Hy het dit gedoen om jou te leer dat ’n mens nie net van brood leef nie, maar dat hy leef van elke woord wat uit die mond van God kom” – Deut 8:3
Moses roep hier die volk op tot gehoorsaamheid. Hy vertel hulle dat hulle altyd moet onthou hoe God vir hulle gesorg het toe hulle deur die woestyn geswerf het. Juis as gevolg van hul swaarkry in die woestyn het God vir hulle geleer hoe om Hom te gehoorsaam. Hy het hulle in die woestyn op ’n wonderlike manier versorg en hulle van kos en water voorsien. Nou staan hulle op die drumpel van die beloofde land en ook hier onderneem God om hulle te help en vir hulle te sorg.
In die woestyn moes die volk leer dat alles nie altyd uitwerk soos húlle beplan het nie. Omdat hulle ongehoorsaam was, duur die woestynreis veertig jaar lank. Dit kon nie vir hulle maklik wees nie, tog gebruik God hierdie stuk swaarkry ten goede in hul lewe – hulle leer sy versorgende liefde veel beter ken as wat die geval sou wees as die reis net ’n kort rukkie sou duur.
In jou eie lewe verloop dinge óók nie altyd soos jy graag sou wil hê nie, tog kan God rampe gebruik om jou meer van Hom te leer, en jou ’n gehoorsamer kind van Hom te maak. Dit is veral in negatiewe situasies dat jy God se liefde en sorg vir jou op ’n nuwe manier ervaar.
Here, dankie dat ek weereens kan besef dat U vir my sorg wanneer dit moeilik gaan, én dat die stuk swaarkry van die oomblik my leer om aan U gehoorsaam te wees.
Amen
17 Maart
Straf lei tot bekering
Lees Jesaja 26:16-21
Here, in hulle nood het hulle hulle toevlug tot U geneem, toe U hulle met swaarkry gestraf het, het hulle U aangeroep – Jes 26:16
As jy self kinders het, weet jy teen hierdie tyd dat daar net een ding is wat werklik vir ongehoorsaamheid help en dit is die regte strafmaatreëls! Indien jy nie bereid is om jou kinders te straf wanneer hulle verkeerde dinge doen nie, is dit onwaarskynlik dat hulle ooit sal leer om gehoorsaam te wees.
In die profeet Jesaja se tyd word God se ongehoorsame volk as straf vir hul baie sonde in ballingskap weggevoer. Daar in die vreemde land begin hulle weer aan God dink. Omdat hul omstandighede so moeilik is, besluit hulle om ’n U-draai terug na God toe te maak. In hul nood neem hulle weer hul toevlug tot God, soos ons teksvers berig. Wanneer God sien dat sy strafmaatreëls hul doel bereik het, ontferm Hy Hom oor sy ongehoorsame kinders. Hy stuur vir hulle ’n troosboodskap deur die profeet Jesaja: “Bring vir Jerusalem die goeie tyding, sê vir hom sy swaarkry is verby, hy het geboet vir sy sonde, hy het van die Here die volle straf ontvang vir al sy sondes” (Jes 40:2).
Swaarkry in jou eie lewe het meermale die gevolg dat jy jou sonde laat staan en na God terugkeer. Wanneer dit gebeur, kan jy daarop staatmaak dat God, soos die pa van die verlore seun in die gelykenis, altyd reikhalsend op jou terugkeer wag, en dat Hy elke keer bereid is om jou al jou sondes te vergewe en jou as kind terug te ontvang.
Hemelse Vader, U luister elke keer na my wanneer ek U aanroep en my eie swaarkry my na U toe laat terugkeer. Dankie dat U altyd bereid is om my terug te ontvang.
