Here, ek buig voor U om vandag deur U verander te word. Help my om u opdrag te hoor.
Lees vanaand in Psalm 119:153-160 hoe die Woord van die Here die geheim van ware lewe is.
MAANDAG 6 MAART 2017 Lees eers Handelinge 3:17-26
DIT IS VIR JOU OOK!
Die dinge waarvan die profete gepraat het, is vir julle bedoel, en julle het deel aan die verbond wat God met julle voorvaders gesluit het (3:25).
GESELSVRAAG: Hoekom wil die Here ons seën?
“Ek sal jou seën … en jy moet tot ’n seën wees” het die Here vir Abraham gesê. In Genesis 12:2, wat Petrus hier aanhaal, word die seën uitgebrei om ook Abraham se nageslag in te sluit. Ons geestelike groei raak ook ons nageslag. Wonderlik!
Net soos in sy eerste preek trek Petrus getrou sy net in om soveel mense moontlik in die koninkryk in te bring. Die toeskouers moet deelnemers word. Al was hulle verbondskinders, moes hulle by bekering begin (vgl. v. 19). Tog moet hulle besef dat Jesus nie net vir die Jode gekom het nie. Al die nasies moet die boodskap hoor (vgl. v. 25). Daarom moet ons eers by onsself begin. Die Here begin deur die verbondskinders eerste na Hom te roep (vgl. v. 26). Dan wil Hy ons uitstuur met die goeie boodskap, na almal wat nog buite is.
Die woord wat hier met “nakomeling” vertaal word, is letterlik “saad”. Die kan dus na ’n individu (Jesus) verwys, of na ’n groep mense (gelowiges). Alle gelowiges is nakomelinge van Abraham (vgl. Gal 3:29). Op watter maniere is jy en jou familie ’n seën vir al die volke van die aarde?
GEBED: Here, dankie dat U ook ons hele familie wil gebruik om die mense van alle nasies tot seën te wees. Wys ons hoe.
Lees vanaand in Handelinge 4:1-4 hoe Petrus se preek goeie en slegte resultate gelewer het.
DINSDAG 7 MAART 2017 Lees eers Handelinge 4:5-12
GEEN ANDER NIE
Daar is geen ander naam op die aarde aan die mense gegee waardeur God wil dat ons verlos moet word nie (4:12).
GESELSVRAAG: Hoe verskil Jesus van ander godsdiensleiers?
“Hoe kan julle Christene so vermetel wees om te dink dat net julle die waarheid beet het?” vra ’n aggressiewe student in ’n vergadering. Al die ander godsdienste het tog ook leiers en heilige boeke. Wat maak Jesus so anders? Ja-nee, wat Petrus hier sê, word vandag glad nie as polities korrek beskou nie. Alle godsdienste is mos gelyk. Almal het iets van die waarheid beet, nie waar nie?
Die vraag is egter: Wat is die waarheid? Was (is) Jesus werklik God wat aarde toe gekom het? As dit nie waar is nie, hoef ons mos nie vir ons aan Hom te steur nie. Maar as dit waar is, moet ons regop sit en mooi luister wat die Bybel sê. As enige ander godsdiens ook waar is, was Jesus ’n leuenaar (vgl. Joh 14:6). Dan was al die apostels ook leuenaars. Hoe kan ons ’n klomp leuenaars volg? Tog kan al die godsdienste nie waar wees nie, want hulle weerspreek mekaar. Jesus daag ons dus uit om gewillig te wees om God te gehoorsaam, dan sal ons die waarheid weet (vgl. Joh 7:17).
Ek en jy ervaar dikwels twyfel. Selfs teoloë word nie gespaar nie. Dit is doodnatuurlik. Daarom moet ons elke dag tyd maak vir die Bybel. Die Here wil Hom aan ons bekend stel soos Hy werklik is. Geniet dit.
GEBED: Here Jesus, ek glo dat U die enigste persoon is wat my kan red. Help my om die goeie nuus vandag ook met ander te deel.
Lees vanaand in Handelinge 4:13-22 hoe die apostels se vrymoedigheid hul vyande verstom het. Joune ook?
