Daarom begin hy by Abraham en Moses en werk deur die Ou Testament. Die Jode moes besef dat Jesus se boodskap bloot die voortsetting van die res van die Bybel is. Dalk was dit hierdie preek wat Saulus van Tarsus laat twyfel het sodat hy Paulus die apostel geword het.
Die dag sal vir ons almal kom dat ons nooit weer met ons geliefdes sal kan praat nie. Miskien kom dit skielik, in ’n ongeluk of ’n moord. Het jy al vir jou geliefdes vertel wat hulle moet hoor? Gebruik elke dag jou geleenthede. Dit kan dalk die laaste keer wees. Maak seker dat elkeen werklik aan die Here Jesus behoort. Ook die werknemers wat die Here aan jou toevertrou het.
GEBED: Here, baie dankie dat ek vandag nog die kans het om ’n laaste boodskap te bring. Gee my die geleentheid en die wysheid.
Lees vanaand in Handelinge 7:9-16 hoe Josef voorberei is vir die groot werk wat hy in Egipte moes doen.
WOENSDAG 15 MAART 2017 Lees eers Handelinge 7:17-22
VOORBEREI
Moses is opgelei in al die wysheid van die Egiptenaars en hy het uitgeblink in woord en daad (7:22).
GESELSVRAAG: Watter soort opleiding sou jy graag nog wou hê?
“Elke sekonde sterf vyf mense sonder Christus,” vertel ’n sendingweekspreker. Dit het baie jong mense oortuig dat hulle nie moet tyd mors met akademiese opleiding nie. Waarom moet hulle die Bybeltale aanleer en soveel jare lank hoë teologie onder die knie kry? Die Heilige Gees kan jou mos in ’n oomblik toerus. Nietemin het die apostels die Ou Testament feitlik uit die kop geken en daarna nog drie jaar saam met Jesus geleef om verder opgelei te word.
Dit lyk soms asof die Here nie haastig is nie. Hoekom het Hy Moses 80 jaar lank toegerus voordat Hy die volk verlos het? God het gesorg dat Moses die beste opleiding kry wat in daardie tyd beskikbaar was. Josefus vertel dat Moses selfs ’n groot oorwinning oor die Etiopiërs behaal het nadat hulle Egipte lank verdruk het. Moses het in wiskunde en sterrekunde studeer, en in die wette van die land en in leierskap. Hy kon hiërogliewe lees en verstaan. Hy was die bes opgeleide leier onder die Israeliete. Daarom kon God hom gebruik.
Is jy ook lus om verdere studie op te skop? Hoekom moet jy jouself so martel? Weet dit: God het ’n plan ook met jou, en Hy wil jou daarvoor toerus.
GEBED: Baie dankie dat U ook met my ’n doel het. Help my om my daarvoor toe te rus.
Lees vanaand in Handelinge 7:23-29 hoe die Here Moses 40 jaar lank in die woestyn verder voorberei het om die volk te lei.
DONDERDAG 16 MAART 2017 Lees eers Handelinge 7:30-34
GOD ROEP MENSE
Daarom het Ek gekom om hulle te red. Kom nou nader; Ek wil jou na Egipte toe stuur (7:34).
GESELSVRAAG: Wat is jou roeping?
“Ek weet nog nie wat ek volgende jaar moet gaan studeer nie,” sê ’n matrikulant. Dit laat ’n mens in onsekerheid. Baie studente skop op in hul eerste jaar omdat hulle besef dat die studierigting waarmee hulle besig is, nie die regte een is nie. Eintlik is hulle nog nie seker wat die Here se roeping vir hulle is nie. Hy gee aan elkeen sekere gawes en ervarings om hulle voor te berei vir die werk wat hulle vir Hom moet doen.
Stefanus vertel hoe Moses uiteindelik sy roeping vervul het, ná 80 jaar. Waar die meeste mense lankal afgetree het, het sy eintlike werk eers begin. Dit het begin met ’n ontmoeting met die lewende God in die veld. Om die gebede van die Israeliete te verhoor moes die Here eers tydsaam sy instrument voorberei. Daar in die stilte van die woestyn saam met die skape het Moses geleer om te luister.