Amen
18 Maart
God rus jou toe met krag en genade
Lees Petrus 5:8-11
God wat alle genade gee en wat julle geroep het om in Christus Jesus deel te hê aan sy ewige heerlikheid, sal julle, nadat julle ’n kort tydjie gely het, self weer oprig en julle moedig, sterk en standvastig maak – 1 Pet 5:10
Petrus roep die gelowiges van sy tyd op om wakker en nugter te wees omdat hul vyand, die duiwel, soos ’n brullende leeu rondloop op soek na iemand om te verslind. Hy maan hulle om standvastig te bly en met geloof terug te veg. Petrus bemoedig ook die gelowiges deur vir hulle te sê dat daar nog baie ánder gelowiges is wat in dieselfde stryd gewikkel is en troos hulle dat hul swaarkry nie meer lank sal aanhou nie. God sal hulle self, nadat hulle ’n kort rukkie gely het, weer oprig en hulle moedig, sterk en standvastig maak.
Indien jy, soos die gelowiges in Petrus se tyd, op die oomblik onder die versoekings van die duiwel steier en swaarkry aan jou lyf ervaar, mag jy maar hierdie belofte vir jouself toe-eien. Wanneer ’n mens swaar kry, voel dit soms of die swaarkry nooit sal verbygaan nie. Maar God belowe om jou hand te vat soos Hy met Petrus gedoen het toe hy op die stormsee wou sink. Met jou hand in God s’n sal geen probleme ooit vir jou te veel wees nie. Hy belowe om jou ook met sy krag en genade in krisissituasies toe te rus en jou ná die krisis weer op te rig. Vertrou Hom daarvoor!
Here Jesus, op die oomblik voel ek ook asof ek aan die sink is in die stormsee van my omstandighede – vat my hand asseblief en rus my toe met u krag en genade.
Amen
19 Maart
Leer uit jou mislukkings
Lees Matteus 13:53-58
En hulle wou niks van Hom weet nie. Jesus sê toe vir hulle: “ ’n Profeet word oral erken behalwe in die plek waar hy grootgeword het, en in sy familiekring.” Vanweë hulle ongeloof het Hy daar nie baie wonderwerke gedoen nie – Matt 13:57-58
Jesus het waarskynlik met groot opwinding na die dorp gegaan waar Hy grootgeword het. Hy het immers die inwoners van jongs af geken. Maar die mense van Nasaret luister nie na Hom nie. Hulle wou niks van Hom weet nie, sê vers 57. Alhoewel hulle verbaas was oor Jesus se kennis, wil hulle weet waar Hy die wysheid vandaan kry en waar sy vermoë vandaan kom om wonders te doen. “Is hy dan nie die timmerman se seun nie? Is sy ma nie Maria en sy broers Jakobus, Josef, Simon en Judas nie? En sy susters, is hulle nie almal hier by ons nie? Waar kry hy dan al hierdie dinge vandaan?” vra hulle (Matt 13:55-56).
Jesus moes baie teleurgesteld gewees het oor die reaksie van die mense van sy tuisdorp. Vanweë hul ongeloof het Hy ook geen wonderwerke in Nasaret gedoen nie. Alhoewel die mense van Nasaret Jesus weggewys het, doen Hy van sy grootste wonderwerke onmiddellik hierná. Hy gee vyf duisend mans, afgesien van die vroue en kinders, kos met vyf broodjies en twee vissies, loop op die see en maak baie siekes gesond. Jesus laat Hom nie deur mislukkings en teleurstellings onderkry nie. Jy mag ook nie. Leer uit jou mislukkings en oorkom jou teleurstellings. Dan sal jy ook die krag ontvang om daarna net beter te presteer.
Here Jesus, ek besef nou dat U ook soms die wind van voor gekry het. Help my om my teleurstellings en mislukkings as ’n leerskool te gebruik en nie bang te wees om wéér te probeer nie.
Amen
20 Maart
God se plan
Lees Galasiërs 4:8-20
Julle onthou mos hoe dit gekom het dat ek die eerste keer die evangelie aan julle verkondig het. Dit was deurdat ek siek geword het – Gal 4:13
