ons groter klem lê op gehoorsaamheid, want voorspoed en gehoorsaamheid gaan baie keer hand aan hand. “As jy maar aan my gebooie gehoorsaam was, sou daar voorspoed en redding vir jou gekom het, so onkeerbaar soos ’n rivier, soos die golwe van die see,” sê die Here vir sy volk by monde van die profeet Jesaja (Jes 48:18). Israel het male sonder tal ondervind dat hul voorspoed in teenspoed verander het sodra hulle ongehoorsaam aan die Here was en Hom vir afgode verruil het.
Wil jy graag vanjaar voorspoed belewe? Maak dan jou verhouding met die Here reg. Neem ’n wilsbesluit om vas op Hom te vertrou, sy Woord en gebooie te gehoorsaam. Selfs al sal élke dag nie vir jou voorspoed bring nie, kan jy daarop reken dat Hy te midde van teenspoed steeds by jou sal wees sodat Psalm 112:7 vir jou waar sal word: “Vir slegte tyding is hy nie bevrees nie, hy is gerus, hy vertrou op die Here.”
Hemelse Vader, help my om vanjaar op u woorde ag te slaan en u gebooie te gehoorsaam, om so vas op U te vertrou dat ek selfs nie eers slegte tyding sal vrees nie.
Amen
30 Januarie
God seën jou
Lees 1 Kronieke 4:9-10
Jabes het die God van Israel aangeroep met die woorde: “Stort u seën oor my uit, vergroot my grondgebied, neem my onder u beskerming en weerhou onheil van my sodat geen smart my tref nie.” God het laat gebeur wat hy gevra het – 1 Kron 4:10
In dié oorbekende gebed van Jabes, vra hy dat God sy seën oor hom sal uitstort, sy grondgebied meer sal maak, hom sal beskerm en onheil van hom sal weerhou. Ons teksvers vertel dat God die gebed van Jabes verhoor het.
Aan die begin van ’n nuwe jaar is dit goed om God vir sy seën in jou lewe te vra. Dit is die enigste manier hoe jy sal weet dat alles wat jy gaan doen uiteindelik reg sal uitwerk. Seën beteken om God se liefde en guns in jou lewe te ervaar sodat Hy jou elke dag met sy liefde sal omvou en jy sy onverdiende genade sal kan raaksien in elke goeie ding wat oor jou pad kom. ’n Mens kan kwalik vir iemand anders iets mooiers vir die nuwe jaar toewens as God se seën op alles wat hy gaan aanpak.
Ek wil vir jóú God se seën toebid op alles wat jy vanjaar gaan aanpak. Mag jy die rykdom van God se genade elke dag in jou lewe ervaar. Onthou net dat God se seën verantwoordelikheid vir jou meebring. Indien God jóú seën moet jy weer vir ánder mense tot seën wees. Dan sal jy vanjaar ’n positiewe verskil maak in die plek waar jy woon en sal almal wat jou ken, gelukkiger mense wees.
Here, ek kom bid dat U vanjaar u seën oor my sal uitstort. Maak dit vir my moontlik om weer vir ander mense tot seën te wees sodat ek ’n positiewe verskil in die wêreld sal maak.
Amen
31 Januarie
God gaan voor jou uit
Lees Deuteronomium 31:1-8
Hou moed en wees dapper! Moenie bang wees nie, moenie vir hulle skrik nie, want die Here julle God gaan saam met julle. Hy sal julle nie in die steek laat nie, julle nie alleen laat nie – Deut 31:6
Moses se afskeidsboodskap vir die volk bly vir my die heel mooiste nuwejaarsbelofte: Hulle hoef vir niks bang te wees nie, want die Here sal met hulle saamgaan, Hy sal hulle nie in die steek laat of alleen laat nie. Ook Josua se persoonlike boodskap in vers 8 behoort met elke Christen saamgeneem te word op die pad van die nuwe jaar: “Die Here sal voor jou uit gaan. Hy sal by jou wees. Hy sal jou nie in die steek laat nie, jou nie alleen laat nie.”
God onderneem om vóór jou op die onbekende pad van die nuwe jaar te stap. Jy hoef nie bang te wees vir die onbekende nie, want Hy gaan elke tree van die pad saam – en Hy sal jou nooit in die steek laat of alleen laat nie. Al wat jy hoef te doen, is om Hom elke dag te volg. Dan sal die res van die teksvers vanjaar in jou lewe waar word:
* God sal by jou wees in goeie én slegte tye;
* Jy mag maar onwrikbaar op Hom vertrou, Hy sal jou nooit in die steek laat nie;
* Hy sal jou nooit alleen laat nie; en
* Jy hoef vir niks te skrik nie!
Met só ’n belofte kan jy die jaar wat voorlê met groot vertroue ingaan!
Hemelse Vader, ek neem U nou op u woord. Dankie dat ek nie vir die onbekende pad van die nuwe jaar hoef bang te wees nie omdat ek die versekering het dat U dit vir my sal vooruitloop.
Amen
Gebed
Hemelse Vader,
watter ongelooflike voorreg is dit om die nuwe jaar te begin
met die seker wete dat U self vir my by fonteine langs sal lei;
dat U vir my voorspoed en seën belowe in die jaar wat voorlê,
en elke dag vir my sal sorg.
Dankie vir die belofte dat U by my sal wees;
dat U my nooit sal laat vaar of verlaat nie;
dat U in elkeen van my behoeftes in oorvloed sal voorsien.
Maak my gewillig om vanjaar volgens u wil te leef
