jy dalk vandag nie lus om kerk toe te gaan nie? Wat is jou verskoning? Die Bybel sê: “Ons moenie van die samekomste van die gemeente af wegbly soos party se gewoonte is nie, maar mekaar eerder aanmoedig om daarheen te gaan, en dit des te meer namate julle die oordeelsdag sien nader kom” (Heb 10:25). Maar dan kan jy ook nie met vandag se teksvers saamstem nie. Ek wonder wat jy vandag gaan misloop …
GEBED: Dankie dat U vandag ’n afspraak met my gemaak het, Here. Help my om niks van vandag se seën te mis nie.
Lees vanaand in Psalm 119:57-64 hoe ons die Here dag en nag kan dien.
MAANDAG 23 JANUARIE 2017 Lees eers Deuteronomium 12:20-32
DIEN ANDER(S)
Julle mag nie die Here julle God dien op die manier waarop hulle hulle gode dien nie, want wat hierdie nasies doen, is afskuwelik vir die Here … (12:31).
GESELSVRAAG: Watter sondes word in die naam van godsdiens gedoen?
“Dit is verskriklik dat hierdie massamoorde, verkragtings, verwoesting en marteling in die naam van godsdiens gedoen word,” sê ons vir mekaar toe ons die jongste wêreldnuus bespreek. In baie lande is burgeroorloë reeds jare aan die gang. Jare lank word daar geen salarisse verdien, skoolgehou of mediese dienste gelewer nie. Geen kos word meer geproduseer nie. Wat hou die toekoms in? Sal dit ook na ons land versprei?
Dit is niks nuuts nie. Die heidense volke in Moses se tyd het verskriklike dinge in die naam van godsdiens aangevang. Ouers het selfs hul kinders lewend verbrand om die guns van afgode te koop. Daarom word die volk Israel verbied om selfs navraag te doen oor hoe daardie mense aanbid het. Dit kan jou in die versoeking bring om ook soos hulle te maak (vgl. v. 30-31).
Dit is aanloklik om saam met die stroom te gaan. Baie lewens word verwoes omdat veral jong mense die romantiese deel van godsdienstige selfdood raaksien en nie verder dink nie. Ons moet mooi luister na wat die Here in vandag se Skrifdeel vir ons wil sê. God wil jou ’n seën vir die nasies maak, nie ’n verskrikking nie.
GEBED: Here, vandag bid ons vir die miljoene mense wat ly as gevolg van godsdiensoorloë. Red hulle uit genade.
Lees vanaand in Deuteronomium 13:1-10 hoe selfs wonderwerke en geliefdes jou nie mag verlei om ander gode te dien nie.
DINSDAG 24 JANUARIE 2017 Lees eers Deuteronomium 13:11-18
WEERSTAAN SONDE
Die stad moet vir altyd ’n puinhoop bly. Dit mag nie weer herbou word nie (13:16).
GESELSVRAAG: Hoe kan ons vandag sonde bestry?
“Hoe kan ons die vloedgolf van misdaad en geweld in ons land bestry?” is die vraag waarmee die regering en die sekerheidsmaatskappye elke dag worstel. Dit is opvallend dat hierdie soort ding nie net in ons land voorkom nie, maar in feitlik elke land op aarde. Menselewens het goedkoop geword. ’n Egpaar is doodgeskiet vir R3,50 wat hulle toevallig by hulle gehad het.
Moses wou die volk ernstig waarsku om nie weer in afgodsdiens terug te val nie. Sou geweld help? Ons lees nêrens dat die voorskrifte in hierdie hoofstuk só toegepas is nie. Miskien het hulle besef dat dit nie ’n oplossing sou wees nie. Ons stryd is nie teen mense nie, maar teen die onsigbare bose magte (vgl. Ef 6:12). Mense se hart moet verander. En dít kan ons nie met geweld afdwing nie.
Die Ou Testament vertel ons hoe hopeloos die stryd is om sonde deur wette te bestry. Keer op keer het die volk teruggeval. Nou kan ’n mens goed verstaan waarom Jesus na die aarde moes kom. Ons kan ons hoegenaamd nie self red nie. Jesus het gesterf sodat die Heilige Gees in ons kan werk en ons lewe radikaal kan verander.
GEBED: Here, sonder U kan ons niks doen nie. Verander ons hart, en ook dié van die mense om ons, deur u Gees.
