lewe reg om gevul te word met die Gees, met die water van die ewige Lewe, met God se liefde om daarna te skink aan elkeen wat dors het.
Voel jy dors, hunker jy na meer? Laat God die kruik van jul huwelik van voor af met sy lewende water vul.
Here, ek roep soos die vrou by die put: “Gee vir my van daardie water, sodat ek nie weer dors sal kry en hoef te kom water haal nie.” Amen
29 Januarie
Loof Hom in alle seisoene
Genesis 1:14 – God het beveel: “Laat daar ligte wees aan die hemelkoepel sodat dag en nag onderskei kan word en dit ook kan dien as tekens om seisoene, dae en jare te bepaal.” (NLV)
Vandag is dit 22 °C in Johannesburg, 23 °C in Stellenbosch, in New York 28 °C en 21 °C in Jerusalem. Die weer-toep op my foon speel ’n sleutelrol in my lewe. Ek pes dit om warm te kry. Soggens, voor ek besluit wat om aan te trek, raadpleeg ek eers die weervoorspelling op my foon.
Nou met my jongste ver van die huis af, laat die wete dat ek weet hoe die weer in sy geweste lyk my sommer rustiger voel. Die lys van plekke op my foon-toep is lank en strek van Parys in Frankryk tot Hennopsrivier by die Hartbeespoortdam. Almal plekke wat ek al besoek het. Met een oogopslag kan ek sien waar die son skyn, dit reën of selfs sneeu.
Met ons besoek aan die Oos-Kaap het dié toep, tot groot plesier van ons gesin, die weer tot in die laaste detail vir ons straat aangedui. Alles te danke aan die wonder van tegnologie.
Saans as ons egter op die houtdek sit en na die sterre in die melkweg tuur, dink ek aan die Skepper van die son en die maan, die wind en die weer. Die Een wat hemel en aarde geskep het, die gang van die seisoene bepaal. Hy wat die lig en die donker van mekaar geskei het en gesien het dit was goed.
Seisoene is deel van ons lewe. Ook van ons huwelik. Soms dreig die onweer en breek storms los. Onthou, die son skyn altyd ná die ergste reënbui weer.
Here, ek loof die wonder van u skepping. Dankie vir tye van sonskyn én van reën. Amen
30 Januarie
God se stem oor jou huwelik
Matteus 1:20 – Met hierdie dinge in gedagte het hy aan die slaap geraak. Daarop verskyn ’n engel van die Here in ’n droom aan hom en sê: “Moenie huiwer om voort te gaan met jou huwelik met Maria nie. Die Kindjie wat sy dra, is verwek deur die Heilige Gees.” (NLV)
Verhoudings bring uitdagings. Ek het al dikwels aan Josef se situasie gedink. Hy moes darem maar sterk vertroue in God en ook in sy geloof in Hom gehad het om hierdie uitsonderlike boodskap te kon aanvaar. Tog aanvaar Josef die geldigheid daarvan. Dit spreek van ’n volwasse verhouding met sy God.
In tye van uitdaging kan mens jou tot God wend vir antwoorde. Soms is die antwoord op jou gebed egter nie die pad waarop God jou wil lei nie. Die uitdaging in jou lewe is dikwels daar om jou nader aan Hom te bring, en daar te hou.
In verhoudings duik daar soms uitdagings op wat nie binne die verhouding alleen opgelos of beantwoord kan word nie. Soms is daar geen antwoorde op die vrae wat ons vir ons lewensmaat wil vra nie. Ons kan net insig hierin by God kry. Ons kan gewoonlik eers oor ons maat se eienaardighede en eksentriekheid glimlag wanneer ons daardie aanvaarding by Hom gaan soek.
Josef aanvaar God se verduideliking van die nuwe uitdaging aan sy verhouding met Maria juis omdat hy in verhouding met God is. Die klem lê glad nie op Maria se verduideliking nie. Pas hierdie voorbeeld toe op jou eie verhouding en fokus meer op die insig wat God bring as op die pogings van jou lewensmaat.
