vreeslose getuienis het uiteindelik sy lewe gekos. Maar baie mense het toe reeds geluister na sy oproep tot bekering.
Johannes was gou om te sê dat hy nie die groot man is nie. Daar was iemand anders, die Messias vir wie hy die pad voorberei, wat alles sou verander. Hy sou nie met water doop nie, maar met die Heilige Gees en met vuur. En toe die Heilige Gees oor die eerste gemeente uitgestort is, was dit sowaar in die vorm van vuurtonge wat op hulle gekom het! Jesus kom om onderskeid te maak tussen die koring en die kaf. Die laaste oordeel sal finaal wees.
Hierdie boodskap is vandag nog nodig. Ons moet hoor van bekering. Die meeste mense is op die verkeerde pad. Ons moet ook hoor van die Heilige Gees wat lewens verander en gelowiges toerus vir diens aan die koninkryk van God. Dit is nodig dat ons aan die brand moet raak vir die Here. Is dit reeds waar van jou lewe?
GEBED: “Here Jesus, werk deur u Gees in my hart sodat ek ook aan die brand vir U kan raak.”
Lees vanaand in Matteus 3:13–17 hoekom Jesus Hom met die doop van bekering laat doop het.
WOENSDAG 13 MAART 2013
Lees eers Matteus 4:1–11
Versoekings kan weerstaan word
“Daar staan geskrywe: ’n Mens leef nie net van brood nie maar van elke woord wat uit die mond van God kom” (Matt 4:4).
GESELSVRAAG: Hoe hanteer ons versoekings?
“Ek hanteer versoeking deur daaraan toe te gee,” het William Shakespeare in een van sy dramas geskryf. Ons moet seker almal maar erken dat versoeking vir ons ’n groot probleem is. Hoe kan ’n mens dit weerstaan? “Jy kan straf vermy deur eenvoudig gehoorsaam te wees,” vertel ek vir my een kleinseun. “Dis onmoontlik,” was sy reguit antwoord.
Die Here Jesus wys vir ons die pad na oorwinning. Die duiwel weet baie goed hoe om met mense te werk. Sy resep bly maar steeds dieselfde: Hy verlei ons deur ons liggaamlike behoeftes en drange, deur die lokstem van rykdom en deur die belofte van gewildheid en status. Jesus het elke keer gesien wat aangaan. En elke keer klap hy die duiwel met Deuteronomium! (Hoe goed ken ons daardie boek?) God se Woord is die een ding waarteen die duiwel geen verdediging het nie. Hy moet vlug. Wat sou jy dus doen as jy in sy plek was? Natuurlik probeer keer dat die kinders van die Here die Bybel bestudeer en uit hul kop leer. Dagstukkies is alles baie mooi, maar die duiwel skrik nie vir mensewoorde nie. Maar hy is doodbang vir God se Woord. Kom ons leer om die Bybel reg te gebruik en gedeeltes daarvan te memoriseer.
GEBED: “Leer my, Here, om u Woord te onthou en te gehoorsaam. Herinner my dan daaraan wanneer dit nodig is.”
Lees vanaand in Matteus 4:12–17 hoe Jesus dieselfde boodskap as Johannes voortsit.
DONDERDAG 14 MAART 2013
Lees eers Matteus 4:18–25
Vissers van mense
“Kom hier! Kom saam met My, en Ek sal julle vissers van mense maak” (Matt 4:19).
GESELSVRAAG: Hoe kan ons vissers van mense wees?
“Nee, ek vang nie vis nie – ek is ’n hengelaar,” verduidelik ’n kennis met ’n groot glimlag. Toe wonder ek – ons sien gereeld die manne met visstokke op die rotse langs die see, maar ek het nog nooit een gesien wat ’n vis gevang het nie. Die beste toerusting help niks as jy nie ’n vissie kan uittrek nie.
“Oom Bossie se visse is al goed wat aanhou groei nadat hulle dood is,” lewer iemand kommentaar op ’n hengelaar se visstories.
