moeite weer gevat en nie weer gelol nie,” vertel ’n koerier.
Ananias het baie getwyfel oor die opdrag wat hy van die Here gekry het. Nogtans het hy gegaan en die gevreesde Saulus met liefde gaan help. Die stukke van die legkaart het mooi in plek geval. Skielik het alles sin gemaak. God was in beheer. Hy sou van Saulus die vervolger, Paulus die apostel maak. Paulus was en is vir miljoene mense vandag nog tot seën omdat een gelowige ’n gevaarlike opdrag gehoorsaam het.
Dit is ’n groot avontuur om Jesus te volg. Jy weet nooit wat vandag vir jou wag nie. Bly nogtans op God se golflengte ingeskakel. Iewers is daar iemand wat jou vandag gaan nodig hê. Wees gewillig om na hom of haar uit te reik.
GEBED: Here, ek is dalk nie ’n Paulus nie, maar U wil my soos vir Ananias gebruik. Help my die geleenthede benut.
Lees vanaand in Handelinge 9:19b-25 hoe radikaal Saulus se lewe verander het nadat hy Jesus ontmoet het.
VRYDAG 24 MAART 2017 Lees eers Handelinge 9:26-31
DIE GESLOTE KERK
Barnabas het hom egter oor Saulus ontferm en hom na die apostels toe gebring (9:27).
GESELSVRAAG: Hoe welkom voel vreemdelinge in ons kerk?
“Ek het eendag die begeerte gehad om ’n erediens in jul gemeente by te woon,” vertel ’n Amerikaanse sendeling aan ’n bekende leraar. “Ek het nie jul gesangboek gehad nie, maar was seker ek kon met iemand anders deel. Die persoon langs my was egter so ongasvry dat ek onwelkom en verstote gevoel het.” Die dominee moes haar verskoning vra dat een van sy lidmate so liefdeloos opgetree het.
Ná Saulus se bekering het hy eers woestyn toe gegaan om in die stilte sy nuwe geloof met sy ou kennis te versoen (vgl. Gal 1:15-17). Toe probeer hy by die gemeente in Jerusalem inskakel. Hy was egter onwelkom. Hy is mos die vervolger van die gelowiges. Hy het mos bygestaan toe Stefanus vermoor is. Gelukkig was daar ’n Barnabas (Bemoediger) wat hom aan die hand geneem en aan die apostels kom voorstel het.
Hoe vreemdeling-vriendelik is jul gemeente? Hoe sou ’n Nigeriër of Sjinees verwelkom word? Wat van ’n Rasta? Of ’n boemelaar? Of ’n prostituut? Of ’n oudgevangene? Die gemeente is mos die liggaam van Christus. Hy wil deur ons uitreik na mense wat verlore gaan. Sy liefde moet deur ons vloei. Dit sal dikwels meebring dat ons buite ons gemaksone sal moet beweeg.
GEBED: Here, dis onverstaanbaar dat U iemand soos ek kan liefhê. Laat u liefde deur my na ander vloei.
Lees vanaand in Handelinge 9:32-35 hoe ’n Goddelike genesing baie mense tot bekering gebring het.
SATERDAG 25 MAART 2017 Lees eers Handelinge 9:36-43
BOKKIE
Sy was altyd besig om goed te doen en die armes te help (9:36).
GESELSVRAAG: Wie ken jy wat altyd ander mense help?
“Wat kry ék daaruit?” is die vraag op die meeste mense se lippe. Ons wil graag ontvang, maar so min moontlik uitgee. Hierdie selfsug heers maklik in elke hart. Daarom is dit wonderlik dat die Heilige Gees ons verander van mense wat ontvang na mense wat gee, soos ons hemelse Vader. Dit is wat die Here Jesus van sy volgelinge verwag (vgl. Hand 20:35).
Lukas se vertelling keer nou terug na Petrus. Tabita se naam in Grieks was Dorkas. Albei name beteken wildsbok in Afrikaans. Sy was ’n gelowige vrou wie se hande vir niks verkeerd gestaan het nie. Sy het ’n hart vir ander mense gehad en was gedurig besig om veral die armes te help. Sy was ’n doener, nie ’n prater nie. In ’n tyd toe klerewinkels skaars en duur was, het sy eiehandig klere vir die armes gemaak. Min mense wou dit doen, dus was dit vir baie mense ’n ramp toe sy oorlede is. Maar die Here het Petrus gebruik om haar nog ’n kans te gee om te dien.
In baie kerke word die vrouevereniging na hierdie vrou genoem. Sy is vir ons ’n voorbeeld om na te volg. Ons leef nie vir onsself nie. Ons is daar om ’n verskil te maak, veral aan die minderbevoorregtes. Wat is jou talente? In wie se lewe kan jy daarmee ’n verskil maak?
GEBED: Here, dankie vir die gawes wat U aan my gegee het om ander mense mee te help.
Lees vanaand in Handelinge 10:1-8 hoe die Here die evangelie oor kultuurgrense laat spring het.
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.