Is die plek waar jy werk net ’n beroep, of is dit ’n roeping? As jy eers ontdek dat God in jou werk belangstel en dat Hy Hom verbly as jy jou werk reg doen, dan kry jou werk nuwe waarde. Onthou dat jy daardie werk ook vir Hom doen. Hy wil dit gebruik om mense na Hom toe te trek.
GEBED: Dankie dat my werk ook deel van my roeping is. Vorm my tot ’n bruikbare instrument in u hande.
Lees vanaand in Handelinge 7:35-43 hoe Stefanus bewys dat hy niks teen Moses gesê het nie. Die beskuldigings was dus vals.
VRYDAG 17 MAART 2017 Lees eers Handelinge 7:44-53
GOD IS GROTER
God, die Allerhoogste, woon egter nie in geboue wat deur mense gemaak is nie (7:48).
GESELSVRAAG: Waar is die huis van die Here?
“Welkom in die huis van die Here,” hoor ons meermale aan die begin van ’n erediens. Maar is dit waar? Sommige kerke en katedrale is gebou om die Here waardig te wees. Tog voel baie mense ontuis daar. Dit is so totaal anders as hul eie huis. Sendelinge leer gou om hul kerkgeboue volgens die plaaslike boustyl te bou sodat mense daar kan tuis voel.
Stefanus het bewys dat die klag dat hy Moses minag, vals is. Nou praat hy verder oor die klag dat hy ten gunste van die afbreek van die tempel sou wees. Geen gebou is permanent nie. Salomo het dit besef en dit in sy gebed by die inwyding van die tempel gesê. Daardie tempel was met goud en beeldhouwerk versier, maar hy het geweet dat God nie daarin sou pas nie (vgl. 1 Kon 8:27). Dit was bloot ’n simbool van God se teenwoordigheid. As die volk God verlaat, sou daar niks van die tempel oorbly nie.
God het nie ’n tempel nodig nie. Elke gelowige is ’n tempel van God (vgl. 1 Kor 3:16). Daarom moet ons ons liggaam aan God toewy. Ons mag dit nie gebruik vir sonde of dit aan iets anders verslaaf maak nie (vgl. 1 Kor 6:19). Ons moet ons liggaam so versier dat dit nie ’n verkeerde boodskap uitstuur nie.
GEBED: Here, wat ’n voorreg dat die drie-enige God in my wil woon. Help my om U vandag in alles te verheerlik.
Lees vanaand in Handelinge 7:54-60 hoe Stefanus se preek in oproer en moord geëindig het. Let op sy slotgebede, soos Jesus s’n.
SATERDAG 18 MAART 2017 Lees eers Handelinge 8:1-4
ELKEEN ’N GETUIE
Die gelowiges wat uitmekaar gejaag is, het so ver as wat hulle gegaan het, die evangelie verkondig (8:4).
GESELSVRAAG: Waar is ons gesin se sendingveld? Wat doen ons daar?
“Hoe kon die Here dit toelaat dat hierdie groeiende gemeente so vervolg word?” het jy seker ook gewonder. As jy mooi kyk, het die gemeente van Jerusalem vergeet wat Christus se opdrag was. Hulle het wel in Jerusalem getuig, maar heeltemal vergeet van Judea, Samaria en die uithoeke van die wêreld. Só sou die evangelie nooit almal bereik wat dit moes hoor nie. Die vervolging het nietemin die gewenste uitwerking gehad. Die kerk het nou begin uitbeweeg, en die een gemeente na die ander is gestig.
Let op: Dit is nie die apostels wat die sendelinge geword het nie. Dit was die gewone lidmate van die gemeente. Die vervolging het hulle nie bang gemaak om oor Jesus te gesels nie. Dit het hulle juis die vrymoedigheid gegee om die evangelie te verkondig. Die res van Handelinge sal ons vertel hoe die kerk gegroei het tot selfs in die heidense Europa.
Baie gemeentes kry in ons tyd swaar om te oorleef. Is dit dalk dat ons ook, soos die gelowiges van wie ons gelees het, bloot saamgekoek en mekaar warm gebroei het? Ons opdrag is om oor alle grense heen uit te reik met die goeie nuus van Jesus. As ons nie wil gehoorsaam nie, moet die Here dalk ’n ander plan maak.
GEBED: Here Jesus, hou ons getrou aan ons roeping