Hoe gaan dit met jul gemeente? Vang julle elke dag mense vir Christus? Wanneer laas het jy van ’n bekering gehoor? Die geheim van die dramatiese groei van die kerk in die eerste paar eeue was dat die groei deur die getuienis van gewone gelowiges was (Hand 8:4). Deesdae hou ons so baie kursusse en Bybelstudies, maar dit is vir ons eie groei, nie die koninkryk s’n nie. Jy kom elke dag met mense in aanraking wat nooit ’n dominee sien nie. Wie, dink jy, is die mees logiese persoon vir die Here om te gebruik om daardie ouens te bereik? Is dit nie jy nie? En wie is die beste persoon om jou kinders na die Here te lei? Die kategeet? Die dominee? Of dalk jy wat elke dag met hulle saamleef? Jou grootste vreugde sal wees as jy vandag iemand na die Here kan lei en dan op die pad verder kan begelei. Is jy gereed hiervoor?
GEBED: “Here, gee my vandag iemand om mee oor U te praat.”
Lees vanaand Matteus 5:1–12 en kyk watter van hierdie uitsprake op jou van toepassing is.
VRYDAG 15 MAART 2013
Lees eers Matteus 5:13–20
Maak lig daar
“Laat julle lig so voor die mense skyn, dat hulle julle goeie werke kan sien en julle Vader wat in die hemel is, verheerlik” (Matt 5:16).
GESELSVRAAG: Hoe kan ons vandag ons lig laat skyn?
“Lig het net waarde as dit in ’n donker plek is.” Dit is nie heeltemal waar nie, want ’n verkeerslig het waarde as die son skyn. So bedoel die Here seker ook dat ons elke dag en elke nag ’n verskil moet maak in ander se lewens. Selfs die kleinste kersie is sterker as die grootste duisternis. Maar hoe donkerder dit is, hoe nodiger is daardie liggie. As dinge maar donker lyk daar by die werk of by die skool, dan is ons juis daar nodig.
Jesus sê ons goeie werke is die lig wat ons voor die mense moet uitdra. Mense hou ons fyn dop om te sien of ons anders as hulle is. As gelowiges struikel, dan is hulle bly, want dan hoef hulle nie skuldig te voel nie. Ons moet hulle laat verstaan dat ons nie een volmaak is nie, maar dat ons op die regte pad is. Ons wil graag groei soos die Here dit wil hê. Ons wil uitreik na mense wat Hom nodig het. Ons wil help waar ons kan.
Dink so ’n bietjie: waar is die “donkerste” plek wat jy ken? Is dit in die politiek? Is jy nie dalk daar nodig nie? Of die armoede in die plakkerskamp? Kan jy dalk een persoon daar help? Of die skoolkinders wat spesiale aandag nodig het? Kan jy hulle dalk met studie help? Of kan jy dalk iemand met ’n kroniese sieke aflos, sodat sy ’n slag kan uitkom? Laat jou liggie skyn!
GEBED: “Laat ons skyn vir Jesus met ’n helder glans!”
Lees vanaand in Matteus 5:21–32 hoe radikaal die Here se kinders anders moet wees.
SATERDAG 16 MAART 2013
Lees eers Matteus 5:33–48
Radikaal anders
“Julle moet julle vyande liefhê, en julle moet bid vir dié wat vir julle vervolg” (Matt 5:44).
GESELSVRAAG: In watter opsigte is Christene anders as ander mense?
“God het jou lief en ek ook,” verklaar ’n Christen teenoor die soldaat wat hom martel om sy geloof af te sweer. Hierdie onverwagte woord het uiteindelik tot daardie offisier se bekering gelei.
Min van ons sal dit seker regkry om so iets te sê en dit te bedoel. Bid jy vir daardie baas wat onregverdig optree? Of vir daardie kollega wat jou so uitbuit? Of vir daardie boelie by die skool wat jou elke dag wil seermaak?
Jesus vertel in vandag se gedeelte dat ons nie slagoffers moet bly nie. Neem die inisiatief oor. As iemand jou een myl laat loop, loop dan twee. As iemand jou onregverdig hof toe neem, skik maar liewers, al is hy verkeerd. Moenie wraak neem nie. Vra jouself af: Wat sou Jesus in my plek gedoen het?
