is nie maklik om anders te wees nie. Ons wil so graag aan groepsdruk toegee en maak soos ander maak. Ons wil lyk soos ander lyk. Ons wil klink soos ander klink. Maar hoe kan ons dan ’n verskil maak? Hierdie wêreld kan net beter word as ons radikaal anders optree. In die sakewêreld moet ons bekend staan vir ons eerlikheid, al is dit tot ons eie nadeel. Ons huweliksverhouding moet ’n voorbeeld wees. Ons gesin moet vir mekaar omgee. Hoe kan ons dus verander?
GEBED: “Here, U maak ons radikaal anders. Verander my ook sodat ek selfs my vyande kan liefhê.”
Lees vanaand in Matteus 6:1–8 waarom ons nie na die eer van mense moet soek nie. Hoe moet ons dan maak?
SONDAG 17 MAART 2013
Lees eers Psalm 90:1–6
God bepaal ons lewensjare
“U laat die mens sterwe: U sê net: ‘Word weer stof!’” (Ps 90:3).
GESELSVRAAG: Wanneer is ons lewenstaak verby?
“Ek glo dat elkeen ’n bepaalde getal take moet afhandel,” sê die strokiesverhaalheld, Calvin, “en ek is al so ver agter dat ek seker vir ewig sal lewe.” Ongelukkig werk dit nie so nie. Ons kan so maklik ons lewe vermors op dinge wat geen ewigheidswaarde het nie. Ons kan die belangrikste besluite uitstel tot dit te laat is.
Ons lees dat hierdie psalm deur Moses gedig is. Hoe dit in Dawid se psalmbundel beland het, word ons nie vertel nie. Dit help ons egter om hierdie psalm te lees met Moses se lewensloop in gedagte. Moses was bewus daarvan dat elke mens se lewe beperk is. Daarom moet ons versigtig wees hoe ons elke kosbare minuut gebruik. Dit kan teen of vir ons tel. Ons moet leer om by God te skuil (v 1) want net God is ewig. Selfs voor die berge gemaak is, was Hy al daar (v 2). God bly in beheer van die skepping. Ook van ons lewens. Hy bepaal hoe lank elke mens se lewe moet wees (Ps 139:16). Wanneer ons dus ’n geliefde aan die dood moet afstaan, is dit vir ons ’n troos dat sy of haar lewe uiteindelik in God se hand was, nie van dié van ’n misdadiger of geweldenaar nie. Wanneer ons liggaam na stof terugkeer, is dit gelukkig nie die einde nie. Dit is die begin van ’n nuwe, wonderliker manier van lewe – ewig by die Here! Dit is iets om na uit te sien. Die dood is maar net die deurgang na die Vaderhuis in die ewigheid.
GEBED: “Hemelvader, ek sien daarna uit om eendag by U te wees.”
Lees vanaand in Psalm 90:7–17 wat ons met ons beperkte lewensdae moet doen.
MAANDAG 18 MAART 2013
Lees eers Matteus 6:9–24
Wie is jou baas?
“Niemand kan vir twee base tegelyk werk nie ... Julle kan nie God én Mammon dien nie” (Matt 6:24).
GESELSVRAAG: Wat het God met ons daaglikse werk te doen?
“Geld kan nie geluk koop nie, maar dit maak jou miserabelheid darem baie meer gerieflik,” het Helen Gurley Brown, ’n Amerikaanse skrywer, opgemerk. En as jy eerlik moet wees, dan het geld ’n baie belangrike deel van ons lewe geword. Die dae toe mense alles wat hulle nodig gehad het self produseer het, is lankal verby. Maar die gevaar is ook dat ons goed ons god word.
Dit is aangrypend dat Jesus by gebed begin en by geld eindig. As jy mooi boekhou, het hy vyf maal meer oor ons besittings gesels as oor dinge soos geloof of gebed. Dit is vir Hom baie belangrik dat ons vry moet wees van aardse bande, sodat ons sy Stem kan hoor. Geld mag nie jou baas word nie. Een manier is om te leer om geld weg te gee – en wonderlik genoeg, dit maak jou bly as jy iemand anders kan help! Só maak jy skatte in die hemel bymekaar, waar dit nie gesteel kan word of skade ly nie. Jesus het mos vir die ryk jong man aanbeveel om sy rykdom weg te gee, sodat hy skatte in die hemel kan hê (Mark 10:21). Dis die beste belegging.
