dit moeilik gaan. Hy gebruik teleurstellings om ons daardie plan te wys. “Teleurstelling is nie die lewe nie; dit is net ’n stasie langs die roete van die lewe,” is Ferdinand Deist se woorde in Die Groot Aanhalingsboek. “Teleurstelling is ’n geleentheid vir koersaanpassing – ’n aanpassing wat jou weer die regte perspektief op die lewe kan gee.”
Paulus het dit meermale reggekry om die slegte dinge wat met hom gebeur het óm te keer sodat dit vir ander mense tot voordeel strek. Paulus se siekte was die hoofrede waarom hy die evangelie aan die Galasiërs gebring het. Hierdie siekte het hom gedwing om tyd in Galasië deur te bring. Paulus gebruik sy siekte op ’n positiewe manier om mense by God uit te bring. Ook wanneer hy by ’n paar geleenthede in die tronk beland, vertel hy mense van Jesus en is sy tyd in die gevangenis ’n geleentheid vir mense om die evangelie te hoor en in Jesus te glo.
Siekte is altyd ’n traumatiese gebeurtenis vir elkeen. Tog kan die hospitaalsaal ’n plek wees waar jy kan getuig, waar jy vir ander mense iets kan beteken, vir hulle kan bid en hulle kan bemoedig. Soos Paulus kan jy negatiewe dinge in jou lewe op so ’n manier hanteer dat ander mense jou geloof sal kan sien en jy ook slegte dinge wat met jou gebeur sal kan gebruik om die evangelie uit te dra en God se plan met jou lewe te leer ken.
Hemelse Vader, help my asseblief om u plan vir my lewe in my teleurstellings te herken.
Amen
21 Maart
’n Deur van hoop
Lees Hosea 2:13-22
Tog sal Ek weer begin om haar die hof te maak. Ek sal haar na die woestyn toe bring en mooi dinge vir haar sê […] Ek sal die Akorlaagte ’n poort na ’n nuwe toekoms maak. Dan sal sy weer my liefde beantwoord soos toe sy jonk was […] – Hos 2:13-14
Wanneer die profeet Hosea se vrou hom verkul, besluit hy om haar nog ’n kans te gee, pleks van haar haar verdiende straf te laat kry. Hy bring haar na die woestyn toe om haar weer die hof te maak. Hy wil vir haar die Akorlaagte (waar Akan ter dood veroordeel is – vgl Jos 7:24-26) ’n poort na ’n nuwe toekoms maak.
Volgens Die Bybellennium (p 1000) is die woestyn van ellende en pyn waarin jy jou bevind het, nie God se oordeel oor jou nie. Nee, die bedoeling daarvan was in werklikheid dat dit jou so moes omsluit dat daar vir jou geen ander wegkomkans was nie sodat jy in jou nood kon ontdek dat die dinge waarop jy nog altyd staatgemaak het, inderdaad waardeloos is. Jy moes eers ontdek dat jy van God alleen afhanklik is.
In die Mofat-vertaling van vandag se teksvers staan daar: “I will make the dale of trouble a door of hope.” God sal jóú ook help om jou aardse probleme só te hanteer dat hulle uiteindelik vir jou ’n deur van hoop sal word, ’n poort na ’n nuwe toekoms. Dit is juis ons swaarkry in die wêreld wat uiteindelik sal uitloop op die “heerlikheid wat alles verreweg oortref en wat ewig bly,” wat God vir sy kinders beloof (2 Kor 4:17).
Hemelse Vader, dankie dat my swaarkry ook vir my ’n deur na hoop is – daardie hemelse hoop wat U self vir my belowe, en wat vir altyd sal duur.
