die bruilof van die Lam genoem. Want die skape is ook die bruid wat by die feestafel in God se ewige ryk aansit. Eers dan word Psalm 23 ten volle vervul.
Psalm 23 se fees is nog voorlopig. Die groot fees kom nog. Sorg dat jy gereed is vir die bruilof van die Lam.
16 Februarie
God se eregaste
… U ontvang my soos ’n eregas, ek word oorlaai met hartlikheid. Psalm 23:5b
~
Kom ons beweeg so ’n paar treë terug om weer by die feestafel te kom. Ons het reeds gehoor dat God vir sy kinders ’n fees berei waar die teenstanders aan die kortste end trek. Maar daar is veel meer oor die fees te sê as verleë teenstanders en ’n tafel vol lekkernye vir God se kinders. Veel meer … Dit gaan oor ’n verhouding. God en sy kinders staan in ’n baie spesiale verhouding. Dit is ’n Vader-kind-verhouding. Ja, God is inderdaad die Koning aan wie al die eer toekom, die Koning wie se Naam ons moet hooghou. Maar Hy is ook die Vader wat sy kinders soos eregaste behandel. Glo dit as jy wil: ek en jy word deur God soos eregaste, die belangrikste gaste, behandel.
Die verhaal van die verlore seun kom by my op. Die pa wat die wegloopkind wat teruggekom het soos ’n eregas behandel. Is ons nie maar almal by tye wegloopkinders nie? Is ons nie maar almal by geleentheid ’n afgedwaalde skaap na wie die Herder moet soek en vir wie Hy moet optel en terugbring nie? En wat gee Hy dan vir ons? ’n Pak slae? Verwyte? Nee, Hy laat ons soos eregaste by ’n feestafel aansit, want Hy is lief vir ons. Hy oorlaai ons met hartlikheid, of soos die 1933-vertaling letterlik vertaal: “my beker loop oor”. God se liefde is oorvloedig. Hy vou ons toe met sy liefde. Sien, dit gaan oor ’n verhouding, ’n liefdesverhouding. Juis daarom word die Groot Fees aan die einde ’n bruilofsfees genoem. Dit is ’n liefdesfees. Só lief het God jou.
God en sy kinders staan in ’n baie spesiale verhouding – ’n Vader-kind-verhouding.
17 Februarie
Goedheid en liefde vir lewenslank
U goedheid en liefde sal my lewe lank by my bly … Psalm 23:6a
~
Ons verhouding met God het implikasies vir tyd en ewigheid. Die Ou Testament laat ’n mens dikwels die indruk kry dat dit hoofsaaklik oor die tydelike lewe gaan. Aan die ander kant is daar by baie godsdienstige groepe weer die neiging om die tydelike lewe te minag en die klem feitlik geheel en al op die ewige lewe te laat val. Psalm 23 vertel tog vir ons dat dit vir God oor tyd én ewigheid gaan. God wil hê ons moet vandag gelukkige mense wees wat aan ons doel beantwoord en terselfdertyd God se goedheid kan geniet. Maar dan mag ons nie vir een oomblik uit die oog verloor dat ons pelgrims onderweg na die ewigheid is nie.
Dit gaan oor nog meer as ’n feestafel. Dit is selfs moontlik om ’n feestafel as ’n spesiale, eenmalige geleentheid te sien. Die digter wil dit egter duidelik stel dat God se oorvloedige liefde nie net vir spesiale geleenthede gereserveer word nie. Sy liefde bly lewenslank by sy kinders. Dus nie net ’n feestafel nie, maar ’n feeslewe!
Goedheid en liefde. Waarom onderskeid maak tussen dié twee woorde? Is God se liefde nie allesinsluitend nie? Die woord “goedheid” dui op die gesindheid waarin God sy liefde bewys. God glimlag vir ons. God se hart klop warm vir ons. God se liefde is nie maar net ’n woordelikse liefdesverklaring nie, maar word in goeie dade bewys. Dit is mos wat die digter nog van die begin af vir ons inprent: Die Herder versorg ons in liefde.
Ervaar opnuut die wonder: God glimlag vir jou omdat Hy jou liefhet.
