en ook besig om jou toekoms te bepaal.
Vandag is werklik die belangrikste dag in jou lewe. Daarom behoort jy elke dag jou potensiaal tot die maksimum te benut. So lê jy ’n stewige fondament vir die toekoms. So skep jy gelukkige herinnerings vir die dag wanneer vandag jou verlede is.
Dan benader jy die toekoms positief en met die lewende Christus as middelpunt van jou denke en emosies, begin jy skeppend en ondernemend te lewe. Jou toekomsbenadering is gelowig, dinamies en positief.
Here, help my om vandag te gebruik om te bou vir die toekoms en lei my deur u Heilige Gees.
27 Januarie
Psalm 139:1–24
Deur God omsluit
U omsluit my van alle kante, U neem my in besit. – Ps 139:5
~
Dit is ’n onuitspreeklike genade van God dat Hy ons omsluit met sy liefde en ons daarom kan jubel: “Immanuel – God by ons!” Hoe verbly hierdie woorde ’n mens se hart telkens wanneer die donker wolke van wêreldse spanning jou na depressie en moedeloosheid wil dryf.
God se teenwoordigheid is nie net ’n mooi teorie nie, maar ’n konkrete, praktiese werklikheid:
God is bo jou – om jou te beskerm teen die hitte van die son in die stryd van elke dag; ook die versengende strale van verleiding en versoeking;
God is agter jou – om jou te bewaar teen agteruitgang en jou te versterk om in sy krag steeds voorwaarts te beur;
God is onder jou – om jou omhoog te hou en te ondersteun wanneer die stryd jou neerdruk en jy gevaar loop om onder te gaan;
God is vóór jou – om jou te lei op die paaie van geregtigheid;
God is rondom jou – om jou te omsluit met sy liefde en om jou te beskerm teen sigbare en onsigbare gevare;
God is binne jou – om vir jou die weg, die waarheid en die lewe te wees; om te voorsien in jou behoeftes na die rykdom en heerlikheid van sy genade.
God is vir jou die Algenoegsame.
God is in Christus vir jou Immanuel – God by ons!
Here, ek staan in woordelose verwondering voor die algenoegsaamheid van u teenwoordigheid in my lewe. Dankie dat ek u kind kan wees.
28 Januarie
Psalm 32:1–11
God het ’n pad
Ek wil jou onderrig en jou die pad leer wat jy moet volg. Ek wil jou raadgee en my oog oor jou hou. – Ps 32:8
~
God het reëls neergelê wat jou lewe moet beheers. As gehoorsame kind van God moet jy daarna streef om aan God se hand volgens die lewensreëls wat Hy in sy Woord bepaal het, te wandel.
God is ’n God van orde en nie van chaos nie. Die verwarring van die mensdom vandag is die direkte gevolg van ongehoorsaamheid aan God se wette. Wanneer jy jouself volkome in God se hande plaas en sy wil vir jou lewe soek, sal jy ontdek dat jou geestelike lewe in diepte en stabiliteit toeneem. Jou plig is om hiertoe deur Bybelstudie, gebed en bepeinsing mee te werk.
Geleidelik leer jy God beter ken en laat jy Hom toe om jou lewe steeds meer te beheer sodat sy wil in jou lewe duidelik kan word. Dan loop jy op die pad wat Hy vir jou uitgestip het.
Aanvanklik mag God se doel nie so duidelik wees nie en jy sal in die geloof moet voortwandel. Aanvaar jy egter onwrikbaar die heerskappy en leiding van jou hemelse Vader, sal jy die toekoms met onbegrensde vertroue tegemoetgaan. Jy sal sterk staan in die oortuiging dat God jou lei en oor jou waak.
Liefdevolle God en Vader, leer my u wil vir my lewe ken, sodat ek gehoorsaam en blymoedig u pad kan bewandel.
29 Januarie
Josua 1:1–9
’n Resep vir vreeslose wandel
Ek self gee jou die opdrag. Wees sterk, wees vasberade. Moenie skrik nie, moenie bang wees nie, want Ek, die Here jou God, is by jou oral waar jy gaan. – Jos 1:9
~
Josua word geroep om God se volk ’n onbekende land binne te lei en dit in sy Naam in besit te neem. God belowe hom sy bystand.
Voor jou lê ’n onbekende nuwe jaar, dis ’n onbekende pad en daar is moontlik baie huiwering in jou hart. Vir sommige sal dit tye van swaarkry bring, vir ander tye van vreugde. Ondervinding het geleer dat die jaar ’n bietjie van albei inhou: die goeie én die slegte.
Baie van ons sal op die bergspits van heerlike ervarings verkeer; op die kruin van die golf van geluk en voorspoed. Moontlik sal ons die wanhoop van die donker dieptes ken wanneer ons die donker vallei moet deurwandel. Soos die jaar ontvou sal ons waarskynlik sowel vreugde as smart ervaar.
Ons moet weet wat ons kan doen om die situasies te hanteer wat ons gaan beleef. Alleen op dié wyse sal ons die toekoms met vertroue kan binnegaan.
Daar is maar net één seker manier om die toekoms vreesloos in te gaan: Ons moet elke dag in die teenwoordigheid van die opgestane Here leef. Ons moet ons elke dag aan Hom oorgee, onsself aan Hom toewy; sy pad vir ons lewe soek en dit in volkome gehoorsaamheid bewandel.
As jy dit doen, sal jy nie die toekoms vrees nie en jy sal die lewe met vertroue tegemoetgaan in die krag en vrede van God, jou Vader.
Here, lei my met u lig deur aardse duisternis. Maak my gewillig en gehoorsaam om tree vir tree gelowig te volg.
30 Januarie
Matteus 6:24–34
Eers die wil van God!
Nee, beywer julle allereers vir die koninkryk van God en vir die wil van God, dan sal Hy julle ook al hierdie dinge gee. – Matt 6:33
~
Sommige mense maak hulself diep ongelukkig omdat hulle so gretig is om al die foute van die hele wêreld te wil regstel. Hulle glo dat hul oortuigings die oplossing is vir al die siektes van ons tyd. In hul entoesiasme vergeet hulle dat onvolmaaktheid deel is van die mens se sondige natuur.
Dit is onmoontlik om ’n nuwe wêreld sonder nuwe mense te skep. Dit help ook nie om eers ánder te probeer hervorm nie. Die beste hervorming en genesing begin by jouself. Trek ’n sirkel voor jou bed, kniel daarbinne en bid God om binne daardie sirkel te begin hervorm.
Dis moeilik om dié waarheid onder oë te sien, maar voordat jou eie innerlike lewe in harmonie met God is, is dit onmoontlik om ander mense te hervorm. Jesus moet eers koning van jou hart en lewe word, dan sal dit in jou lewe en karakter geopenbaar word en uitkring na ander mense. Jy moet in jou persoonlike lewe aanhou streef na volmaaktheid, al skiet jy dikwels tekort.
Jy mag nooit agter die onvolmaaktheid
