Ek sal jou vang,” het die pa sy seuntjie aangemoedig. Toe die seuntjie spring, staan die pa opsy en die outjie kry baie seer. “Laat dit nou jou eerste les wees: Jy kan niemand vertrou nie, nie eens jou pa nie,” verduidelik sy pa. Dit lyk asof die Israeliete ook so ’n pa gehad het.
Moses verduidelik met vele voorbeelde dat die volk nie verdien het om bevry te word en die beloofde land te ontvang nie. Hulle het die straf van God verdien, want hulle was gedurig in opstand teen die Hom (vgl. v. 24). Elke keer wat die Here ’n opdrag gegee het, was hulle onwillig. Hulle het God nie geken nie. Hulle het steeds nie besef dat Hy nie in hul diens was nie, maar andersom. Moses het verstaan, en daarom moes hy ernstig voorbidding vir hulle doen (vgl. v. 25-29).
Ons word uit genade gered deur die geloof (vgl. Ef 2:8). Maar ons word met ’n doel gered. God wil ons gebruik om ander mense te help (vgl. Ef 2:10). Dit is eers wanneer ons besef met Wie ons te doen het, dat ons uit liefde wil doen wat Hy wil hê. Kyk vandag mooi wat die Here vir jou wil wys. Wat wil Hy deur jou doen? Wees gewillig om Hom vir ’n wonderwerk te vertrou.
GEBED: Here God, ek ken U nog so sleg. Vergewe my my ongehoorsaamheid en maak my gewillig om te doen wat U sê.
Lees vanaand in Deuteronomium 10:1-9 hoe ’n goeie leier sy volgelinge in gebed dra.
DONDERDAG 19 JANUARIE 2017 Lees eers Deuteronomium 10:10-22
GOD VERWAG GEHOORSAAMHEID
En nou, Israel, die Here jou God vra net dat jy Hom moet eer, sy wil moet gehoorsaam, Hom moet liefhê en dien met hart en siel (10:12).
GESELSVRAAG: Hoe kan ons die Here beter leer ken?
“Omdat ek die ma is, dis hoekom,” staan op een van ’n Amerikaanse vriendin se T-hempies gedruk. Ons almal onthou hoe ’n kleuter ’n oneindige bron van “hoekoms” kan wees. “Sommer is nie ’n rede nie,” het ons een kleindogter haar ouma probeer reghelp. Ons wil so graag weet hoekom ons iets moet doen.
Moses gee ses redes waarom ons God moet gehoorsaam. In die gedeelte wat ons vandag gelees het, kry ons die eerste een: Ons moet Hom gehoorsaam omdat Hy uniek is en ons liefhet, al verdien ons dit nie. Hy verwag dat ons sy liefde met liefde moet beantwoord. Ons moet Hom liefhê en ons moet ons naaste liefhê. Dink maar aan wat God vir jou gedoen het, dan sal jy Hom liefhê. Let op wat Moses hier van God vertel.
Lees weer vandag se teksvers. Is jy al op hierdie vlak? Indien nie, wat moet verander? Let ook op wat die sigbare tekens van die ware liefde vir God is (vgl. v. 17-19). God is met elkeen van ons besig. Ons kan dus verwag dat ons vandag, of in die nabye toekoms, getoets sal word om te sien of ons gehoor het wat Hy sê. As jy die toets dop, is dit met ’n doel. Laat God jou verander.
GEBED: Sonder u genade kan ek niks doen nie, Here. Verander my om ál meer soos U te wees.
Lees vanaand Deuteronomium 11:1-12 en dink aan watter magtige dade van God jy al self raakgesien het. Dis die tweede rede.
VRYDAG 20 JANUARIE 2017 Lees eers Deuteronomium 11:13-21
SEËN VIR JOU GESIN
Leer dit vir jou kinders deur met hulle daaroor te praat as jy in jou huis is en as jy op pad is, as jy gaan slaap en as jy opstaan (11:19).
GESELSVRAAG: Hoe kan ons mekaar aan die Here se Woord herinner?
“Hoe kan ek my kinders toerus om die versoekings te weerstaan wat vir hulle in die buitewêreld wag?” is die vraag waarmee baie ouers deesdae worstel. Ons kinders kry selfs op laerskool te doen met drank, dwelms en voorhuwelikse seks. Ons het op daardie ouderdom nog met poppe en karretjies gespeel. Sommige ouers verkies tuisskoling sodat die kinders se geloof sterk gevestig kan word voordat hulle met die buitewêreld se versoekings te doen kry. Ander verkies openbare skole sodat die ouers hul kinders deur al die versoekings kan begelei.
