Daarom kan ons ook ander bemoedig wat in allerhande moeilikhede verkeer. Ons kan hulle bemoedig met dieselfde bemoediging waarmee God ons bemoedig – 2 Kor 1:4
Indien jy reeds ’n erge stuk seerkry beleef het, bemagtig dit jou om ander mense te help wat in dieselfde bootjie is. As jy jou man aan die dood moes afstaan, sal jy presies weet hoe om jou vriendin wie se man dood is by te staan; as jy self ’n gestremde kind het, is jy die beste persoon om ’n ánder ma met ’n gestremde kind raad te gee; as jy geskei is, is daar niemand wat ’n persoon wat op die oomblik deur egskeiding gaan só kan bemoedig soos jy nie; as jy self ’n alkoholis is, weet jy presies waardeur iemand gaan wat probeer om sy drinkpatroon te verander.
Geen stukkie aardse lyding is ooit verniet nie. God gebruik jou persoonlike stuk seerkry om van jou ’n vertrooster te maak. Juis dié dinge wat jou die diepste verwond het, is dié spesifieke ervarings waarmee God jou toerus om ander mense te help.
As jy bereid is om ’n trooster te word, sal jy egter gewillig moet wees om jou seerkry met ander te deel. Ek sal altyd onthou hoe my Bybelstudievriendinne saam met my gehuil het oor my dogter se egskeiding. As jy God se genade in seerkrytye ervaar, rus Hy jou toe om ánder by te staan. Moet nooit jou persoonlike stuk seerkry vermors nie – gebruik dit om ander mense mee te help, soos God jóú gehelp het.
Here, ek kon nooit voorsien hoe dié ding wat vir my die swaarste was eintlik u toerusting was om my te help om ánder by te staan nie. Dankie dat U seerkry as medisyne kan aanwend.
Amen
13 Maart
Swaarkry is nooit verniet nie
Lees Galasiërs 3:1-6
Julle het met die Gees begin; wil julle nou in eie krag eindig? Was al julle swaarkry dan verniet? Dit kon tog nie verniet gewees het nie – Gal 3:3-4
Paulus herinner die gemeente in Galasië hier aan sy vorige besoek – hy het die evangelie aan hulle verkondig en hulle het tot bekering gekom en die Heilige Gees ontvang. Daar is egter één ding wat hy nie begryp nie: Hoe húlle wat reg begin het in die krag van die Heilige Gees, nou in hul eie krag kan eindig. Hy wil van hulle weet of alles wat hulle ter wille van hul geloof moes deurmaak, dan verniet was. Hul swaarkry kón tog nie verniet gewees het nie, sê hy.
Die swaarkry wat God in ons lewens toelaat, is inderdaad nooit verniet nie. Toe W.E. Sangster, die bekende Britse prediker, gehoor het dat hy aan progressiewe spieratrofie ly, het hy vir homself ’n lysie gemaak van hoe hy sy persoonlike swaarkry wou hanteer. Hierdie lysie het sy familie eers ná sy dood in sy Bybel gekry. Hulle kon op sy begrafnis getuig dat hy tot op die dag van sy dood daarby gehou het. “Ek wil nie kla nie; ek wil opgeruimd bly; ek sal my seëninge tel, dié wat nog oorbly … ek wil soek watter goed hieruit kan voortkom,” het op Sangster se lysie gestaan.
Ook jou swaarkry is nooit verniet nie – probeer dit hanteer soos Sangster – moenie kla nie, tel jou seëninge wat nog oorgebly het en soek na die positiewe dinge in jou lyding.
Here, ek is jammer dat ek self al gewonder het of my swaarkry verniet was – help my om positief te bly en my seëninge wat nog oorbly te tel sodat ek kan weet wat U my uit die swaarkry wil leer.