WOENSDAG 8 MAART 2017 Lees eers Handelinge 4:23-31
VRYMOEDIGHEID
Hulle is almal met die Heilige Gees vervul en het met vrymoedigheid die woord van God verkondig (4:31).
GESELSVRAAG: Wat is vir jou swaar om te doen?
“Hoe is dit dat julle twee ekstroverte met mekaar getrou het?” vra ’n tannie in Kanada vir ons een seun op ’n konferensie waar hulle albei sprekers was. Dit het hom baie binnepret besorg, want hy en sy Sjinese vrou is albei introverte. Sedert hy as tegnikus in die sending gekom het, het die Here sy lewe omgekeer sodat hy dit nie meer moeilik vind om in die openbaar te praat nie. Sy vroutjie word dikwels as internasionale spreker genooi.
Die apostels word deur die godsdienstige leiers belet om oor Jesus te praat. Dan roep hulle die gemeente bymekaar om oor dié ernstige bedreiging te bid. Het dit jou ook getref dat die apostels nie, soos ons sou doen, vir beskerming gebid het nie? Kyk mooi: Hulle bid vir vrymoedigheid. Daarna word hulle opnuut deur die Heilige Gees vervul en kon hulle met vrymoedigheid die woord van God verkondig. Dit het nie vir hulle oor hul persoonlike veiligheid gegaan nie, maar oor die uitdra van die evangelie aan almal wat dit nodig gehad het.
Jy hoef dus nie bang te wees as jy voel die Here roep jou om iets te doen nie. Saam met die roeping gee Hy ook die toerusting wat jy sal nodig hê. Wees net gewillig om te gaan.
GEBED: Here, dankie dat U ook vir my werk in u diens het.
Lees vanaand in Handelinge 4:32-37 hoe die gelowiges mekaar versorg het. Wat kan ons by hulle leer?
DONDERDAG 9 MAART 2017 Lees eers Handelinge 5:1-6
HUIGELAARS
Wat het jou besiel om dit te doen? Jy het nie vir mense gelieg nie maar vir God (5:4).
GESELSVRAAG: Wanneer probeer jy jou beter voordoen as wat jy is?
“Kyk, as jy op die nuwe dorp kom, moet jy sorg dat jy so gou moontlik vir die kerkraad gekies word sodat jy met die leiers van die dorp ’n verhouding kan bou,” word die bankbestuurder aangesê toe hy die soveelste keer verplaas word. Net so probeer baie jong mans hulle goed voordoen om ’n oulike meisie se liefde te wen. Maar agterna wys hulle eers hul ware kleur.
In Jerusalem was dit ’n statussimbool om jou eiendom te verkoop en die geld vir die apostels te bring sodat die arm gelowiges versorg kan word. Veral as jy niks daarvan vir jouself agterhou nie. Ananias en Saffira het voorgegee dat hulle die volle koopsom kom inbetaal. Hulle het vergeet dat God alles weet. Dit baat nie om leuens te vertel nie. Tog wou God die nuwe gelowiges leer dat Hy nie met huigelary tevrede is nie. Dit skaad die gemeente se getuienis. Dít het Ananias en sy vrou hul lewe gekos. ’n Wit leuentjie het hulle duur te staan gekom.
Diep in ons hart ontdek ons dieselfde gesindheid. Ons wil graag hê mense moet goed van ons dink. Daarom is dit moeilik om eerlik te wees met ons innerlike stryd. Ons moet leer om oop en eerlik te wees. Mense moet ons kan vertrou.
GEBED: Here, vergewe my dat ek so dikwels ook ’n huigelaar is. Help my om oop en eerlik in my handelinge te wees.
Lees vanaand in Handelinge 5:7-11 hoe Saffira dieselfde les moes leer en wat die gevolg vir die gemeente was.
VRYDAG 10 MAART 2017 Lees eers Handelinge 5:12-16
GROEIENDE GEMEENTE
Tog is baie mense wat in die Here geglo het, mans sowel as vrouens, algaande by hulle getal gevoeg (5:14).
GESELSVRAAG: Wat sal jul gemeente vinnig laat groei?
“Hulle
