vir die vreemdes wat nou skielik voor my verskyn,
wat uit hul gate kruip en bewerig kom buig.
Dankie dat U my verhef het.
U trou is onbeskryflik kosbaar vir my.
Vir ons, die Dawidskinders.
Lees Psalm 19:1-7 | 27 Januarie
Die hemele roem
Hoor daar, Here, dit is die hemele wat so roem!
Hoor U die eer wat u skepping U toebring?
Ja, dit is oor U dat die gejuig losgebars het.
Dit vloei jubelend voort, sonder ophou –
dag ná dag, nag ná nag. Van ewigheid af
en tot in alle ewigheid.
Daar kom wel dae dat die skepping ook swaar sug,
dat die aarde na die hemel roep –
en, meestal lank en soms vergeefs, op ’n antwoord wag.
Maar vandag is daar net één geluid –
’n dawering van bo,
van onder, van oral.
Haai, nee, Here, ék hoor dit nie –
maar U het my mos oë in my kop gegee.
Ek sién hoe klap die uitspansel hande,
gloeiend en geluidloos.
En wie kan die son miskyk?
Wie kan sy stralende vreugdepad ontken?
Hy trap dan ’n briljante spoor heelpad deur die hemelruim;
dit is skynbaar sy manier om te wys: Só is ek!
Te verkondig: Só is U, Here God!
’n Verterende vuur, ’n hittegloed
waarteen niks en niemand hulle kan verweer nie.
So sien ek dit:
Die uitspansel skryf ’n storie tot God se eer,
’n sprankelende verhaal.
Jy lees dit maklik in die sterre
wat guitig knipoog, en die maan
wat soms breëmond lag.
En jy hoor duidelik as hulle almal
– die son, die maan, die sterre, wind en wolke –
uitbundig juig, of verwonderd fluister:
God is groot, Hy is onmeetlik groot.
Lees Psalm 19:8-12 | 28 Januarie
U wet
Here, ek ken u wet
en ek begryp alte goed
wat U van my, u kind, verwag.
En, nee, dit is nie moeilik nie.
Ek weet wel hoe swaar dit is om dit na te kom.
Uit dure ondervinding weet ek, Here, dat u wet
onder meer aan my gegee is om my teen myself
te beskerm. Dat dié gebooie nie deur U uitgedink is
om my in te perk nie, maar dat dit u liefdesplan is –
’n manier om te keer dat ek my weer eens noodlottig
toespin in selfgesentreerdheid en eiewaan, ’n web
van magsvertoon en, onafwendbaar, uiteindelik onreg.
U wet gee aan my die energie
wat net ’n nuwe doelwit kan regkry.
Op ’n verstaanbare manier moedig dit
my aan om die regte dinge te doen en te sê.
U wet maak my bly, en die helderheid
daarvan maak my oë groot en blink,
omdat dit aan my die regte insig gee.
En as jy lank genoeg daaraan herkou,
leer ken jy die smaaklikheid daarvan.
Dit alles maak dat ek nie genoeg kan kry nie,
dat ek soos ’n kind nóg en nóg wil hê, Here!
Boonop weet ek dat die beloning
wat daaruit voortkom, groot is:
Hulle wat u wet ter harte neem, is skatryk.
Leer my dan, Here, om die gulde geleentheid
wat U my gee met alles wat ek het, aan te gryp.
Om hierdie oorvloed
dankbaar te ontvang
en met hart en siel en liggaam
dié soetheid gate uit te geniet.
Lees Psalm 19:13-15 | 29 Januarie
Gedagtes, woorde, planne
Here, U ken my beter as wat ek myself ken:
U lees my gedagtes
nog voordat hulle by my opkom.
U ken my planne
terwyl ek hulle heimlik beraam.
U hoor my woorde
wanneer dit agter in my keel huiwer.
Daarom, Here, keer my as ek dom dinge bedink!
Voordat ek dit later ten uitvoer bring
in die waan dat dit goed en gepas is.
My ondeurdagte optrede is ’n verleentheid
vir my, vir die mense wat my liefhet,
én, vermoed ek, ook vir U.
Help my reg, voordat ek my naam
deur die modder sleep
en u Naam in oneer bring.