Lees vanaand in Deuteronomium 14:1-21 hoe die Israeliete se spyskaart moes wys dat hulle hul aan God gewy het.
WOENSDAG 25 JANUARIE 2017 Lees eers Deuteronomium 14:22-29
DANKOFFERS
Jy moet elke jaar ’n tiende van die opbrengs van jou gesaaides, van wat op jou land groei, opsy sit … (14:22).
GESELSVRAAG: Hoe wys ons ons dankbaarheid aan die Here?
“As ons lidmate net ’n tiende van hul inkomste aan die Here wou wy, sou ons ongelooflik baie vir die koninkryk van God kon doen. Daar sal geen behoeftiges meer wees nie. Ons sou sendelinge na al die onbereikte volksgroepe kon uitstuur. Ons gemeentes en kerklike bedienings sou nie meer sukkel om kop bo water te hou nie,” noem ’n predikant tydens ’n predikantekonferensie.
In Moses se tyd het die gelowiges twee tiendes van hul inkomste aan die Here gewy. Hul dankoffers was wat hulle meer as die twee tiendes gegee het. Die eerste tiende het na die Leviete gegaan omdat hulle nie vir hulleself kon sorg nie (vgl. Num 18:24). In vandag se gedeelte lees ons van die tweede tiende. Dit was bedoel om voor die Here fees te vier (vgl. v. 26) en om te sorg vir die vreemdelinge, weduwees en wese en almal wat behoeftig was (vgl. v. 29).
Deesdae wil mense nie meer van tiendes hoor nie, hoewel Jesus duidelik sê ons mag dit nie nalaat nie (vgl. Matt 23:23). Geen wonder dat ons sukkel om met tien tiendes deur te kom nie. God wil nie soos die hond net die oorskiet hê nie. Hy wil eerste in ons lewe kom. Dan kan ons Hom vertrou om met die nege tiendes deur te kom. Hoeveel van jou inkomste gaan aan die Here se werk?
GEBED: Vader, dankie vir u groot genade wat vir ons sorg. Help ons om u eiendom reg te bestuur sodat u koninkryk kan kom.
Lees vanaand in Deuteronomium 15:1-11 hoe armoede bestry is deur elke sewe jaar alle skuld af te skryf.
DONDERDAG 26 JANUARIE 2017 Lees eers Deuteronomium 15:12-23
BESTRY ARMOEDE
Maar wanneer jy hom vrylaat, moet jy hom nie met leë hande laat gaan nie (15:13).
GESELSVRAAG: Hoe kan ons die armoedespiraal verbreek?
“Dit is feitlik onmoontlik om uit die armoedespiraal weg te breek,” verduidelik iemand wat ’n studie daarvan gemaak het. “Kinders uit so ’n huis ontwikkel nie genoeg nie omdat hulle nie genoeg kos en stimulasie kry nie. Min van hulle voltooi hul laerskoolopleiding. Dit is makliker om hul ouers se voorbeeld te volg en die seer en armoede in alkohol of dwelms te probeer vergeet. Hul eie kinders het dus ook maar weinig hoop op ’n beter lewe.”
Moses se oplossing was dat armes wat hulleself as slawe verkoop het om kos te kry, elke sewe jaar vrygelaat moes word (vgl. v. 12). Hulle moes dan op die been gehelp word sodat hulle hulleself kan onderhou (vgl. v. 13-14). ’n Slaaf mag nie mishandel word nie (vgl. Lev 25:43). Hy mag geld spaar om homself vry te koop (vgl. Lev 25:47-49). ’n Slaaf wat ontsnap het, moet vryheid kry (vgl. Deut 23:15-16). Só wou hulle armoede onder die volk uitroei.
Ons lees dat geen Christene ná Pinkster in Jerusalem gebrek gely het nie (vgl. Hand 2:44; 4:34-35). Die gelowiges het vir mekaar gesorg omdat hulle mekaar leer liefkry het. Die diakens moes toesien dat niemand gebrek ly nie (vgl. Hand 6:1-3). Die optrede wat ons vandag van die staat verwag, is eintlik die kerk se verantwoordelikheid.
GEBED: Here, wys my hoe ek armoede hier kan bestry.
Lees vanaand in Deuteronomium 16:1-12 hoe die Paasfees elke jaar gehou is
