eer vir sy pogings en oorwinnings.
In die sielkunde pas ons die beginsel toe dat die beste voorspeller vir toekomstige gedrag, huidige gedrag is. Indien ons dan binne die huwelik geduldig en met toegewydheid die hier en nou kan beïnvloed met regte keuses, kan ons mos die toekoms van verhoudings rig na geluk en respek toe. Kies gewoon om vandag, nou, so op te tree.
Dan kan ons hierdie insig van Jakobus op sy woord neem, dat ons ons lewensdoelwitte sal bereik en ook binne die huwelik geestelik gesond kan leef.
Leef ek geestelik gesond binne my huwelik?
Vader, ek begeer geduldige kommunikasie met my maat sodat ons geestelik gesond kan leef. Amen
25 Januarie
Hande vol onverdiende genade
Johannes 1:16 – Uit sy volheid het ons almal ’n oorvloed genade ontvang.
’n Halfuur by die St John-kerkie op Bathurst gister laat my gees geskuur voel vanoggend. Ons wou Bill Charmers se stasies van die kruis gaan beleef.
’n Helderoog man ontmoet ons binne, fyn vel strek glad oor die kaal kop en laat die gesig ouer lyk as wat die oë sê. Sy sagte stem nooi ons na die belewenis van die terrein en die gebou. Sy knieë pla en hy sal nie saamstap in die kerkhof nie. Hy wag geduldig by die voordeur op ons terugkeer.
Terug in die kerk gesels hy soos ’n ingeligte toergids. Ek sien die gat in sy baadjie se rug en wonder oor die modderstewels en kaal bene. Hy praat orrels en kuns, kansels en klokke.
En êrens praat hy sy eie storie. Sy pa wat die Anglikaanse priester was, sy eie pad met sy God, sy woonwa en sy belewenis van die koue van die Oos-Kaap.
Te gou staan ons by ons motor, en hy by die hekkie. Ek voel hy hou ons nog net een oomblik saggies vas. Die laaste sien is sy rugkant soos hy deur die oop deur van die kerk loop.
Op pad terug na ons eie strand gesels ons oor die ervaring. Die eenheid van die huwelik blyk duidelik in die ooreenkoms van ons belewenis; die man se helder gees ons blywendste indruk.
Ek wonder oor sy lewe, hoe hy daar beland het en of hy snags koud kry. Waar is sy mense en hoekom is daar vir my soveel genade dat my baadjie nie ’n gat op die rug het nie?
Is ek bewus van God se genade in my lewe?
Vader, gee dat ek die volheid van U genade in my lewe beleef. Amen
26 Januarie
Sy seën sal weer reën
Psalm 37:7 – Wees stil in die Here, en wag geduldig op Hom. Moenie die mens beny wat op sý manier floreer, of jou verknies oor sy bose planne nie. (NLV)
Vir ’n maand lank wag ons vir die reën, voel ons stukkie aarde dit het sy guns by die Reënmaker verloor. Maar vandag, van donkervroeg af, val daar dik, silwer water.
So dikwels beleef ek die frustrasie van die tydlyn. My tydlyn en God se skepping en voorsiening val dikwels nie in dieselfde tydsone nie.
Moedeloos gewag, kom ek elke keer weer by dieselfde vraag uit: Wie is God werklik? Sy karakter is onveranderbaar. Hy kan nie iets of iemand anders word omdat my lewensomstandighede uitdagend of moeilik is nie. Dit verander nie aan my vertwyfeling wanneer die uitdagings van die lewe groot is nie.
Heel dikwels word ons uithouvermoë en geloof gelyktydig die uitdaging. ’n Moeilike konteks kan lank aanhou. Ons voel God hoor nie ons stem nie, of vergeet van ons. Die klem hier is dat dit so voel. God se karakter laat Hom nooit toe om van ons te vergeet nie.
