tone in swart geklee wees. Dit het ons egter gehelp om iets te verstaan van die kultuur van die tyd waarvan ons vandag gelees het.
Moses maak voorsiening vir die moontlikheid dat ’n man ’n vrou sal buitmaak. Dit gaan nie hier oor die volke wat op bevel van die Here uitgeroei moes word nie, maar oor ’n oorlog teen ’n ander volk. Die gewoonte van daardie tyd was dat die oorwinnaars die verloorders tot slawe kon neem. Maar selfs slawe het ook regte. Sulke vroue moes goed behandel word, soos hier beskryf word. Die oorwinnaar mag met so ’n vrou trou, maar sy moes dan reg behandel word en mag nie weer as ’n slavin verkoop word as jy van plan verander nie. Sy moes dan vrygelaat word (Deut 21:14).
Die regte van vroue is ook beskerm in die geval van ’n poligame huwelik, en die eerste vrou en haar kinders moes die voorrang bly geniet (v 17).
Ons omstandighede verskil vandag, maar vrouens moet steeds net met die grootste respek behandel word. Elke huwelik moet ’n sigbare preek wees oor die verhouding tussen Christus en sy kerk (Ef 5:23–27). Kom ons bid daarvoor.
GEBED: “Here, help ons om U te eer, ook in ons verhouding teenoor mekaar in die huwelik.”
Lees vanaand in Deuteronomium 21:18–23 hoe respek vir en gehoorsaamheid aan ouers verseker is.
Donderdag 2 Februarie
Lees Deuteronomium 22:1–12.
Goeie buurmanskap
Jy mag jou nie blind hou wanneer jy ’n verdwaalde bees of skaap van jou volksgenoot sien nie (Deut 22:1).
Sonde met die bure deur Langenhoven is ’n humoristiese vertelling van hoe dinge tussen bure verkeerd kan loop. Dit is ’n mooi voorbeeld van hoe dinge nie tussen bure behoort te wees nie. Maar ongelukkig is dit beeldend van die twiste wat so maklik tussen bure ontstaan. Ons lees deesdae meermale van die onbedagsame buurman wat sy musiek te hard speel, en dan aanleiding gee tot ’n kinderagtige geraasoorlog tussen bure.
Dit is nie hoe dit in die beloofde land moes gaan nie. Mense moet vir mekaar omgee, en dit sluit ook die versorging van mekaar se diere in. Dit gaan moeite kos om die buurman se beeste weer aan te jaag na waar hulle hoort, en dit kan geld kos om die onbekende verdwaalde dier te voer tot sy baas opdaag, maar dit is waarvoor ons daar is – om die liefde van God elke dag ook teenoor mekaar en teenoor God se ander skepsels uit te leef.
Van die ander reëlings klink vandag eienaardig. Ons weet nie meer wat die agtergrond daarvan was nie. Sommige raai dat die heidene praktyke gehad het wat met gemengde klerestowwe of graansoorte te doen het, of dat daar heidense feeste was waar mans en vroue klere omgeruil het. Vandag is ons egter nie meer seker wat die motief was nie. Die belangrike saak is egter dat gelowiges nie soos ongelowiges moet optree nie. En dit is vandag ook ons uitdaging: Kom ons leef en praat soos kinders van God. Mense moet die verskil kan sien.
GEBED: “Here, wys my hoe ek iemand anders vandag kan help, en hoe ek U kan eer in my taalgebruik en optrede.”
Lees vanaand in Deuteronomium 22:13–21 van die reëlings oor vals beskuldigings in die huwelik en oor voorhuwelikse seks.
Vrydag 3 Februarie
Lees Deuteronomium 22:22–30.
Seksuele reinheid
So moet jy hierdie soort kwaad tussen die Israeliete uitroei (Deut 22:22).
