maar met ’n knippie sout neem.
Ons kan simpatie hê met Jona, wat so kragtig gepreek het dat die mense van Nineve tot bekering gekom het en sy profesie toe nie waar geword het nie. Hy het gevoel dat hy daardeur as ’n vals profeet gebrandmerk is.
In hierdie gedeelte het ons egter ’n ander, belangrike ding gesien: Die volk van God mag nie van waarsêers gebruik maak nie, maar moet hulle uitroei. God praat nie deur waarsêers nie, maar deur sy profete. En uiteindelik sal die beloofde profeet kom, wat uit die volk gebore sal word, en vir wie hulle moet gehoorsaam (v 15). Hierdie profesie is uiteindelik in Jesus Christus vervul (Hand 3:22; 7:37). Sy tydgenote het dit ook besef (Joh 6:14). Petrus verduidelik dat dit die Gees van Christus was wat deur die ander profete ook gepraat het (1 Pet 1:11).
GEBED: “Here Jesus, ek wil graag luister na u Woord.”
Lees vanaand in Deuteronomium 19:1–13 hoe daar tussen ongelukke en moord onderskei word.
Sondag 29 Januarie
Lees Psalm 35:19–25.
Tye van onreg
U is regverdig, Here my God, laat reg aan my geskied, sodat hulle hulle nie in my leed verlustig nie (Ps 35:24).
“Dit opmerklik dat die prokureurs in Amerika die ongewildste en rykste mense is, want hulle maak hofsake oor beuselagtighede, en wen dan sowaar.” Dit gaan blykbaar nie oor die nood van ’n veronregte nie, maar oor selfverryking. Gelukkig is alle prokureurs nie so nie. Daar is wel prokureurs, advokate en regters vir wie die waarheid saak maak, en wat die wil van God in hulle beroep soek. Dank God vir hulle.
Dawid vertel hier hoe hy onregverdig aangekla word, hoe mense agter sy rug van hom skinder, en hoe hulle fyn beplan hoe om hom te na te kom. Hulle soek nie vrede nie, maar dat onreg geskied (v 20). Dit kan wees dat hy verwys na die tyd toe hy vir Saul moes vlug, of dalk toe sy eie seun Absalom hom probeer vermoor het.
Dit is baie sleg as mense wat jy as jou vriende beskou het, jou in die hof aankla en selfs onder eed leuens vertel. Dit is niks nuuts nie. Jesus het ook ervaar dat sy beste vriende, aan wie Hy drie jaar van sy lewe gegee het om hulle toe te rus, Hom in die steek laat en wegvlug. Een van sy beste vriende het selfs gesweer dat hy glad nie vir Jesus ken nie (Mark 14:68–71).
Maar doen ons nie ook dieselfde as ons stilbly terwyl iemand God belaster, of goddelose grappies maak nie? As ons die waarheid so ’n bietjie rek, of ’n wit leuen vertel, is dit dan nie maar dieselfde nie? Kom ons gaan luister vandag mooi wat die Here vir ons in die kerk gaan sê, en laat ons dan doen wat Hy sê.
GEBED: “Here, vergewe my as ek onreg toelaat. Verander my, sodat ek voluit u wil sal soek en doen.”
Lees vanaand in Psalm 35:26–28 hoe Dawid verwag dat die reg sal seëvier en dat God die eer sal kry.
Maandag 30 Januarie
Lees Deuteronomium 19:14–21.
Eerlikheid eerste
So moet hierdie soort kwaad tussen julle uitgeroei word (Deut 19:19).
“In Afrika is korrupsie so algemeen dat min mense reken dat dit verkeerd is.” ’n Gidsboek oor reise in Afrika beveel dus aan dat ’n mens maar altyd omkoopgeld vir die grensposte beskikbaar moet hê, want die amptenare se salaris is nie genoeg om van te lewe nie. Hulle moet dit aanvul met die kado’tjies van die verbygangers. Indien dit waar sou wees, is dit darem baie laat in die dag. Watter hoop het sulke mense op die ewigheid, as hulle elke dag oneerlik is?