18 Februarie
Om tuis te wees
U goedheid en liefde sal my lewe lank by my bly en ek sal tuis wees in die huis van die Here tot in lengte van dae. Psalm 23:6
~
Wanneer die digter van die huis van die Here praat, bedoel hy die tabernakel en later van tyd die tempel wat in die Ou Testament die baie spesiale betekenis gehad het as die woonplek van God. Daar was goeie redes waarom die gelowiges so ’n besondere waarde aan die tempel geheg het. Die verbondsark, die sigbare teken van God se teenwoordigheid, was daar; die priesters het daar as middelaars tussen God en sy volk opgetree; dit was die plek waar gelowiges hulle offers aan God gebring het en waar die wet van die Here aan hulle voorgehou is. Inderdaad ’n besondere plek. Die tempel word selfs “die voetbank van God se voete” genoem.
Maar is dit presies wat die digter bedoel wanneer hy sê dat hy lewenslank in “die huis van die Here” sal bly? Hy kon dit tog nie letterlik bedoel het nie. Nee, sekerlik nie. Dit gaan oor die teenwoordigheid van die Here. Om tuis te wees in God se teenwoordigheid wat by die tempel of tabernakel maar net op ’n sigbare manier uitdrukking gevind het. Ek is tuis wanneer ek in die huis van my pa is. Sy huis bied vir my veiligheid en versorging. In God se beskermende en liefdevolle teenwoordigheid vind sy kinders ’n tuiste.
Kom ons vertolk die teks net so effe anders: God sal my lewenslank met sy liefde bederf; en ek sal lewenslank in God se teenwoordigheid bly. Natuurlik wil jy in die huis van die vader bly as dit so feestelik daaraan toegaan. Natuurlik wil jy in God se teenwoordigheid bly as Hy die lewe vir jou ’n fees wil maak.
God bied vandag vir jou ’n feestelike tuiste aan.
19 Februarie
Waar is ons Herder?
Soos ’n herder versorg Hy sy kudde: die lammers maak Hy bymekaar in sy arms en Hy dra hulle teen sy bors, Hy sorg vir die lammerooie. Jesaja 40:11
Toe het sy volk gedink aan die ou dae, aan die tyd van Moses, en gevra: Waar is Hy wat sy kudde dwarsdeur die see gebring het saam met hulle herder? Waar is Hy wat sy Heilige Gees onder hulle gegee het? Jesaja 63:11
~
Daar kan ’n tyd aanbreek wat die Herder uit die prentjie verdwyn. Nee, dis nie dat Hy nie meer daar is nie; dit is eerder dat sy skape hulle eie koers ingeslaan het. En dan op ’n dag, wanneer die gevare op hulle toesak, soek hulle die Herder se beskerming, sy versorging, wil hulle hê Hy moet soos van ouds die lammers in sy sterk arms bymekaar maak, teen sy bors vasdruk. Maar tevergeefs. Die Herder is weg. Iewers langs die pad het hulle Hom verloor.
’n Mens kan vir God verloor. Dit gebeur wanneer jy met Hom uit pas raak, nie meer op die spoor van die Herder volg nie. Dit gebeur wanneer jy na ander gode uitreik, jou lewensgeluk by ander bronne gaan soek. ’n Tyd lank kan dit goed gaan. Maar dan op ’n dag het jy ’n Herder nodig. En soos die volk van die Here destyds, begin jy terugdink aan die “ou dae”, die tyd toe jy so na aan die Here geleef het.
Psalm 23 raak niks anders as ’n stukkie vroom nostalgie wanneer ’n mens nie meer bereid is om God se skaap te wees nie; nie meer ter wille van sy Naam aan sy wil gehoorsaam te bly nie.
Psalm 23 raak niks anders as ’n stukkie vroom nostalgie wanneer ’n mens nie meer bereid is om God se skaap te wees nie.
20 Februarie
Die soekende Herder
Ek sal dié soek wat weggeraak het, dié terugbring wat weggedwaal het, die wonde versorg van dié wat seergekry het, die swakkes help. Maar Ek sal dié