“Dit lyk my asof 70% van die studente niks daarvan dink om saam te woon of saam te slaap nie, en dit sluit die Christene in,” noem ’n studenteleraar moedeloos. Dit klink regtig asof die studente lank laas Deuteronomium gelees het! Is daar dalk ’n verband tussen hierdie optrede en die berigte dat die hoogste risiko ouderdomsgroep om die MI-virus op te doen jong mense tussen 20 en 34 is? Dit is nie verniet dat die Here allerhande reëls en wette gegee het nie – Hy is lief vir ons en wil ons beskerm. As jy die wet van God oortree, kan jy seker wees dat jy die een is wat gaan seerkry. Die wet is soos die reling op die dakstoep waarvan ons gister gelees het – dit is daar om ons teen gevaar te beskerm.
“Hy is so narrow-minded dat hy met altwee oë gelyktydig deur ’n sleutelgat kan loer,” word soms gespot oor mense wat probeer om volgens Bybelse standaarde te lewe. Vir die wêreldse mense klink dit belaglik dat iemand homself of haarself rein wil hou vir die huwelik. Maar dié wat so lewe, pluk die wonderlike vrugte daarvan. Dit is oor en oor die moeite werd. ’n Losbandige lewenstyl bring groot hartseer en skade.
Neem dus vandag se Skrifgedeelte ernstig op. Daar is ’n rede waarom sulke streng reëls neergelê is. As mense maar bereid was om hierdie wette te gehoorsaam, sou hulle baie gelukkiger gewees het. Hoe baie mense het nie al in trane gewens hulle kon die horlosie terugdraai en anders kies nie!
GEBED: “Here, help ons en ons kinders om ons seksueel rein te hou, en om volgens u wil te lewe, sodat ons nie seerkry nie.”
Lees vanaand in Deuteronomium 23:1–8 oor mense wat nie deel van die Joodse gemeente kon wees nie. Vandag geld dit natuurlik nie vir ons nie.
Saterdag 4 Februarie
Lees Deuteronomium 23:9–25.
Onthou jou beloftes
Wanneer jy ’n gelofte aflê teenoor die Here jou God, moet jy nie traag wees om dit na te kom nie (Deut 23:21).
“Hoekom is katkisante nooit in die kerk op die Sondag ná hulle belydenis van geloof afgelê het nie?” wonder ’n kollega. Net die vorige Sondag het hulle baie plegtig belowe dat hulle aan die Here getrou sal wees en getrou sal wees in hulle kerkbywoning. En nou skitter hulle in hulle afwesigheid. Dis asof hulle ’n bietjie vakansie wil hou nadat hulle hulle “boerematriek” deurgekom het. Dikwels sien ons hulle jare later eers weer, as hulle getroud is en self kinders het. Is dít die soort toewyding wat die Here verbly? Seker tog nie.
In vandag se Skrifgedeelte het ons oor baie sake gelees wat nie baie met mekaar te doen het nie. Maar hierdie een is baie belangrik. Die Here neem kennis van wat ons aan Hom belowe. Daardie gelofte wat ons maak om in die huwelik aan mekaar getrou te bly tot die dood ons skei, is belangrik. Hy wil ons graag gelukkig getroud sien. Daarom moet ons volgens sy Woord saamlewe. Ons sal verseker misverstande en versoekings ervaar, maar as ons op die Here vertrou, sal Hy ons deur elkeen veilig bewaar (1 Kor 10:13).
Wanneer ouers hulle kinders bring om gedoop te word, maak hulle ’n gelofte om daardie kind deur hulle woorde en voorbeeld op die pad van die Here te begelei. Jy belowe ook om te sorg dat die mense wat jou kind onderrig, daarmee sal help. Waarom is dit dan dat so min gesinne deesdae nog getrou saam huisgodsdiens hou? Kom ons onthou wat ons belowe het, en doen dit!
GEBED: “Here, dit is so maklik om dinge aan U te belowe. Help my om elke belofte na te kom.”
Lees vanaand in Deuteronomium 24:1–9 van verskillende reëlings oor die huwelik en militêre diensplig.
Sondag 5 Februarie
Lees Psalm 36:1–7.
Opstand teen God
In die hart van die goddelose het die opstand teen God die laaste woord (Ps 36:1).
“Hoekom is ateïste so aggressief teen God? Ek hoor nooit dat hulle teen feetjies praat nie, hoewel hulle seker ook nie in feetjies glo nie. Is dit nie dalk omdat hulle wel in God glo nie?”