Soek en hoor ek God se stem oor my huwelik?
Vader, help my om my verhouding met U eerste te stel en die antwoorde vir die lewe by U te vind. Amen
31 Januarie
Geluk het vele gesigte
1 Korintiërs 4:1 – Dit beteken dat julle ons moet beskou as blote diensknegte van Christus. Ja, as mense wat God se diepsinnige planne moet help bestuur. (NLV)
Sowaar, êrens in my lewe het ek werklik geglo geluk sou ’n eindelose somervakansie met luilekker strandsessies wees. God, sekerlik omdat Hy God is, sou natuurlik hierdie knus klein paradys vir my skep, vir en in alle ewigheid.
Tyd het natuurlik hierdie waan getemper. My persoonlike geluk word deesdae nie net gevind in die volmaakte oomblikke nie, maar dikwels ook in die grys, mistige dae sonder sonskyn, wanneer onvervulde drome en teleurstellings my denke bewolk.
Ons kort wegnawekie was gedroom in blou lug en ’n helder see en warm sand. Ek wou ’n mooie boek op my boekrak vind en lees terwyl die son oor die rivier sak. Ek het vergeet dat ek my honde en my kinders vreeslik sou mis, dat die lang ure saam met my vrou nou skielik vreemd sou voel binne hierdie ongelooflike besige seisoen van ons lewe.
Ek vind wel ’n hartsboek oor die diep seerkry van die lewe, skreiend in die pyn van oorlog, beeldskoon in die kuns van woorde. Ek hoor my hond se voetslaan in elke kraak van ons houthuis en soek na die diep stemme van die seuns wat manne word. En ek mis die son.
Dit was ’n grys naweek, koel gehou deur die digte mis en die verlange.
Op pad lughawe toe weet ek geluk het beslis ’n paar gesigte. Dit was ’n ongelooflik goeie naweek, ’n wegglipkans van die alledaagse. En hierin lê die skakering van geluk vir vandag.
Leef ek sowaar met die vermetele verwagting dat ek altyd gelukkig moet wees?
Jesus Christus, hou my hand vas in tye van voorspoed en dra my in die tye van teenspoed. Dankie, Vader. Amen
1 Februarie
Leef by God se liefdesvlam
Efesiërs 3:17 – Dan sal Christus deur die geloof in julle harte woon, en sal julle in God se liefde gewortel en gegrondves wees. (NLV)
Een van my kosbaarste boeke is die bundeltjie met oggend- en aandgebede, ’n onverwagte geskenk van ’n Amerikaanse kollega. Haar wens voor in die boekie bly my daagliks by: Mag die vlam van Christus se liefde vir jou die bron wees van jou liefde vir die mense wat jy help.
Hierdie vrou weet natuurlik iets van die liefde van ons Skepper: Sonder sy liefde vir ons, het ons doodeenvoudig nie werklik liefde vir ander nie. Selfs in die huwelik verloor ons soms ons vermoë om liefde vir ons maat te beleef. Ek weet mense erken dit nou nie so openlik nie, maar dit gebeur wel. Dan onthou ek gewoonlik die wens voor in my boek, en laat toe dat God se liefde vir my weer die bron diep binne my volmaak.
Geen mens kan in eie krag die liefde volhou wat die huwelik verg nie. Aan die begin van die verhouding is dit natuurlik maklik, want verliefdheid dryf die proses. Namate tyd verbygaan en verliefdheid vervang word met liefde, word die behoefte aan God se liefde al groter. Die liefde binne die huwelik kan slegs volgehou word indien daardie liefde lyk, en later is, soos God se liefde vir ons.
Die druk is dan ook sommer baie minder op jou emosies om die liefde te probeer volhou. As God jou liefdesbron is, rig sy gedagtes mos die uitlewing daarvan. Jou maat hoef nou nie meer aan al jou eise vir liefde te voldoen nie, want God is jou primêre put van liefde.
Is God se liefde vir my die voorbeeld van my liefde vir my maat?