Moses leer die volk dat hul kinders van kleins af moet leer om die Here te dien, anders lyk hul toekoms donker. Daar was nog nie staatskole nie. Alles moes in die huisgesin geskied. Kinders het geleer deur te sien en te hoor wat hul ouers doen. Daarom was godsdiens deel van die alledaagse lewe, nie net vir een dag in die week nie.
’n Ruk gelede was ’n Amerikaanse gesin van ses by ons op besoek. Hulle was op ’n jaar lange reis deur die wêreld, en die kinders het tuisskoling gekry so ver hulle gaan. Hul gehoorsaamheid en goeie maniere was opvallend. Hulle het nooit baklei nie. Is Moses dalk reg?
GEBED: Hemelvader, U het kosbare kinders aan ons toevertrou. Help ons om hulle van kleins af op u pad te begelei.
Lees vanaand in Deuteronomium 11:22-32 wat die gevolg sal wees as ons reg kies.
SATERDAG 21 JANUARIE 2017 Lees eers Deuteronomium 12:1-12
WEES ANDERS
Julle mag nie die Here julle God dien op die manier waarop ander nasies hulle gode dien nie (12:4).
GESELSVRAAG: Hoe aanbid mense van ander godsdienste?
“Wanneer die toordokter oortuig is dat die voorvadergeeste ontevrede met hul nageslag is, sal hy of sy bepaal watter soort dier geoffer moet word. Dan kom die hele familie bymekaar. Die dier moet dan doodgemartel word. Dit is belangrik dat die dier skreeu, as teken dat die geeste die offer aanvaar.” So vertel iemand wat jare lank onder die amaXhosa gewoon en gewerk het.
Moses is bang dat sy volk die gebruike sal oorneem van die heidense volke wat in die beloofde land gewoon het. Daarom beveel hy dat daar met ’n skoon lei begin word. Al die heidense aanbiddingsplekke moet vernietig word. Die lewende God word op ’n ander manier aanbid. Daarom sou daar ’n tempel wees waar almal bymekaarkom om Hom te aanbid.
Daardie tempel bestaan nie meer nie. Sedert Jesus gekom het, is elke gelowige self ’n tempel van die Heilige Gees (vgl. 1 Kor 3:16). Nou hoef ons nie meer een maal per jaar na ’n ver plek te reis om God te aanbid nie. Ons mag elke dag met God verkeer en Hom aanbid net waar ons is. God is nie ver van ons af nie. Hy sal dus wees waar ons ook al vandag sal beweeg. By die sport of by die see is Hy ook. Gee Hom die eer in alles wat julle gaan doen.
GEBED: Ons wy hierdie dag ook aan U, Here. Ons wil U verheerlik in alles wat ons vandag sal doen.
Lees vanaand in Deuteronomium 12:13-19 hoe die alledaagse lewe ook deel van die aanbidding van God is.
SONDAG 22 JANUARIE 2017 Lees eers Psalm 119:49-56
GENIET JOU GODSDIENS
Om u bevele uit te voer, is vir my die lewe (119:56).
GESELSVRAAG: Wat is vir jou lekker aan Sondag?
“Toe ek klein was, het my ouers my gedwing om twee keer elke Sondag kerk toe te gaan. Toe het ek besluit dat my kinders nie so moet grootword nie. Ons gaan dus nou net kerk toe wanneer ons lus het,” vertel ’n lidmaat aan die ouderling wat met hom oor sy kerkbywoning kom gesels. “Ek glo dat dit beter is om in die bed te lê en te verlang na die kerk as om in die kerk te sit en te verlang na die bed.”
“Jy weet, toe ek klein was, het my pa my gedwing om saam te gaan rugby toe. Nou gaan ek nooit meer nie, want ek het mos genoeg gegaan toe ek nog ’n kind was. Elke wedstryd duur langer as ’n uur. Hulle vra altyd geld daar. Die sitplekke is ongemaklik. Die luidsprekerstelsel is swak. Die sang is power. Ek stem ook nie saam met alles wat die skeidsregter
