Ни даулыйсың, йөрәк? / О чём тревожишься, сердце? (на татарском языке). Лена Шакирзянова

      Башланмаган тормыш тора алда:

      Минем әле, бура буратып,

      Өр-яңа өй салып керәсем бар,

      Өмә ясап, буран уйнатып…

      Түбәсенә аның кояш кунар, —

      Нуры төшәр нигез ташына.

      Әйдүк, түрдән уз, дип, ашыга-ашыга

      Чыгармын күк бәхет каршына.

      Тәрәзләре карар

      урам якка, —

      Күренеп торсын ыгы-зыгысы.

      Капкасыннан йомыш-фәлән белән

      Өзелмәсен кече-олысы.

      Идәненә аның игелек иңәр,

      Түшәменә шатлык түшәлер.

      Бердәнберем дигән бер тиңенә

      Насыйп булыр кайнар түшәге…

      Башланмаган тормыш тора алда,

      Иртә әле әйтү «хуш» ларны.

      Мичтән генә чыккан бөтен калач

      Табынымда көтәр дусларны…

      Зарланмыйбыз һич тә, үзебез

      Сайлап алдык язмышкайны:

      Килә тора, үтә тора —

      Бер сөенеч, ике кайгы…

      Агач башларыннан түгел,

      Адәм башларыннан йөри

      Бәла дигәннәре, кайчак

      Упкыннарга илтеп тери…

      Ә берәүләр гомер сөрә,

      Кагылмыйча җиң җиле дә…

      Яши алар бәрелмичә,

      Күгәрмичә бер җире дә.

      Андыйларга ләкин җирдә

      Бәйрәм дә юк, тантана да.

      Белми алар күз-яшь түгеп

      Кайгыра да, шатлана да…

      Зарланмыйбыз, үзебез сайлап,

      Теләп алган язмыш кулда.

      Юл газабы – гүр газабы:

      Ниләр булмас олы юлда…

      Ә шулай да вакыт бераз

      Төзәтергә язмышкайны —

      Бездә хәзер яңа исәп:

      Туар шатлык, узар кайгы.

      Яшьлек…

      аяклары җиргә тияр-тимәс

      йөгереп үтте.

      Әмма безгә акыл биреп китте.

      Акыл исә безне отты —

      дөнья гаме итәктән тотты…

      Өлгердек, урылдык, сугылдык!

      Ярый әле, анда-монда сугылып,

      җир-су талымлап йөрмәдек —

      Бер туфракка ул булдык, кыз булдык,

      табындык, баш идек…

      Их! Кичә генә әле

      без шундый яшь идек!..

      Диңгезне даулаган давыл күк,

      Күкләрне яулаган яшен күк.

      Гамь өстенә гамь тора өстәлеп,

      Узды яшьлек – яшел төш, истәлек…

      Өлгердек, урылдык, сугылдык,

      Орлык булып яңадан чәчелдек…

      Их! Кичә генә әле

      без шундый яшь идек!..

      – Ни яме бар тормышыңның?—

      диеп, мине кимсендермә.

      Бәхетле мин: бу дөньяны

      сабыйларча ихлас сөям…

      Бәхетле йолдыз астында

      тумаганмындыр да, бәлки.

      Табып

Скачать книгу