Moses probeer sulke dinge vroegtydig uitroei. Hy noem die geval van iemand wat die grenslyne van sy eiendom verskuif om sy buurman te benadeel (v 14). Dis natuurlik diefstal. Hy praat ook van mense wat ander onregverdig aankla. Indien dit blyk dat die klaer leuens vertel, moet hy die straf kry wat hy vir die ander een beplan het. En daardie straf moet genadeloos toegepas word (v 21). Dit sal verhoed dat ander mense ook daardie pad oorweeg (v 20).
Maar al kan ’n mens ook met skelmstreke wegkom, moet jy altyd onthou dat daar ’n finale oordeel voorlê. Dan sal die ware motiewe duidelik uitkom, en die Regter sal presies weet wat reg en wat verkeerd is. Die uitspraak sal een van twee wees: ewige geluk saam met Jesus, of ewige pyn en verderf sonder Hom. Elke ding wat ons doen, sal eendag weer na ons toe terugkom, of dit nou goed is of sleg (Op 20:12–15).
Selfs in hierdie lewe geld die beginsel dat ’n mens oes wat jy saai (Gal 6:7-10). Ons moet dus nie moeg word om goed te doen nie. Uiteindelik sal dit die regte vrugte oplewer. Waak daarteen om in korrupsie en oneerlikheid te verval. Dit is nie die moeite werd nie.
GEBED: “Here, hou my eerlik in alles wat ek doen en sê.”
Lees vanaand in Deuteronomium 20:1–8 hoe onwillige mense in oorlogtyd huis toe gestuur kan word.
Dinsdag 31 Januarie
Lees Deuteronomium 20:9–20.
Julle is anders
… sodat hulle julle nie leer om te handel volgens al hulle gruwels wat hulle vir hul gode gedoen het, en julle teen die Here julle God sondig nie (Deut 20:18).
“Kyk, daar is mense wat lelik praat en vloekwoorde gebruik, maar ons is nie so nie. Ons is anders. Daarom doen ons familie se mense nie soos die ander nie. Ons gebruik net mooi woorde, en ons vloek nie,” het ek aan my kleinseun verduidelik toe hy begin praat en veel vreugde daarin gevind het om lelike woorde aan te leer. En dit het blykbaar beter gewerk as dreigemente van rooipeper of seep op sy tong, want sy taalgebruik het dramaties verbeter. Dis goed om te weet Christene praat anders.
In vandag se gedeelte klink die opdrag om alle afgodedienaars in Kanaän uit te roei onverstaanbaar. Maar dit het ook ’n rede, en ons lees dit in vandag se teksvers. Afgodedienaars verlei mense om ook hulle afgode te dien. En dit is ’n groot skade, want God is heilig en laat so iets nie toe nie. Dit kon nie toegelaat word in die land wat God aan sy verbondsvolk wou gee nie.
Ons is nou reeds aan die einde van die eerste maand van die jaar. Dit is goed om ’n slag asem te skep en terug te kyk. Het daar al iets in jou lewe verander na aanleiding van wat jy vanjaar in die Bybel gelees het? Is jy ’n dader van die Woord, of net ’n hoorder? Die Bybel se hoofdoel is om ons lewens te verander. En as ander mense kan sien wat die Heilige Gees in ons lewens doen, sal hulle begin vra wat die verskil is (1 Pet 3:15). En dan hoef ons hulle nie uit te roei nie – ons kan hulle help om self ook deel van God se familie te word.
GEBED: “Here, help ons om soos kinders van die lig te lewe, en om anders te wees as die ongelowiges, tot U eer.”
Lees vanaand in Deuteronomium 21:1–9 wat die Israeliete moes doen in die geval van ’n onopgeloste moord.
Woensdag 1 Februarie
Lees Deuteronomium 21:10–17.
Beskerm die vroue
… en jy sien ’n mooi vrou onder hulle en jy kry haar lief en jy wil met haar trou … (Deut 21:11).
“In hierdie land is ’n vrou niks anders as ’n besitting nie,” brom my vrou Wena terwyl sy haar kop toewikkel in ’n swart sluier. Ons het by ons kinders in die Midde-Ooste gaan kuier, en moes noodgedwonge by die kleredrag van daardie land aanpas. Vrouens mag net buite die huis gaan as hulle