In hierdie tye is die teenvoeter vir negatiewe emosies om te lees wie God is. Oorspoel jou denke en emosies met die feite van wat jy glo oor jou hemelse Vader. Uiteindelik gaan alle seisoene verby, sommiges te lank, ander te kort.
Die spruit agter ons huis raas met diep, lewegewende water. Die geute beur en bruis, die swembad loop oor en die grasperke blink van damme water. Vandag gee God baie. Ons drink sy seën in terwyl die honde al ure by my voete lê en ek in my slaap glimlag.
Sien ek God se seën in my lewe raak?
Vader, ek wil u wil in my lewe soek en met geduld vir u tydsberekening wag. Amen
27 Januarie
God, ons heel eerste liefde
Johannes 6:27 – Julle moenie werk vir die kos wat vergaan nie, maar vir dié blywende kos wat lei tot die ewige lewe. Dit sal Ek, die Seun van die Mens, aan julle voorsien, want God die Vader het My daartoe bestem. (NLV)
God se liefde kan nooit vergaan of opraak nie. Die huwelik moet dit nastreef, maar mag nooit die liefde en fokus van God af wegneem nie.
Hoe wonderlik om verlief te wees! Die brein skei chemikalieë af wat ons in die sfeer van beneweling plaas. Niks kan die gevoel oortref nie. Wanneer daar genoeg tyd verloop het en die stortvloed van chemie afgeneem het, is die gevoel inderdaad baie anders. Nou kan die verhouding binne die normale grense van verbintenis begin.
Hierdie emosies geld nie in ons verhouding met God nie. Die konstantheid van God se liefde oorskry alle grense van kwantiteit. Dit kan nooit opraak of verflou nie. Daarom is die liefde vir, en vanaf God, onvervangbaar in jou lewe. Dit rig die huweliksliefde en hou dit in stand. Ons liefde vir God vorm die buffer vir pyn tussen huweliksmaats.
As ons liefde vir God die hooffokus van ons lewe is, het ons ’n baie beter kans om in ’n meer gebalanseerde en realistiese verhouding met ons lewensmaat te wees. My maat word dan nie opgesaal met die onmenslike taak om my liefdesnood te vervul nie. Ons kan mekaar dan binne die konteks van God se vervullende liefde liefhê.
Die uitdaging is om die balans te vind tussen liefde vir God en liefde vir my maat. Begin met die liefde vir God en gebruik daardie verhouding as basis vir alles in jou lewe.
Kom my verhouding met God eerste in my lewe?
Vader God, ek plaas U eerste in my lewe en ons plaas U eerste in ons huwelik. Amen
28 Januarie
Laat Hy jou beker vul
Openbaring 21:6 – Verder het Hy vir my gesê: “Dit is afgehandel. Ek is die Alfa en die Omega, die Begin en die Einde. Iemand wat dors het, sal Ek verniet laat drink uit die fontein met lewegewende water.” (NLV)
Ek kan nie onthou hoekom ons waterbekers begin versamel het nie. Maar nou staan daar ’n hele klomp sy aan sy op twee rakke in die kombuis – van spierwittes tot ’n vet ronde een met blou en wit strepe. ’n Vriendin het vir ons die groene met die kartelrandjie gegee. Hoewel die rakke vol is, bly ek op die uitkyk vir mooi bekers en het ek ’n ou silwerbeker by ’n snuisterywinkel raakgeloop.
Ons gebruik graag die bekers om water te bedien as kuiergaste om die lang tafel aansit. Soms word dit ’n blompot vir ’n gerf blomme of ’n tak met suurlemoene uit die tuin. Maar meestal staan die bekers leeg op die rak net vir die mooi.
In sy Woord is talle verwysings na bekers: die beker van oordeel, van verdriet en selfs een vol angs. Vir die Fariseërs sê Jesus: “Maak eers die binnekant van die beker skoon en dan sal sy buitekant ook skoon wees.” En aan sy dissipels: “Neem