Amen
14 Maart
Uitklophoue
Lees 2 Korintiërs 4:1-18
In alles word ons verdruk, maar ons is nie terneergedruk nie; ons is oor raad verleë, maar nie radeloos nie; ons word vervolg, maar nie deur God verlaat nie, op die grond neergegooi, maar nie vernietig nie – 2 Kor 4:8-9
Jesus het self negatiewe emosies ervaar toe Hy op aarde was: Hy is woedend wanneer die handelaars in die tempel die huis van sy Vader as ’n handelshuis gebruik; Hy huil by sy vriend Lasarus se graf; in Getsemane is Hy so benoud dat sy sweet soos bloeddruppels word; aan die kruis wil Hy weet waarom God Hom finaal verlaat het …
God het sy eie Seun nie van negatiewe situasies gevrywaar nie en Hy doen dit ook nie met óns nie. Maar Hy belowe dat Hy self by ons sal wees wanneer die lewe sy uitklophoue uitdeel.
Paulus vertel die gemeente in Korinte hoe hyself in krisissituasies optree: “Ek kry dikwels swaar, maar ek raak nooit mismoedig nie. Ek weet nie elke dag presies wat ek moet doen nie. Tog is ek nooit radeloos nie. Ek word vervolg, maar ek weet God los my nooit alleen nie. Soms word ek onderstebo geloop, maar ek staan elke keer weer op” (2 Kor 4:8-9, Die Boodskap).
Wanneer jy in Jesus glo, sal jy ook soos Paulus aan sy lyding deel hê. Maar God sal jou nooit alleen los nie, Hy gee jou die krag om elke keer weer op te staan wanneer die lewe jou voete onder jou uitslaan. Te midde van jou swaarkry kan jy aan Hom vashou en weet dat Hy jou uiteindelik sal red.
Hemelse Vader, dankie dat ek kan weet dat, hoewel U my nie van swaarkry vrywaar nie, U my nooit alleen sal los nie, en dat ek die versekering het dat U my deur die swaarkry sal dra.
Amen
15 Maart
In noodsituasies
Lees Psalm 31:10-20
Wees my genadig, Here, want ek is in die nood […] My lewe vergaan van kommer en my jare van swaarkry; deur my ellende word my krag geknak en teer my liggaam uit – Ps 31:10-11
Psalm 31 is een van die vele psalms wat as ’n klaaglied begin en met ’n loflied eindig. Dawid vertel God van sy noodsituasie en vra dat Hy hom sal help. ’n Mens kan nie help om Dawid vir sy fisieke toestand jammer te kry nie: Hy het nie meer krag oor nie, sy liggaam teer uit en boonop het hy nog ’n klomp vyande wat sy lewe bedreig. Ten spyte van sy haglike omstandighede vertrou hy steeds op God: “Maar ek vertrou op U, Here, ek sê: U is my God. My tye is in u hand” (Ps 31:15-16).
In sy worsteling met God ontdek Dawid dat God inderdaad sy vertroue waardig is; dat Hy hom weer sal help soos Hy al dikwels in die verlede gedoen het. “Hoe groot is u goedheid: dit is altyd daar vir die wat U dien, U bewys dit voor die oë van die mense aan die wat by U skuil”, skryf hy (Ps 31:20).
Soos in die geval van Dawid kry ons almal met noodsituasies te doen. Wanneer ons dan nog liggaamlik ook afgetakel is, raak ons situasie soms ondraaglik. Gelukkig is God steeds dáár vir jou wanneer dit sleg gaan – Hy het nog altyd ’n plan met jou lewe. En soos Dawid sal jy ontdek dat wanneer jy in krisistye op Hom vertrou, Hy vir jou krag sal gee en jou situasie só sal verander dat jy uiteindelik sy goedheid sal kan loof.
Here, ek loof U dat U my omstandighede omgekeer het en my noodsituasie ontlont het. Dankie dat ek altyd op u hulp kan staatmaak.
Amen
16 Maart
In die sorg van God
Lees Deuteronomium 8:1-8
“Hy