Die werk wat ons hierdie week gaan doen, het dus alles met die koninkryk van God te doen. Ons inkomste moet ons vir Hom bestuur. Ons moet Hom leer vertrou vir alles wat ons nodig het. Mag hierdie week ’n avontuur in jou geloofslewe wees!
GEBED: “Here, leer my om ’n getroue rentmeester te wees.”
Lees vanaand in Matteus 6:25–34 wat die geheim van ware sekuriteit op aarde is. Hoe gaan jy dit doen?
DINSDAG 19 MAART 2013
Lees eers Matteus 7:1–12
Hoeveel te meer
“As julle wat sleg is, dan weet om vir julle kinders goeie dinge te gee, hoeveel te meer sal julle Vader wat in die hemel is, goeie gawes gee aan dié wat dit van Hom vra?” (Matt 7:11).
GESELSVRAAG: Watter goeie dinge kan ons van ons Vader verwag?
“Die meeste mense bid net genoeg om hul gewetens te stil, maar nie genoeg om enige verskil te maak nie.” As jy die lewensverhale van gebedstryders lees, dan besef jy baie gou dat ons vandag maar min weet van wat dit beteken om “deur te bid”. Gebed was vir hulle ’n werklike werk, ’n stryd. Hulle moes volhard tot die antwoord kom (Luk 18:1). Gebed is die krag agter elke herlewing en elke suksesvolle uitreik. Ure, selfs nagte van gebed, lewer resultate. God het nie oortuiging nodig nie; Hy gee ons graag alles wat goed is, maar ons moet verander.
Jesus is hier besig om baie belangrike beginsels aan sy dissipels te leer. Hy leer hulle dat dit nodig is om te bid (om in die besonder te vra). Ons moet soek na God se wil in hierdie saak tot ons weet wat dit is, dan kan ons met geloof bid. Ons moet klop tot die Here vir ons oopmaak. Dit beteken ook dat ons onsself moet ondersoek sodat ons die sonde wat skeiding maak, kan bely en uit die pad kan kry.
Gebed verander ons ook. Dit maak dat ons anders teenoor ander mense optree. Ons behandel ander mense met liefde en respek, want dit is wat ons self verlang (v 12). Gebed is iets wat ons gereeld moet oefen, tot ons dit regkry om te bid soos die Here dit wil.
GEBED: “Here, leer my bid, nie net hoe om te bid nie.”
Lees vanaand in Matteus 7:13–23 oor die groot verskil tussen dié wat gered word en dié wat verlore gaan.
WOENSDAG 20 MAART 2013
Lees eers Matteus 7:24–8:4
Hoorders en doeners
“Elkeen dan wat hierdie woorde van My hoor en daarvolgens handel, kan vergelyk word met ’n verstandige man wat sy huis op rots gebou het” (Matt 7:24).
GESELSVRAAG: Watter preek het al jou lewe verander? Hoe?
“Nee, man, dominee bedoel dit nie so letterlik nie,” was glo die kommentaar van die ander eende in Kierkegaard se verhaal. Hy het vertel van die wilde eend wat as leraar by ’n klomp mak eende kom nesskop het. Hy wou hulle toe oortuig dat hulle bedoel was om te vlieg, nie te waggel nie. Een eendjie het dit ernstig opgeneem en begin verslank, want daardie logge liggaam sal nooit kon vlieg nie. Vandaar die kommentaar van die ander. Is dit nie tipies van die meeste kerkgangers nie? Verwag ons dat die Here ons Sondag sal verander?
Die Here Jesus het in sy bergpreek ’n hele klomp radikale dinge kwytgeraak. Het Hy dit letterlik bedoel? Is dit alles sommer net woorde wat nie so letterlik opgeneem moet word nie? Hy het nogal op baie tone getrap – ons s’n ook! Kan ’n mens werklik so leef soos Hy in hierdie Skrifgedeeltes voorskryf? Darem seker nie. Vandaar sy waarskuwing aan die einde. As ons net daarna luister en nie doen wat Hy sê nie, gaan ons lewenshuis omval. Eina!
“Dankie dominee, dit was ’n mooi
