Ons moet van dag tot dag leef met ’n gedurige bewussyn van sy teenwoordigheid in ons lewe. Dit moet vir ons iets voelbaars en werklik wees.
Ons moet ons aan Hom onderwerp en aan Hom gehoorsaam wees. Elke dag moet dit my hoogste vreugde wees om sy wil in gehoorsaamheid te doen. Dit is eerbied teenoor God. Dit het niks met vrees te doen nie. God moet die eerbied ontvang wat sy natuur en karakter vereis. Nie net in my gebede nie, maar ook in my lewe.
Dankie, heilige Vader, dat ek wéét U is daar; dat U heilig en anders is; dat U altyd by my is en dat ek U gehoorsaam kan volg.
25 Februarie
Matteus 6:5–15
U koninkryk en u wil
[…] laat u koninkryk kom; laat u wil ook op die aarde geskied, net soos in die hemel. – Matt 6:10
~
Die koninkryk van God begin reeds hier op aarde waar God se wil net so volmaak uitgevoer moet word soos in die hemel. Om deel van die koninkryk van God te wees, is om sy wil te doen. Daarom sê Christus sy koninkryk is binne-in ons. Dit eis die oorgawe van my wil, my hart en my lewe. Dit is om na die voorbeeld van Christus te sê: “ […] laat u wil geskied” (Matt 26:42).
Maar jy kan dit ook in wanhopige neerlaag sê, omdat jy niks anders kan of wil sê nie. Dit is fatalisme om te glo aan ’n blinde noodlot wat mense soos pionne manipuleer. God is te sterk. Dit sal tog nie help om iets anders te doen of te sê nie.
Of jy kan dit in ’n gees van bittere opstand sê. Dan sien jy God as jou vyand, maar ’n vyand so sterk dat jy Hom nie kan oorwin nie. Jy aanvaar dan sy wil, maar jy doen dit teësinnig en met onderdrukte woede.
Jy kan dit egter ook in liefde en vertroue sê, met die begeerte om sy wil só volmaak uit te voer, net soos in die hemel. Dan is die Christen in sy gemoed seker van die wysheid van God en dat Hy alleen sal doen wat vir hom die beste is. Hy is ook seker van die liefde van God – ’n liefde wat vir hom net die beste wil.
Dan is sy koninkryk en sy wil vir ons die hoogste goed.
Here, laat u koninkryk kom; laat u wil ook in my lewe geskied, net soos in die hemel.
26 Februarie
Matteus 6:5–15
Brood vir vandag!
Gee ons vandag ons daaglikse brood. – Matt 6:11
~
Wanneer ons hierdie gebed bid, glo ons dat God vir ons liggaamlike welsyn omgee. Hy sien nie net om na die siel van die mens nie, maar na al die fasette van sy bestaan.
Ons hoef ons oor niks te bekommer nie, want God sorg elke dag vir ons – Hy gee selfs in die woestyn manna en kwartels, genoeg vir elke dag. Dit is egter nie so maklik om maar net vir vandag op God te vertrou nie, want die gees van materialisme eis dat ek seker sal wees van môre se brood.
Wanneer ons tot God bid vir vandag se brood, gee ons aan Hom die sentrale plek in ons lewe en erken ons dat ons van Hom al die goeie gawes ontvang. Met hierdie gebed bely ons ons totale afhanklikheid.
Maar afhanklikheid beteken nie dat ons agteroor kan gaan sit nie. Gebed en werk gaan hand aan hand. God het bepaal dat ons in die sweet van ons aangesig ons brood sal eet. God gee lewe en groeikrag; ons moet die arbeid gee. Eers dan kan ons ons brood van God vra. Ons moet ook onthou dat ons vra “Gee ons vandag ons daaglikse brood […]” en dat ons van die oorvloed wat God aan ons gee, ook met ander – wat minder het – moet deel.
Hemelse Here, ek dank U vir my daaglikse brood. Stil ook my dieper honger met die Brood van die Lewe – Jesus Christus.
27 Februarie
Matteus 6:5–15
Vergifnis – ontvang en gegee!
[…] vergeef ons ons oortredinge soos ons ook die vergewe wat teen ons oortree. – Matt 6:12
~
Die eerste deel van die bede herstel die gebroke verhouding tussen ons en God, want Hy het belowe “as ons ons sondes bely – [is Hy] getrou en regverdig, Hy vergewe ons ons sondes en reinig ons van alle ongeregtigheid” (1 Joh 1:9).
Die tweede deel van die bede herstel die gebroke verhouding tussen ons en ons medemens. Wat ons dus letterlik hier vra is: Vergewe ons ons oortredinge tot dié mate wat ons dié vergewe wat teen ons oortree.
Daar is gewoonlik ’n rede waarom iemand iets doen: bekommernis of pyn; misverstand, oorerwing of omgewing; temperament.
Ons moet leer om te vergeet. Solank ons broei oor ’n onreg is daar geen hoop dat ons sal vergewe nie. Net die Gees van God kan my bevry van die bitterheid wat my daarvan weerhou om te vergewe.
Ons moet leer om lief te hê. Hierdie liefde kom ons lewe binne saam met ons oorgawe aan Jesus Christus. Hy het ons nie net geleer om in liefde te vergewe nie – Hy het dit aan die kruis gedemonstreer toe Hy gebid het vir sy vyande.
Ons het soveel vergifnis ontvang. God verwag dat ons dit ook sal gee.
Here, ek wat vergifnis ontvang het, sing dankbaar my verlossingslied. Gee dat ek gretig sal wees om hulle te vergewe wat teen my oortree.
28 Februarie
Matteus 6:5–15
Verlossing van versoeking
[…] laat ons nie in versoeking kom nie maar verlos ons van die Bose. – Matt 6:13
~
Geen mens is gevrywaar van versoeking nie. Versoeking is ’n toets vir die egtheid van ons geloof en gehoorsaamheid. Die feit dat ons hierdie bede bid, is ’n belydenis dat ons nie in eie krag die versoekings in ons lewe kan weerstaan nie. In God se krag kan ons egter triomfeer. Elke versoeking wat ons deur sy genade kan weerstaan, bring geestelike groei.
Ons bid hier dat God ons van die versoekings van ons eie sondige natuur en van verleiding deur ander moet bewaar. God is nie ’n magtelose toeskouer op die toneel van ons versoekings nie. Hy het beheer oor elke situasie en Hy is magtig om te red. As God hom nie toelaat nie, is selfs die duiwel magteloos (lees Job 1:12; 2:6). Ons bid ook dat God ons só moet lei dat ons nie in Satan se strikke sal inloop nie. Ons moet God se wil vir ons lewe só goed ken dat ons verbode terreine sal vermy.
Hierdie bede vra dat ons geharnas en beskerm sal word en dat ons weerstand teen versoeking versterk sal word. God alleen kan ons red. Ons het geen ander heenkome nie, daarom bely ons ons swakheid en vra ons sy beskerming teen die gevaar. As God ons beskermer is, is daar geen versoeking of verleiding wat ons hoef te vrees nie.
Bewaarder en Meester, dankie dat ek die lewe kan tegemoetgaan met die wete dat U my beskermer teen die aanslae van die Bose is, deur die heerlike werk van my Verlosser, Jesus Christus.
29 Februarie (Skrikkeljaar)
Matteus