Amen
22 Maart
Swaarkry as snoeiproses
Lees Johannes 15:1-8
“Elke loot aan My wat nie vrugte dra nie, sny Hy af; maar elkeen wat vrugte dra, snoei Hy reg, sodat dit nog meer vrugte kan dra. Julle is alreeds reg gesnoei deur die woorde wat Ek vir julle gesê het” – Joh 15:2-3
Jesus vertel hier vir sy dissipels dat Hy die ware wingerdstok is. Sy Vader is die landbouer. Net dié wingerdlote wat vrugte dra, word aan die wingerdstok gelos. Die ander word weggesny en later op ’n hoop gegooi en verbrand (Joh 15:6). Die onvrugbare lote word nie net afgesnoei nie, maar die ander vrugbare lote word rég gesnoei sodat hulle méér vrug kan dra. Dit is nie vir hierdie vrugbare lote “lekker” om gesnoei te word nie, maar die snoeiproses het ’n positiewe doel – dit word gedoen om vrug te verseker.
God se kinders moet ook swaarkry as snoeiproses deurgaan sodat hulle meer vrug vir Hom kan dra. Die doel van die vrug is om die Vader te verheerlik, sê Jesus in vers 8: “My Vader word juis daardeur verheerlik dat julle baie vrugte dra en my dissipels is.” God se snoeiwerk in ons lewens is sy manier om ons gehoorsaamheid te leer en daardie dinge wat tussen ons en Hom staan, uit ons lewe te verwyder.
Wanneer jy weer seerkry omdat God besig is om jou te snoei, weet dat Hy met hierdie snoeiproses jou eie geestelike groei wil bespoedig sodat jy méér vrug vir Hom sal dra en Hy in die proses verheerlik kan word.
Here, ek verstaan nou vir die eerste keer dat hierdie snoeiproses wat vir my so moeilik is, plaas móét vind sodat ek meer vrug kan dra en U in my lewe verheerlik kan word.
Amen
23 Maart
God gee uitkoms
Lees Job 5:1-11
“Ellende kom nie sommerso uit die grond uit op nie, swaarkry skiet nie sommer uit die aarde uit op nie. Die mens is vir swaarkry gebore, en sy lewe is kortstondig soos ’n vonk wat opskiet” – Job 5:6-7
Swaarkry is deel van die program van die lewe wat aan ons elkeen uitgedeel word. Job is reg wanneer hy kla dat “die mens vir swaarkry gebore is”. Swaarkry wag vir ons almal, ons kan ons net sowel daarop voorberei sodat ons slaggereed sal wees wanneer dit kom. Daar is darem één troos wat ons reeds bespreek het: God los sy kinders nooit alleen in swaarkrytye nie – al gaan dit hoe moeilik, jy het die waarborg dat jy steeds vir God by jou het.
Job is bitter ontevrede oor die verloop wat sy lewe geneem het, maar sy vriend Elifas het vir hom goeie raad: “As ek jý was, sou ek my tot God wend en my saak aan Hom voorlê. Wat God doen, is groot en ondeurgrondelik, wonder op wonder,” sê hy vir Job (Job 5:7-8).
In swaarkrytye kan jy steeds Elifas se raad volg. Draai jou na God en bespreek jou probleme met Hom. Hy is steeds ’n Bewerker van wonders soos Hy dit in Job se tyd was. Hy kan (en wil) ook vir jou uitkoms bewerk, selfs in die moeilikste omstandighede. “Dit is Hy wat die vertraptes weer optel, wat uitkoms gee aan dié wat ly,” beloof Elifas die beproefde Job (Job 5:11). Vra Hom sommer nou om dit ook vir jou te doen!
Hemelse Vader, ek wil my nou na U draai en mooi vra dat U asseblief vir my uitkoms sal gee. Dankie vir die belofte dat U die vertraptes weer sal optel, en vir dié wat swaar kry uitkoms sal gee.
Amen
24 Maart
Krag om uit te hou
Lees Job 6:1-13
“Het ek nog die krag om dit uit te hou? Self is ek tot niks in staat nie. Ek weet nie meer raad nie” – Job 6:11, 13
Job het aan die einde van sy kragte gekom. Hy weet nie meer raad met sy haglike situasie nie. Al
